Walang kayod, may pag-asa sa Labor Day

@Editorial | April 29, 2021

Kasabay ang Labor Day o Araw ng mga Manggagawa sa Mayo 1, inanunsiyo ng Department of Labor and Employment (DOLE) ang alok na 26,000 local at overseas job opportunities.

Kaya hinihikayat ang mga aplikante na samantalahin ang online job fair.

Ayon sa ahensiya, may alok na local at overseas vacancies ang 567 employers na kabilang sa industriya ng manufacturing, business process outsourcing, health services, retail at construction.

Nasa 23,000 local vacancies naman ang binuksan ng 522 employers para sa production operators, factory workers, customer service representatives, nurses, cashiers, baggers, mason at karpintero.

Mahigit 3,000 overseas jobs naman ang alok ng 45 employers kabilang ang nurses, factory workers, mechanics, nursing aides/ healthcare assistants at cleaners.

Dahil sa banta ng COVID-19, gagawing virtual ang nasabing job fair.

Samantala, ang ika-119 Araw ng mga Manggagawa ay may temang, “Mayo Uno sa Bagong Panahon — Manggagawa at Mamamayan: Babangon, Susulong!”

Kailangan nating tanggapin na hindi na babalik ang dating sitwasyon. Tayo na ang mismong gagawa ng paraan kung paano mamumuhay sa banta ng COVID-19. Hindi puwedeng habambuhay tayong matatakot, magkukulong at maghihintay sa kung ano lang ang mangyari.

At maaaring ito na ang magandang simula para sa mga nawalan ng kayod dahil sa pandemya.

‘Ika nga, hangga’t may buhay, may pag-asa, tuloy ang pangarap para sa sarili at pamilya.

Lumala man o bumuti, ‘wag pa ring magpakampante laban sa COVID-19

@Editorial | April 28, 2021

Taliwas sa naunang babala ni vaccine czar Carlito Galvez, Jr. na posibleng makaranas ng surge sa gitna ng iba’t ibang variants ng COVID-19, sinabi naman ni Presidential adviser on entrepreneurship Joey Concepcion na mararanasan na ng Pilipinas ang kaginhawaan sa Hunyo.

Aniya, dahil ito sa pagdating ng mas maraming COVID-19 vaccines.

Kinumpirma na umano ng AstraZeneca ang pagdating ng 1.5 million doses na bakuna sa unang linggo ng Hunyo at may darating pang 17 milyon bago matapos ang taon hanggang sa Pebrero 2022. Habang ang Novavax vaccines naman ay darating sa August-September.

Pinaniniwalaang mas maraming bakuna, mas maraming matuturukan at mas bubuti na ang kalagayan sa bansa.

Kaugnay nito, tiniyak namang uunahin na ang pribadong sektor sa susunod na AstraZeneca vaccinations. Sa nasabing 17 milyong darating na bakuna, 11 milyon dito ang mapupunta sa lokal na gobyerno, tatlong milyon sa national government at ang natitirang tatlong milyong bakuna ay ilalaan na sa pribadong sektor.

Lumala o bumuti man ang sitwasyon sa Hunyo, tulad ng lagi nating paalala, huwag tayong magpakampante. Maling isiping tapos na ang krisis dahil sa pagdating ng mga bakuna.

Hangga’t walang lunas, hindi tayo dapat magtiwala. Sa halip, mas dapat tayong mag-ingat at maging disiplinado.

Community pantry na walang sistema at ‘di kayang makontrol, stop na lang!

@Editorial | April 27, 2021

Nagpapatuloy ang bayanihan sa pamamagitan ng community pantry sa iba’t ibang panig ng bansa.

Kasabay ng pagdagsa ng mga tao sa mga community pantries ay ang pagbuhos naman ng mga tulong mula rin sa ating mga kababayan. Ito naman talaga ang tunay na diwa ng community pantry — magtulungan.

Bagama’t sa ngayon, binabalot ito ng kontrobersiya matapos ang tinaguriang ‘birthday pantry’ ng isang aktres, kung saan isang senior citizen na pumila ang nasawi.

Kasunod nito, naglabasan na ang mga problema at posible pang maging isyu sa pagsasagawa ng mga community pantries. Una nang may nahuli sa curfew dahil sa pagpila nang maaga. Naglabasan din ang mga bata, buntis at senior citizens. May mga nasita rin sa paglabag sa social distancing, walang face mask at hindi wastong pagsusuot ng face shield — banta sa lalo pang pagkalat ng COVID-19.

Hindi naman natin nilalahat, marami pa ring community pantries na maayos at masasabing ligtas naman ang pamimigay ng ayuda. Nakaalalay ang kapulisan at taga-barangay sa mga nag-oorganisa ng community pantry at higit sa lahat, disiplinado ang mga pumupunta.

Ngayong nakita na natin ang mga kakulangan, sana’y magsilbi na itong aral sa mga susunod pang gawain. Pilitin nating maitawid ang tunay na layunin at ‘yan ay ang pagtulong.

Kung may iba riyan na ang gusto lang ay magpabida o manggulo, manahimik na lang kayo.

Paalala naman sa mga walang sapat na kakayahan sa pag-ooraganisa ng community pantry, mas mainam na ipagkatiwala na lamang natin sa mga may alam. Tutal ang gusto naman natin ay makatulong, matuto rin tayong humingi ng tulong upang maging maayos at ligtas ang lahat.