Mahihirap tuturukan na, “walang bakuna, walang ayuda”, matuloy kaya?

@Editorial | June 14, 2021

Maaari nang simulan ang pagbabakuna kontra-COVID-19 sa indigent population o mga kasama sa kategorya ng A5, gamit ang mga bakunang ibinigay ng COVAX facility.

Kabilang sa kategoryang ito ay ang mga benepisaryo ng Pantawid Pamilyang Pilipino Program o 4Ps.

Matatandaang una nang naging kontrobersiyal ang hirit ni Presidential Spokesperson Harry Roque, na walang ayuda sa mga ayaw magpabakuna.

At ngayon ngang aarangkada na ang turukan sa mahihirap, inaabangan kung matutuloy din kaya ang nasabing kondisyon.

May mga pumapalag at naniniwalang mali ito at lumalabas na sapilitan ang pagbabakuna, tipong walang pagpipilian kundi ang magpaturok kahit labag sa kalooban, alang-alang sa tulong mula sa gobyerno.

At siguro naman, sa ilang araw na lumipas at marami na ang nagpapabakuna, kahit paano silang mga natatakot ay nakumbinse na rin at hindi na kailangan ng kung anu-anong kondisyon o kapalit, lalo na kung naipaliwanag na nang malinaw ang kahalagahan nito.

Sa anumang usapin, hindi kailangan ng pananakot o panggigipit, ang maayos na pagpapaliwanag ay sapat na para magkaintindihan at magkaroon ng tiwala, lalo na sa mga isyu sa bayan.

Kalayaan sa COVID-19, kalayaan sa kahirapan

@Editorial | June 12, 2021

Ipinagdiriwang natin ngayon ang ika-123 anibersaryo ng proklamasyon ng Araw ng Kalayaan.

Samantala, tila paglaya rin ang natanggap ng ating mga lolo’t lola matapos payagang makalabas na ng bahay sa gitna ng pandemya.

Ayon sa Inter-Agency Task Force, ang mga fully-vaccinated senior citizens na nasa lugar ng general community quarantine at modified GCQ ay puwede nang lumabas.

Kailangan lamang nilang magpresenta ng duly issued na COVID-19 vaccination card, at siyempre, dapat pa rin silang sumunod sa minimum public health standards habang nasa labas.

Gayunman, limitado pa rin ang paggalaw ng mga seniors sa kanilang zone lamang at ipinagbabawal pa rin ang interzonal travel, maliban na lamang sa point-to-point travel na una nang pinayagan ng IATF.

Marami ang natuwa dahil makakawala na sa apat na sulok ng kanilang bahay at may makikita nang ibang tao at mga bagay.

Ang paalala lang, huwag maging kampante, palaging mag-ingat hindi lamang sa banta ng COVID-19, kundi ng iba pang sakit. Sa atin namang nakababata, palaging alalayan ang mga nakatatanda na hindi sila malagay sa alanganin sakaling nasa labas. Tulungan natin silang maging kumportable at ligtas sa mga lugar na kanilang pinupuntahan.

Ngayong Araw ng Kalayaan, wala naman tayong ibang hangad kundi ang tuluyan nang makalaya sa pandemya at makabawi sa idinulot na kahirapan.

Maniwala tayong malalagpasan din natin ang sitwasyong ito at sabay-sabay tayong lalaya.

2nd dose ng bakuna, ipaalala kina lolo’t lola

@Editorial | June 11, 2021

Patuloy ang panawagan sa mga nagpaturok ng 1st dose ng bakuna kontra-COVID-19 na balikan ang 2nd dose para maging ganap ang proteksiyon.

Partikular ang ating mga senior citizens na tila nakalimutan nang bumalik.

Base sa datos, kabilang ang mga lolo’t lola sa mahigit isang milyong naturukan ng first dose na hindi na nagpaturok ng kanilang second dose.

Pagtitiyak ng Department of Health, kahit hindi nakapunta sa takdang schedule, puwede pa ring magpabakuna, ang mahalaga ay bumalik.

Napakahalagang fully vaccinated ang mga nasa priority groups sa katuwiran na bukod sa kalusugan, ito ang magiging daan para muling mapasigla ang ekonomiya ng bansa.

Samantala, patuloy din ang panawagan sa gobyerno na payagan na ang mga fully vaccinated seniors na makalabas na ng kanilang bahay. Anila, kung ‘yung iba na hindi pa nababakunahan, may comorbidity man o wala ay nakalalabas na, eh, bakit daw naman ang mga fully vaccinated seniors na nagtiwala sa siyensiya ng pagpapabakuna at sumusunod sa health protocols ay pinagbabawalan?

Siguro, kaunting tiis lang at makalalabas din ang lahat. Sa ngayon, unawain at sundin muna natin ang mga dapat gawin laban sa virus para tuluyang makontrol ang sitwasyon.

Lahat naman tayo ay naghahangad na maging maayos na ang lahat, pero hangga’t may natitirang pasaway, talagang damay-damay ‘to.

Kaya ang pakiusap, simulan sa sarili ang pagiging mabuting ehemplo. Kung nakikita nila na tayo’y responsable at disiplinado, kahit paano ay tatablan din sila ng hiya.

Muli, sa mga medyo nakalilimot sa bakuna, bumalik na tayo para tuluy-tuloy ang ating pag-usad sa new normal.