Dagdag-contact tracers, dagdag-gastos lang kung marami pa rin ang pasaway

@Editorial | June 22, 2021

Humirit ang Metro Manila Council (MMC) ng 5,000 contact tracers bilang paghahanda sa Delta variant ng COVID-19 sa National Capital Region (NCR).

Bukod sa nasabing karagdagang contact tracers, dapat tuloy din umano ang swabbing, testing at isolation. Ganundin ang pagpapatupad ng istriktong border controls para masawata ang Delta variant.

Ang tanong, epektibo pa rin kaya ang contact tracing kung sinasabayan ng mga pasaway sa health protocols?

Batid natin ang kahalagahan ng pagtukoy sa mga posibleng nahawaan ng COVID-19 dahil sa pamamagitan nito ay nakokontrol ang pagkalat ng virus. ‘Pag tukoy na ang mga posibleng nahawaan ng virus, mas madali ring mapagtutuunan ng pansin ang mga pasyenteng maaaring malagay sa mas alanganing sitwasyon.

Ang problema, kapansin-pansin ngayon na habang lumuluwag ang community quarantine ay tila nagiging pasaway na ang publiko. Marami na ang nakakalimot sa pagsunod sa mga protocols laban sa COVID-19.

Noong Father’s Day lang, sa kabila ng ipinagbabawal ang paglabas sa mga bata, ‘yun at naispatang namamasyal at wala pang suot na facemask.

May mga nahuli pang nagpa-party sa loob at labas ng bahay — dikit-dikit, iisa ang tagayan, share-share sa pulutan, malalang party talaga na para bang walang virus sa paligid.

Kung ganito ang eksena at palaging may magpopositibo at poproblemahin na naman ng gobyerno kung paano sila isa-isang tutuntunin, gagamutin at bibigyan ng maayos na quarantine facility, ano nang mangyayari? Ito ba ang ‘new normal’? Kawawa naman ang mga susunod na henerasyon.

Mga Pinoy, na-excite sa “no-mask Christmas”

@Editorial | June 19, 2021

Nasabik ang mga Pinoy sa sinabi ng mga eksperto na kayang makamit ng bansa ang tinatawag ng “no-mask Christmas” kapag malaking bahagi ng populasyon ng bansa ang naturukan na ng bakuna laban sa COVID-19.

Ayon kay OCTA Research member at University of Santo Tomas biological sciences professor Father Nicanor Austriaco, kailangan ng 33 milyon doses ng COVID-19 vaccine para mapigilan ang virus at ang 52 milyong doses naman ay para makamit ang herd immunity.

Kapag nakamit ang herd immunity sa National Capital Region (NCR) Plus 8 na kinabibilangan ng Bulacan, Cavite, Laguna, Rizal, Laguna, Batangas, Pampanga, Metro Cebu at Metro Davao ay mapoprotektahan na umano ang natitirang bahagi ng bansa.

Base rin sa kanilang ginawang kalkulasyon na kapag mayroong 250K katao ang nababakunahan kada araw ay mapipigilan ang virus sa Oktubre at makakamit ang herd immunity sa Nobyembre.

Malaki rin ang tiwala ng Palasyo na madaling makakamit ang no-mask Christmas.

Sa ngayon, kapansin-pansing dinaragsa na ang mga pila ng pagbabakuna. May mga senior citizens na kusa nang nagpapasama sa mga anak para maturukan. Tila nawala na umano ang pangamba sa bakuna at ang iniisip ay kung paano maging protektado sa sakit.

Nagkaroon na rin ng pagkakataon ang ibang essential workers na walang oras magpabakuna sa araw sa pamamagitan ng inilunsad na “Bakuna Nights”.

Kaya inaasahang maaabot ang target sa Pasko, ang goodbye face mask na.

Sa ngayon, huwag munang atat, laging pa ring sumunod sa mga health protocols at huwag nang pasaway.

Ilegal na droga, sumasabay pa sa pagkalat ng COVID

@Editorial | June 17, 2021

Sa gitna ng kinahaharap pa ring pandemya dulot ng COVID-19, kapansin-pansing talamak na naman ang ilegal na droga.

Kamakailan lang nang makakumpiska ng mahigit P1 bilyong halaga ng shabu sa dalawang magkahiwalay na operasyon sa Cavite at Parañaque City. Bukod pa rito ang milyun-milyong nauna nang nasabat sa iba’t ibang lugar sa bansa. Halos araw-araw ding may nahuhuling tulak sa gilid-gilid at may mga naaaktuhang gumagamit.

Pati delivery riders, nagagamit din sa kalakaran, ang masaklap ay maging ang iba sa kanila ay ginagawa na ring sideline ang pagtutulak.

Sa nabanggit na P1 bilyong shabu, dalawang bigtime Chinese drug traffickers ang naaresto. Kaugnay nito, nagbaba ng direktiba ang Philippine National Police (PNP) sa PNP-Drug Enforcement Group (PDEG) na makipag-ugnayan sa Philippine Drug Enforcement Agency (PDEA) para hilingin ang pag-apruba ng korte sa agarang pagwasak sa nasabing ilegal na droga.

Dapat lang na sirain agad ang mga nakukumpiskang droga upang maalis ang duda ng taumbayan na nare-recycle lang ang mga ito. Matatandaang, mismong mga pulis ang nasasangkot sa ganitong gawain na binabansagang ‘ninja cops’.

Nakapanlulumo dahil sa kabila ng pandemya, wala pa ring patawad ang mga nagpapakalat ng ilegal na droga na sumisira sa buhay ng marami. Habang tumataas ang bilang ng nagkaka-COVID, ganundin ang mga insidente na may kinalaman sa pagtutulak at paggamit ng drugs.

Kaya malaking hamon ito sa mga awtoridad, ito ang virus na hindi mamatay-matay, sa halip lalo pang kumakalat at matindi kung mangwasak.