Paalam, ex-P-Noy

@Editorial | June 25, 2021

Sa edad na 61, pumanaw na ang dating pangulo na si Benigno Simeon “Noynoy” Aquino III.

Una nang kinumpirma ng isang miyembro ng Pamilya Aquino at ilang malalapit na kaibigan ang pagpanaw ni ex-P-Noy sa Capitol Medical Center.

Renal disease secondary to diabetes umano ang sanhi ng pagkamatay ng dating pangulo.

“He died peacefully in his sleep,” pahayag ng kanyang kapatid na si Pinky.

Si Aquino ay ang ika-15 pangulo ng bansa na nagsilbi mula 2010 hanggang 2016.

Sa kanyang inaugural speech sa Quirino Grandstand, tumatak sa sambayanan ang sinabi niyang, “kayo ang boss ko!”, gayundin ang pagbabawal niya sa wang-wang na aniya’y inaabuso ng ilang taga-gobyerno para makalusot sa trapiko. Ang tagline ng kanyang administrasyon ay ‘Daang Matuwid’.

Kaugnay nito, inilagay sa half-mast ang bandila sa Palace compound, na bahagi ng pakikidalamhati ng Malacañang. Pinasalamatan ng Palasyo ang yumaong pangulo sa paglilingkod nito sa bansa at mamamayang Filipino, gayundin din sa mga naging kontribusyon nito bilang halal na opisyal.

Masasabing naging makulay at kontrobersiyal ang anim na taon sa panahon ni ex-P-Noy, pero ‘ika nga, naging bahagi ito ng ating kasaysayan. Tulad ng iba pang mga nagdaang administrasyon, bagama’t may mga hindi pagkakaunawaan dahil sa magkakaibang paniniwala o prinsipyo, palagi naman itong may iniiwan na aral, na sana’y pinupulot natin para magamit sa mga susunod na panahon.

“Taos-pusong pakikiramay sa naulilang pamilya ni dating Pangulong Aqunio. Paalam at maraming salamat, P-Noy.”

Mga epalitiko, kani-kanya nang diskarte para sa 2022, mahiya naman kayo!

@Editorial | June 24, 2021

Ilang tulog na lang ay Eleksyon 2022 na, tiyak hindi na nagkakatulog ang mga nag-aambisyon sa puwesto.

Ngayon pa lang, kani-kanya nang diskarte ang mga pulitiko at partido kung paano magpapapansin sa publiko. Ang masaklap, nasa gitna pa tayo ng pandemya, pamumulitika na ang inaatupag.

Sa social media, amoy na amoy ang kampanya. Kaliwa’t kanan ang talakan, tinetesting kung sino ang magiging mabenta o kung sino ang lalangawin sa balota. Unti-unti na namang nahahati ang taumbayan, naglilitawan ang iba’t ibang kulay na nauuwi sa away.

Kapansin-pansin din ang galawan ng mga papogi. Nagsisibaba sa mga barangay, todo-kausap sa mahihirap, sabay-abot ng kung anu-ano, kulang na lang sabihin na siya ang iboto sa 2022, kapal! Sila ‘yung mga madali raw lapitan pero mahirap naman hanapin. Tipong sa kampanya lang makikita pero buong termino kahit paramdam wala.

May pandemya, ganyan pa rin ang istayl n’yo? Bulok!

Kaya ang paalala sa taumbayan, maging mas matalino at bantayan ang diskarte ng mga epal na ‘to. Tiyak na gagamitin ng mga kapalmuks ang sitwasyon na marami ang nangangailangan.

Ngayon ang panahon na mas dapat nating makilatis nang todo kung sino ang mga karapat-dapat na mamuno sa ating bayan.

‘Yung mga patulug-tulog sa pansitan, walang pakialam sa mga nangyayari sa gitna ng pandemic, mga pasimuno sa pagpapasaway, ekis na ‘yan!

Bakuna o kulong?

@Editorial | June 23, 2021

Mabigat ang naging babala sa mga ayaw pa ring magpabakuna kontra-COVID-19.

Ayon kay Pangulong Rodrigo Duterte, ipaaaresto ang matitigas ang ulo at tatangging magpabakuna.

Utos ng Pangulo sa Department of the Interior and Local Government at mga opisyal ng barangay, ilista ang mga matitigas ang ulo at ayaw magpabakuna.

Aniya pa, kung ayaw magpa-vaccine ng indibidwal, mas makabubuting lumayas na lamang ng Pilipinas at magtungo sa India o Amerika.

Nadidismaya ang Pangulo, dahil kung sino pa umano ang ayaw magpabakuna ang siya pang kadalasan ay carrier ng virus.

Marahil ang tinutukoy ng Punong Ehekutibo ay silang mga pasaway na hindi na nga naniniwala sa virus at vaccine, hindi pa sumusunod sa mga health protocols.

Matatandaang, mismong si Pangulong Duterte ang nagsabi noon na hindi sapilitan ang pagbabakuna subalit, iba na kasi ang sitwasyon, tayo’y nasa gitna ng pandemya at mayroong national emergency. Itong mga bakuna ang isa sa masasabing malaking tulong upang maprotektahan ang isa’t isa. Tulad ng palaging sinasabi ng mga awtoridad, hangga’t hindi makakamit ang herd immunity ng lahat ng bansa sa mundo, hindi magiging tunay na ligtas ang lahat.

Itong babala ng Pangulo na kulong sa mga ayaw magpabakuna, mismong ang pamunuan ng Department of Justice na ang nagsabi na walang batas na sumasakop sa ganitong kautusan. Marahil, ang gusto lang iparating ng Pangulo ay kasing halaga ng kalayaan ang pagpapabakuna — ang buhay at kalayaan ay iisa.