Sim card registration kontra-fake booking

@Editorial | May 10, 2021

Sa gitna ng COVID-19 pandemic, napakalaking tulong ng mga delivery companies at riders, na nagiging tulay sa paghahatid ng serbisyo.

Bukod sa naiiwasan ang pagkalat ng virus dulot ng paglabas ng karamihan, masasabing pinabibilis din nila ang takbo ng pamumuhay.

Ang problema, may mga pasaway naman na walang magawa sa buhay kundi ang mamerhuwisyo ng ibang tao—pati delivery, hindi pinatawad sa kalokohan.

Napapadalas ang reklamo sa fake bookings, partikular sa mga food services. O-order ng sangkatutak na pagkain pero, gagamit ng ibang pangalan at address. ‘Pag tinawagan, wala na, tipong nag-trip lang, pero hindi na nila naisip kung ano’ng perhuwisyo ang naidulot sa taong ginamit ang pangalan at lalo na sa nag-deliver na halos magkano lang ang kinikita at grabe pa ang pagod. Sino’ng matinong tao ang gagawa ng ganitong kalokohan?

Kaya muling napag-usapan ang isinusulong na mandatory registration ng mga prepaid SIM cards.

Sa ilalim ng House Bill No. 5793 o the Subscriber Identity Module (SIM) Card Registration Act at Senate Bill No. 176 or the proposed SIM Card Registration Act, may laban na sa mga ganitong panloloko o kahalintulad na sitwasyon.

Isa sa mga requirements na hinahanap sa mga gagamit ay dapat magpakita ng mga valid ID at larawan bago mabigyan ng SIM Card.

Kung tuluyan itong maisasabatas at matututukan ang implementasyon, tiyak na mababawasan ang mga kalokohan at panlalamang sa kapwa.

Hindi lang ito makatutulong sa nauuso ngayong fake bookings kundi maging sa iba pang modus-operandi na nagtatago sa telepono ang mga pasaway.

Mga Pinoy, balik-kayod na, ayos!

@Editorial | May 08, 2021

Bumaba na ang unemployment rate sa bansa.

Ayon sa Philippine Statistics Authority (PSA), mayroong 3.44 milyon o katumbas ng 7.1 percent ang walang trabaho noong Marso na ito ay mas mababa ng 8.8 percent noong Pebrero.

Ito na ang pinakamababang unemployment rate mula nang tumama ang COVID-19 pandemic sa bansa.

Masasabing isang senyales na bumabalik na ang sigla ng ekonomiya ng bansa dahil dumarami na ang mga nagbubukas na mga kompanya.

Lumabas din sa survey na mayroong 2.18 milyong manggagawa ang nadagdag sa mga nagkaroon ng trabaho na umabot na ngayon sa 45.33 milyon o katumbas ng 92.9 percent employment rate noong Marso kumpara sa 43.15 milyon noong Pebrero.

Bumaba rin ang underemployment o mga may trabaho pero, hindi tugma sa tinapos nilang kurso kung saan mayroong 7.85 milyon noong Pebrero na naging 7.34 milyon na noong Marso.

Palagi nating sinasabi na kayang-kaya nating mga Pinoy na bumangon at bumawi, anumang pagsubok ang dumating. Likas sa atin ang hindi basta nagpapatalo sa halip, lalong lumalaban.

Hindi ito ang unang pagkakataon na pinadapa ang ating kabuhayan at marami na ring beses tayong nagsimula muli at mas lalo nating ginalingan.

Ito ang panahon na mas lalo nating kailangan ang isa’t isa. Sa unti-unting pagbubukas ng mga establisimyento, kasunod nito ang pagbalik ng trabaho at tiyak na mas matatag, malakas at pursigido ang mga manggagawa na magsisipagbalik.

Kailangan din ng patuloy na suporta mula sa gobyerno. Batid naman nating hindi kakayanin ng mga pribadong sektor at ng mga manggagawa ang muling pagbangon, dapat na may alalay pa rin. Wala namang ibang magtutulungan kundi tayo ring mga Pinoy.

Unregistered nurses,to-the-rescue vs. COVID-19

@Editorial | May 07, 2021

Hihilingin na sa Department of Health (DOH) at sa Professional Regulation Commission (PRC) na pahintulutan ang mga unregistered nurses na matugunan ang kakulangan ng health workers sa bansa.

Ang mga nagtapos ng nursing na hindi pa nakakapag-board exam dahil sa pandemic ay maaari umanong gamitin bilang complementary manpower para makatulong sa kakulangan ng mga medical frontliners.

Bagama’t wala pang lisensiya, pinag-aralan naman daw ng mga ito ang trabaho ng mga nurse. Kung saan, puwede raw silang magtrabaho sa ilalim ng pangangasiwa ng isang registered nurse o doktor at sa pamamagitan ng isang special arrangement sa pagitan ng PRC.

Sa pamamagitan nito, kahit paano ay matutu­lungan ang mga health workers sa laban sa COVID-19. Hindi naman kinakailangang bigyan sila ng mabigat na gawain lalo’t napakalaking responsi­bilidad ang pagtugo sa buhay, kundi ‘yung maging kaagapay lang ng mga doktor at rehistradong nurse ay napakalaking bagay na.

Matatandaang ipinagpaliban ng PRC ang nursing board exam ngayong taon na nakatakda sana sa May 30 at 31 alinsunod na rin sa hiling ng Philippine Nursing Association dahil pa rin sa patuloy na pagtaas ng mga kaso ng COVID-19. Inilipat ang araw ng exam sa November 21 at 22, 2021.