Mga pasaway sa hanay ng kapulisan, out!

@Editorial | June 05, 2021

Kontrobersiyal na naman ang hanay ng kapulisan sa mga panahong ito.

Matapos ang insidente ng pagpatay ng isang pulis sa isang ginang, pagkakasangkot sa scam at panghuhulidap, isa namang parak ang nasangkot sa walang kamatayang pangongotong.

Agad na dinisarmahan ang pulis na sinasabing sangkot sa pangongolekta ng pera mula sa mga nagdaraang truck drivers. Sa probinsiya nagaganap ang operasyon at batid naman natin na talamak din ‘yan sa ilang lungsod sa Metro Manila.

Sa kabila ng todo-kayod na maiangat ang kapulisan at malinis ang bahid ng anumang uri ng krimen, talagang may mga pasaway pa rin na binababoy ang kanilang uniporme.

Marahil ay nagiging maluwag o kampante ang ahensiya sa kanilang mga tauhan. May mga puna rin na tila napakadali nang maging pulis. Tipong kahit sino ay puwede pero ang problema, ‘pag nakauniporme at may kapangyarihan na, eh, nakakalimot na sa sarili.

Panahon na para maghigpit sa hanay ng kapulisan para walang nakakalusot na bulok na puwedeng makahawa sa iba.

Ngayon pa naman ang panahon na mas kailangan ang inyong serisyo at proteksiyon. Halos araw-araw ay may nagaganap na karumal-dumal na krimen. Ang masaklap, kabaro n’yo pa ang sangkot.

Panawagan sa pamunuan ng Philippine National Police (PNP), kumustahin sana ang bawat pulis kung sila ba’y nararapat pa bilang mga alagad ng batas.

Incentives para sa health workers, ibigay nang tama

@Editorial | June 04, 2021

May reklamong ipinarating sa kinauukulan kaugnay sa hindi pagbibigay ng tamang incentives sa mga health workers sa ilang ospital.

Ayon sa sumbong, food items umano ang ibinibigay sa mga health workers imbes na cash incentives.

Napag-alamang nasa P40, 000 cash incentives ang inaasahan ng mga health workers sa mga ospital na ito subalit, sa halip ay bigas at groceries ang kanilang natanggap.

Batay sa Bayanihan 2 Law, ang bawat health personnel ay entitled na magkaroon ng buwanang risk allowance bukod pa sa kanilang hazard pay at iba pang benepisyo.

Ilang buwan na rin umanong delayed ang additional compensation na ito, pero sa halip na cash ay in kind pa ang ibinigay sa mga health workers na buwis-buhay sa pagseserbisyo sa gitna ng pandemya.

Ito ay malinaw na paglabag sa batas, kaya sa mga nasa likod ng ganitong uri ng pang-aabuso, tigilan n’yo na. Mahiya naman kayo sa mga health workers na mas pinipiling manatili sa paglilingkod sa kabila ng napakaraming hamon at kakulangan.

Kaya hindi na rin nakapagtatakang may ibang health workers ang napipilitang mag-abroad dahil sa mga hindi makatarungang pagtrato tulad nito.

Alagaan natin ang mga kababayan nating handang magsakripisyo at magbuwis ng buhay alang-alang sa kapakanan ng buong bayan. ‘Yung mga abusado, makasarili at walang magandang ambag sa lipunan, makonsensiya naman kayo.

Dagdag-pensiyon sa mahihirap, ‘wag nang patagalin pa

@Editorial | June 03, 2021

Inaasahang malapit nang makalusot sa Kongreso ang panukalang itaas sa P1, 000 ang buwanang pensiyon na natatanggap ng mahihirap na senior citizens.

Ito ay matapos na umusad sa Kamara ang dagdag-P500 sa pensiyon at inaasahang kapag umabot na sa Senado ay agad din itong makalulusot dahil sa nakahaing kahalintulad na panukala.

Kapag naging ganap na batas, mahigit 3 milyong senior citizens ang makikinabang.

May mga nagsasabi na maliit ang halagang P500 para sa mga pangangailangan ng mga nakatatanda, lalo na ngayong nasa gitna ng pandemya at sila ang higit na nangangailangan ng proteksiyon at pag-aalaga.

Kailangang naaalalayan ang kanilang mga pangangailangan mula sa masusustansiyang pagkain hanggang sa mga gamot.

Bagama’t ilang buwan umanong inilaban ang P500 dagdag-pensiyon, masaya na rin ang ibang seniors dahil may aasahang dagdag-tulong.

Para sa atin, tama lang naman na pagtuunan ng pansin ang ating mga nakatatanda dahil utang natin sa kanila ang kasalukuyan at sila ang magsisilbi nating gabay para sa ating hinaharap.

Sila ang mga magulang na nagtaguyod sa kanilang mga anak para maging pag-asa ng bayan. Sila rin ang mga dating manggagawa na nagpatatag sa ating ekonomiya.

Panahon na para tayo naman ang magbigay sa kanila ng pangangalaga at seguridad.

Lahat ng benepisyo na puwedeng ibigay ay ibigay na, huwag na natin silang pahirapan o paghintayin pa.