Takot sa gastos sa pagpapa-checkup, dahilan ng malalang pagkakasakit

@Editorial | March 3, 2023

Isa sa masasabing nagpapalala sa karamdaman ng tao ay ang hindi pagpapatingin sa doktor.

Marami sa ating mga kababayan ang natatakot magpa-checkup dahil sa gastos.

Kaya dapat itong mabigyan na ng pansin ng kinauukulan.

Sa ngayon, isinusulong na ng ilang mambabatas ang free medical checkup sa bansa sa lahat ng members sa Philippine Health Insurance Corporation o PhilHealth.

Sa pamamagitan nito ay masisiguro na lahat ay may sapat na access na matugunan ang iniindang karamdaman o para malaman kung mayroon mang potential serious health condition ang isang tao.

Sa ilalim ng Universal Health Care Act, lahat ay automatic na member ng PhilHealth, at kailangan umano na kasama na sa benepisyo ng nasabing ahensya ang free medical checkups.

Ang paglalaan ng oras sa free medical checkups ay malaki ang maitutulong sa pagsalba ng buhay ng isang tao.

Sana maging mas seryoso ang gobyerno sa panukalang ito. Kalingain natin ang lahat ng mamamayan, anumang estado sa buhay.

Nakasalalay sa kalusugan ang isang maayos na pamayanan. Gamitin natin ang pondong mayroon tayo para maging maayos ang kalagayan ng bawat isa.

Napakalaking bagay na hindi na pinoproblema ng mag-anak kung saan kukuha ng panggastos.

Ilapit natin sa taumbayan ang serbisyong medikal nang wala nang pagsasakripisyo.

Gobyerno, dapat ready sa tigil-pasada

@Editorial | March 1, 2023

Isang linggong tigil-pasada, mula Marso 6 hanggang 12, ang ikinasa ng iba't ibang transport group.

Ito ay bilang pagtutol sa nakaambang phaseout sa mga traditional jeepney, UV Express at multicab na bigong sumanib sa mga kooperatiba para sa Public Utility Vehicle Modernization Program (PUVM) ng gobyerno.

Aabot sa 40,000 units ng traditional jeepneys at UV Express ang inisyal na magtitigil-pasada oras na hindi bawiin ng Land Transportation Franchising and Regulatory (LTFRB) ang Memorandum Circular 2023-013 ukol sa PUV Modernization.

Humihingi naman sila ng paumanhin sa mga pasaherong maaapektuhan ng kanilang tigil-pasada.

Nauunawaan natin ang hinaing ng mga operator at driver na hirap talagang makatugon sa bagong programa gayunman, hindi maiiwasan na maaapektuhan din talaga ang publiko kapag natuloy ang kanilang protesta. Mahaba-mahaba ang isang linggo, tiyak na naiisip na ng mga komyuter ang mala-kalbaryong sitwasyon. Apektado ang trabaho at negosyo. Napakahalaga ng transportasyon, kaya nitong patigilin ang ekonomiya.

Kaya dapat tutukan ng kinauukulan ang usapin sa PUV Modernization, baka sakaling may paraan pa upang hindi matuloy ang malawakang tigil-pasada.

Naniniwala tayo na magiging maayos din ang lahat kung mapag-uusapan. Kailangan lang ng magandang plano, pakikinig at pagkakasundo.

"Anti-flood master plan” sa M. Mla., kumusta ba?

@Editorial | August 26, 2022

Mula noon hanggang ngayon, problema pa rin ang baha.

Ang masaklap, mukhang patindi nang patindi ang sitwasyon, partikular sa Metro Manila.

Kaya nais paimbestigahan sa Kamara ang estado at kakayahan ng “anti-flood master plan” para sa Kalakhang Maynila at mga kalapit na lugar. Ito ay para matiyak ang “cost-effective” na paggastos para sa naturang plano.

Layon ding makahanap ng mga solusyon sa lumalalang pagbaha.

Batid naman natin na isa ang Pilipinas sa mga bansang madalas tamaan ng kalamidad na mayroong average na 20 bagyo kada taon.

Napag-alamang mayroong P350 billion Metro Manila Flood Management Master Plan, na roadmap ng pamahalaan at naka-programa mula 2012 hanggang 2035. Kumusta kaya ang proyekto?

Samantala, bukod sa pagkakaroon ng epektibong proyekto kontra baha, napakahalaga na lahat ay nakikibahagi sa paglutas sa problema.

Kung lahat ay disiplinado, kahit paano ay mapipigilan ang grabeng baha. Matagal nang sinasabi na kontrolin ang basura, itapon nang maayos, pero marami pa rin ang pasaway.

Huwag nating hintaying mas lumala ang sitwasyon na bigla na lang tayong lumubog sa baha. Walang ibang panahon kundi ngayon.

Alamin at makiisa sa mga programa at proyekto para makaiwas sa pagbaha. Huwag nang pasaway, plis lang!