Sapat na impormasyon sa bakuna, mas oks pa rin kaysa sa kung anu-anong gimik

@Editorial | May 29, 2021

Kapansin-pansin ngayon ang iba’t ibang gimik o panghikayat para magpabakuna kontra-COVID-19.

Mula sa bonus o incentives, libreng gulay, bigas, pangkabuhayan showcase, hanggang pa-raffle ng motorisklo, bahay at lupa, talagang lahat ay handang ialok ng mga employer at government officials para lang magpaturok ang kanilang mga empleyado at nasasakupan.

Bilang reaksiyon, ayon sa Department of Health (DOH), wala naman silang nakikitang masama sa ganitong inisyatibo. Mismong ang ahensiya umano ay nag-iisip na rin ng additional incentives para makahikayat ng mas maraming tao na magpabakuna.

Batid naman nating marami pa rin sa mga Pilipino ang may agam-agam sa COVID-19 vaccine.

Gayunman, hindi lang materyal na insentibo ang kailangan ng publiko para talagang magtiwala sa bakuna. Higit na dapat pa ring pagtuunan ay kung paano maipaliliwanag nang maayos ang lahat ng impormasyon na may kaugnayan sa mga itinuturok.

Maaaring kasabay ng mga paghikayat na ito ay naglalabas na rin ng mga panuntunan at aktuwal na resulta ng pagbabakuna ang gobyerno.

Ilantad sa publiko ang kalagayan ng mga nabakunahan na, ipakita ang malinaw na patunguhan ng pagbabakuna at kung ano pa ang mga inaasahan natin sa hinaharap na makatutulong para malampasan ang pandemyang ito.

Kung malinaw na maipararating sa taumbayan ang kahalagahan ng bakuna at talagang mapapawi ang takot at pagdududa, hindi na kailangan ng anumang pa-ayuda o raffle na bongga.

Health workers, mas may laban na kontra-COVID-19

@Editorial | May 27, 2021

Umabot na sa 85 porsiyento ng health workers sa buong bansa ang nabakunahan na kontra-COVID-19.

Ang nalalabing 15% na hindi pa natuturukan ay pawang mga barangay health workers at miyembro ng barangay health response team sa mga probinsiya at rehiyon na nag-aatubili pa umanong magpabakuna.

Kaya patuloy pa ang paghikayat sa kanila na magpabakuna na. Mahirap nga naman magkumbinse ng ating mga kababayan na magpabakuna kung sila mismong health workers ay tumatanggi sa iba’t ibang kadahilanan.

Samantala, magandang bagay na umabot na sa 85% ang mga naturukang doktor, nurse at ibang nasa kanilang hanay, dahil masasabing mas may laban na sila sa pandemyang ito.

Batid naman natin na sila ang nagsisilbi nating pananggalan kontra-COVID-19. Kailangang masiguro na sila rin ay napoproteksiyunan laban sa anumang banta sa kanilang kalusugan.

Sana’y hindi lang itong bakuna ang kanilang matanggap, kundi lahat ng benepisyo, bilang pasasalamat sa kanilang kabayanihan.

Wala na sanang isyu kaugnay sa umano’y mabagal at napakaliit na suweldo. Maunawaan sana lalo na ng ating gobyerno na hindi biro ang kanilang pinagdaraanan.

Lahat ng puwedeng makagaan sa kanilang pakiramdam o pamumuhay ay ibigay na, dahil walang katumbas ang kanilang sakripisyo ngayong pandemya.

Mga kabataang pasaway sa curfew at magulang na walang pakialam, sampolan!

@Editorial | May 26, 2021

Ilang videos ang kumakalat online kung saan mapapanood ang ilang kabataan na nagpapasaway sa gitna ng banta ng COVID-19.

Sa isang video, makikita sa kalsada ang nagra-riot na magkaibang grupo ng mga kabataan — nagbabatuhan ng bote, naghahabulan at walang pakialam kung may madamay.

Habang sa isang ulat, ilang kabataan ang nahuli namang nagba-volleyball kahit na umiiral ang curfew.

Nagawa pa umano nilang batuhin ng bote ang mga awtoridad na nanita sa kanila.

Bukod sa paglabag sa curfew, wala ring face mask o mali ang pagkakasuot at dedma na rin sa social distancing. Sa video, makikita na nagtatago sa eskinita ang mga ito tuwing may dadaang police mobile.

Ang unang tanong, nasaan ang magulang ng mga menor-de-edad na ito? Paano nakalalabas ng bahay at nakakapamerhuwsiyo? Tila hindi sila natatakot sa banta ng nakamamatay na COVID-19.

Marahil ay kailangan ng mas mabigat na parusa, lalo na sa mga magulang na sila dapat ang responsable sa kanilang mga anak.

Hindi na siguro uubra ‘yung puro sermon na lang sa barangay dahil ‘pag pinauwi na ang mga ‘yan, babalik na naman sa lansangan at gagawa ng gulo.