Kasong murder sa COVID positive na pagala-gala, epektib kaya?

@Editorial | June 09, 2021

Matindi ang babala ni Pangulong Rodrigo Duterte sa sinumang positibo sa COVID-19 na pagala-gala.

Kaugnay ito sa pagsang-ayon ng Pangulo sa panukala ni Chief Presidential Legal Counsel Salvador Panelo na maaaring makasuhan ng murder ang indibidwal na patuloy na gumagala kahit alam nang positibo sa nakahahawa at nakamamatay na sakit.

Ayon sa Pangulo, kung hindi man murder, puwedeng kasong reckless imprudence.

Marahil ang isipin ng iba ay OA naman na murder agad? Pero ‘ika nga ni Panelo, kung sinadya ang paggala sa kabila ng pagiging banta sa buhay ng ibang tao, uubra ang kasong murder.

Halimbawa, isang positive sa COVID ang pumunta sa isang lugar, alam niyang may sakit siya at nakahawa siya at namatay, ito umano’y sadyang pagpatay.

Matatandaang una nang sinabi ng Pangulo na maghahanap siya ng batas na maaaring ikaso laban sa indibidwal na matigas ang ulo at hindi sumusunod sa health protocols na itinakda ng pamahalaan laban sa COVID-19, maaaring ito na ‘yun.

Kaya sa mga pasaway d’yan, kung hindi pa rin kayo naniniwala sa COVID at walang pakialam sa sariling buhay, huwag na kayong mandamay.

Tumataas na naman ang kaso ng nagpopositibo sa COVID-19, para bang sinasabay sa pagdating ng mga bakuna.

Huwag nating abusuhin ang pagluluwag ng community quarantine dahil hindi pa ito nangangahulugang tuluyan na tayong ligtas sa banta ng COVID, sadyang kailangan lang para sa ekonomiya dahil mahirap naman na buhay tayo mula sa virus, pero tigok naman sa gutom.

Muli, paalala sa mga nagpositibo sa COVID-19, may sintomas man o wala, tiis-tiis muna at sakripisyo hanggang sa tuluyan nang gumaling.

Hangga’t may isang positibo, hindi pa tayo safe, kaya lahat ay dapat na makipagtulungan at maging disiplinado.

Mga Pinoy, todo-asa sa mas masayang Pasko ngayong may bakuna na

@Editorial | June 08, 2021

Umarangkada na ang pagbabakuna kontra-COVID-19 sa mga essential workers mula sa public at private sector na nasa A4 priority list.

Tinukoy ng National Economic and Development Authority (NEDA) na nasa 35.5 milyon ang target na mabakunahan sa ilalim ng A4 priority group makaraang simplehan kung sinu-sino ang kabilang dito.

Sa ilalim ng Inter-Agency Task Force for the Management of Emerging Infectious Diseases (IATFEID) Resolution No. 117, ang mga eligible sa A4 group ay ang mga manggagawa na pisikal na nagtutungo sa lugar ng trabaho sa labas ng bahay, mga empleyado sa mga ahensiya ng pamahalaan at informal workers at self-employed na kailangang lumabas ng mga bahay.

Kaugnay nito, tinatayang milyong doses ng bakuna ang matatanggap ng Pilipinas sa third quarter ng taon. Kung saan, 1.17 milyong doses ng AstraZeneca ang darating sa Hulyo at Agosto.

Darating na rin ang Moderna mula sa Amerika pati na ang Novovax at Covaxin mula sa India.

Target ng pamahalaan na makamit ang herd immunity sa Metro Manila at iba pang probinsiya bago pa man matapos ang taong kasalukuyan.

Kaya patuloy ang paghikayat sa publiko na magpabakuna na lalo na silang mga nasa A1 hanggang A3 categories. Kaugnay nito, inihihirit na rin sa mga opisyal sa local government units (LGUs) na dalhin na nang direkta ang mga bakuna sa kanilang mga nasasakupan na bahagi ng priority groups na babakunahan.

Hindi maitatangging may mga kababayan tayo na bukod sa mahilig sa last minute, eh, mas gusto na sila ang nilalapitan.

Gayunman, tulad ng palaging sinasabi, hindi sapilitan ang pagpapabakuna, karapatan nating tumanggi kung sa palagay natin ay hindi ito katanggap-tanggap pero, dapat din tayong maging bukas sa impormasyon na posibleng makapagpabago ng isip at higit na makapagbibigay ng kapanatagan sa ating kalooban.

Samantala, habang nagdaratingan ang mga bakuna, umaasa naman ang mga nabakunahan na magiging mas masaya ang Pasko ngayong taon dahil kahit paano ay may laban na sa virus.

Mga gamit na face mask, itapon nang maayos para iwas-problema ngayong tag-ulan

@Editorial | June 07, 2021

Nagsimula na ang tag-ulan, kasabay nito ang paalala sa publiko na mag-ingat at sana’y hindi naman grabe ang maging dala ng pag-ulan.

Isa sa mga inaalala ay ang tila walang kamatayang pagbaha na isa sa mga nakikitang ugat ay basura.

Kapansin-pansing marami pa rin ang walang disiplina sa pagtatapon ng basura. Simpleng gawain pero, hirap sundin ng iba.

Samu’t saring bagay ang itinatapon kung saan-saan na babara na naman sa mga daluyan ng tubig. Dagdag na itong mga facemask na gamit na gamit ngayong pandemya. Madalas tayong may makitang mask na nakakalat sa kalsada, sa kabila ng paalala na itapon ito nang maayos dahil maaari rin maging banta ng lalong pagkalat ng virus. Kumbaga, hindi sa pagsusuot ng facemask natatapos ang ating responsibilidad sa gitnan ng pandemic, kundi hanggang sa wastong pagtatapon ng mga ito.

Ngayon, kung may mga burara pagdating sa bagay na ‘to, tiyak na dagdag ‘yan sa basura ngayong tag-ulan na posibleng dagdag-bara na lalong magpapagrabe sa pagbaha.

Una na ring ipinaliwanag na ang responsableng pagtatapon ng mga gamit na disposable face masks ay makaiiwas sa panganib na puwedeng maidulot nito sa terrestrial and aquatic animals.

Hindi lang mga sarili natin ang dapat na protektahan kundi maging ang lahat nang may buhay.

Mga magulang, turuan natin ang mga bata na maging responsable at disiplinado pero una sa lahat, tayo muna ang magsilbing ehemplo para sa kanila.