Bulkang Taal nag-aalboroto na naman, ingat!

@Editorial | July 03, 2021

Muli na namang nagparamdam ang Bulkang Taal.

Kasunod ng pag-aalboroto nito, agad namang itinaas ng Philippine Institute of Volcanology and Seismology (Phivolcs) sa Alert Level 3 ang Bulkang Taal.

Kasabay ang mas mahigpit na pagmo-monitor ng mga awtoridad.

Samantala, aabot sa P12.4 milyong halaga ng ayuda ang nakaantabay na para ipamahagi sa mga apektadong residente sa Laurel at Agoncillo at iba pang kalapit na munisipalidad sa Batangas.

Sa naturang halaga, P1.4 milyon ang nakalaan para sa food packs habang P11 milyon naman para sa non-food items.

Naka-heightened alert status na rin ang Department of Social Welfare and Development (DSWD) Region 4-A.

Activated na rin ang Joint Task Force Taal ng Armed Forces of the Philippines Southern Luzon Command para tulungan ang operasyon ng Regional Disaster Risk Reduction and Management Council at iba pang local government units.

Nakaalerto na rin ang Philippine National Police sa Region 4-A (CALABARZON) at nakikipag-ugnayan na sa mga residente.

Ang mga sasakyan at tauhan ang Philippine Coast Guard (PCG) Logistics Systems Command ay naka-deploy na rin para alalayan ang PCG District Southern Tagalog sa pagsasagawa ng humanitarian assistance at disaster relief operations.

Kapansin-pansin na talagang natuto na ang ating mga kababayan at maging ang gobyerno sa pagharap sa mga ganitong ganap. Talagang nagiging mas maagap, maingat, alerto at sistematiko na sa bawat gawal.

Sana ay hindi magdulot ng matinding pinsala ang pag-aalboroto ng bulkan, dahil batid naman nating marami pa rin ang halos nagsisimula pa lang bumangon mula sa naganap na pagsabog noong nakaraang taon.

Ang pinakamainam pa ring gawin ay magdasal at maging mas matatag, tulad n gating ginagawa sa gitna ng pandemya na ngayo’y unti-unti na nating nakokontrol.

‘Pinas, unti-unti nang lumalaya sa pandemya

@Editorial | July 02, 2021

Good news ang hatid ng buwan ng Hulyo.

Ayon sa Department of Health (DOH), nailagay na sa “low risk classification” ang Pilipinas kaugnay sa COVID-19 cases.

Batay sa DOH Epidemiology Bureau, ito ay dahil sa negative growth rate ng mga kaso gayundin ang mababang average daily attack rate o ADAR.

Nakapagtala umano ng negative 9 percent growth rate sa bansa sa huling dalawang linggo, kumpara sa 15% growth rate sa mga nakalipas na tatlo hanggang apat na linggo.

Samantala, ang ADAR sa bawat 100,000 populasyon sa nakalipas na dalawang linggo ay nasa 5.42 na mababa sa sinundan na 5.96.

Ikinukonsiderang “high risk” kapag umabot sa 7 per 100,000 population ang ADAR.

Masasabing magandang senyales ito sa papasok na Kapaskuhan, nakakagaan ng pakiramdam at makapagbibigay ng positibong pananawa sa bawat isa.

Ito na ang bunga ng pag-iingat at disiplina ng bawat isa. ‘Ika nga, maaaring nariyan na ang COVID-19 at hindi na mawawala, ang tanging magagawa natin ay sabayan ang sitwasyon.

Sa haba ng panahon na nakikipaglaban tayo sa nakamamatay na virus, siguro naman ay marami na tayong natutunan. Mula sa pag-aalaga sa ating kalusugan hanggang sa pag-iingat sa ating mga mahal sa buhay.

Samantala, ngayong low risk na ang bansa sa COVID-19, huwag sana itong maging dahilan para magpakampante at magpabaya. Tuloy lang sa pagsunod sa mga health protocols at mas maging maingat, responsable at disiplinado.

Utang na allowances at benefits sa mga health workers, ibigay na

@Editorial | June 26, 2021

Binigyan na ng ultimatum ang mga ahensiya ng gobyerno na sinasabing may utang na allowances at benefits sa mga healthcare workers.

Napag-alamang hanggang sa katapusan na lamang ng kasalukuyang buwan ang Bayanihan 2, na napaglaanan ng budget para sa mga health workers.

Batid naman nating pinaghirapan ng Kongreso na maipasa ang batas at isinama sa pondo ang mga benepisyo para sa mga frontliners.

Kahit man lang sa pamamagitan nito ay mapasalamatan at mabigyang-pagkilala ang mga serbisyo at sakripisyo ng mga nangangalaga sa kalusugan ng bayan, lalo na ngayong may pandemya — literal na buhay ang kanilang iniaalay.

Matatandaang kinondena ng mga healthcare workers ang hindi pa rin pagbibigay sa kanila ng allowances at dagdag-benepisyo at anila hindi katanggap-tanggap ang pagdadahilan na ang kanilang pera ay nagastos sa mga ibang bagay para sa pagtugon sa pandemya.

Sana, itong ultimatum na ibinigay ng Kongreso ay maging malinaw sa mga kinauukulan na ibigay na ang nararapat lalo na’t dumaan ito sa proseso.

Ano’ng silbi ng mga gamot o kagamitan kung wala namang mga nurse o doktor? Puwede ba ‘yang basta na lang gamitin ng mga pasyente?

Huwag nang hintaying tuluyan nang magsipaglayasan ang mga health workers, dahil mas matinding problema ‘yan ‘pag nagkataon.