E-Sumbong ng PNP, sana epektib kontra-pasaway

@Editorial | May 18, 2021

Inilunsad kahapon ng Philippine National Police (PNP) ang E-Sumbong na anila’y mas pinalakas na complaint referral and monitoring ng mamamayan.

Ito ay binubuo ng hotline, email address at Facebook account na dinevelop ng Information Communications Technology ng PNP.

Ang system ay automated at may supervision din dito ang Office of the Chief PNP kung saan makikita niya mismo ang report na naaksiyunan na at hindi pa.

Nilinaw naman na hindi tatanggalin ang existing PNP numbers nang sa gayon ay hindi magkaroon ng kalituhan.

Kaugnay nito, tiniyak din ng ahensiya na ang mga legitimate na reklamo lamang ang kanilang tutugunan. Kasabay ang babala sa mga pasaway o manloloko na sila’y hahabulin ng PNP Anti-Cybercrime Group (ACG).

Maganda ang layunin ng E-Sumbong, dahil mas magiging mabilis ang paghingi ng tulong sa mga awtoridad, maaaring mag-alinlangan ang mga kriminal na gumawa pa ng kalokohan, lalo na kung magiging mabilis din ang pagtugon ng kapulisan sa mga sumbong.

Sa totoo lang, napakarami nang programa, proyekto at inisyatibo ang gobyerno laban sa masasamang gawain, ang nagiging problema ay ang sistema. Sa umpisa ay talagang okay, mabilis ang tugon, solb agad ang problema, pero habang tumatagal, ang inaasahang tagalutas ay nagiging dagdag pa sa suliranin. Ang ending, magulo, sayang ang budget at nadismaya lang ang publiko.

Kaya sana, itong inilunsad na E-Sumbong, eh, talagang maging takbuhan ng mga biktima at masasalamin ang mabuting adhikain ng mga awtoridad, ang makapaglingkod-bayan.

GCQ sa NCR Plus, balik-trabaho na para sa ekonomiya

@Editorial | May 15, 2021

Mula ngayong araw, isasailalim na sa general community quarantine (GCQ) with heightened restrictions ang NCR, Laguna, Rizal, Bulacan at Cavite o ang tinaguriang NCR Plus.

Nangangahulugan ito na mas madaragdagan ang mga establisimyentong magbubukas at biyaheng papayagan, kaya darami rin ang mga taong nasa labas.

Kaugnay nito, naniniwala naman ang Department of Health (DOH) na handa na ang mga lugar na sakop ng NCR Plus na bumalik sa estado ng GCQ.

Bumaba na raw ang “average daily attack rate” o tinatayang bilang ng mga nahahawaan ng COVID-19 kada araw sa NCR Plus, pati na ang “growth rate”.

Lumuwag na rin ang sitwasyon sa mga ospital o ang “healthcare utilization rate” ng rehiyon at mga lalawigan.

Kaya panahon na para makabawi-bawi ang ekonomiya. Kung saan, aabot umano sa 200,000 trabaho ang inaasahang maibabalik sa ilalim ng GCQ.

Matatandaang, mula nang inilagay ang NCR Plus sa ilalim ng enhanced community quarantine (ECQ) noong Marso, umabot na 1.5 milyong Pilipino ang nawalan ng trabaho. Bumaba ito ng hanggang 1 milyon nang inilagay ang NCR at mga karatig lalawigan sa ilalim naman ng modified ECQ noong Abril.

Sa ngayon, ang bilang ng mga manggagawang nawalan ng trabaho ay bumaba pa sa 700,000 matapos na payagan ang limited operations ng ilang mga establisimyento tulad ng mga dine-in restaurants, barber shops at parlors sa gitna ng MECQ.

At tulad ng palaging paalala sa tuwing nagbababa ng community quarantine, hindi ito nangangahulugang dapat maging kampante. Bagama’t niluwagan ng pamahalaan ang quarantine classification, may mga panuntunan pa rin dapat sundin ang publiko.

Kailangang masiguro pa rin na kontrolado ang sitwasyon sa gitna ng pandemya upang hindi na tayo muling bumalik sa paghihigpit na mauuwi na naman sa kawalan ng trabaho — nganga.

Gobyerno at publiko, dapat parehong natututo sa gitna ng pandemya

@Editorial | May 14, 2021

Sadyang maraming naidulot ang COVID-19 sa buhay ng bawat isa.

Talagang sinubok nito ang katatagan ng lahat. Maraming buhay ang nawala, kabuhayang bumagsak at nakita kung ano’ng klaseng mamamayan at gobyerno meron tayo.

Bagama’t, hindi natin inaasahan ang sitwasyon at masasabing hindi talaga tayo handa at pare-parehong nangangapa, sana naman sa mga panahong ito ay natuto na tayo.

Sa ating pamahalaan, sana’y may mas maayos na tayong sistema na dapat ipatupad at tiyaking sinusunod. Lahat ng mga kakulangan, sana’y unti-unti nang napupunan, tulad ng mga pangangailangan sa ating sistemang pangkalusugan — pasilidad, kagamitan at mga gamot.

Ngayon din natin nakikita ang mga problema na tila hindi napagtutuunan ng pansin. Sa halip na nasolb na noon, isyu pa rin hanggang ngayon, halimbawa ang hindi pa rin naaayos na sahod at benepisyo sa mga health workers. Buong-buo ang kanilang serbisyo at dedikasyon pero hindi naman sapat ang kanilang natatanggap na suporta mula sa gobyerno.

Sana’y natuto na rin ang publiko sa lahat ng nangyayari, bagama’t hanggang ngayon ay libu-libo pa rin ang nahuhuling pasaway. Tulad sa isang lungsod na 3,200 katao ang nahuli sa ikinasang “one-time, big-time” operation sa 142 barangay. Patunay na hindi pa rin natuto ang iba sa atin.

Huwag na sanang hintayin na lumala pa ang kaso ng COVID-19, ngayon pa lang ay tapusin na dahil marami na ang nagsakripisyo at grabe na ang epekto ng pandemya sa bawat pamilya at sa buong bayan.