Moderno at bagong air assets ng AFP, dapat nang pondohan

@Editorial | July 07, 2021

Kaugnay pa rin sa pagbagsak ng C-130 transport plane ng Philippine Air Force (PAF) sa Patikul, Sulu, may mga panawagan na pabilisin ang modernisasyon sa puwersang panghimpapawid ng bansa.

Apela ng mga mambabatas at maging ng mamamayan sa gobyerno, maghanap ng pondo para bumili ng mga moderno at bagong aircrafts nang mapalitan na ang lumang air assets ng PAF.

Bukod sa mga sasakyan at kagamitan, dapat ding mas matutukan ang mismong training ng mga piloto para sa lahat ng uri ng aircrafts.

Nakapanlulumo na mahigit 50 buhay ang biglang nawala sa isang iglap.

Bagama’t, batid nila na sila’y patungo sa lugar na maaari silang mapahamak, baon pa rin nila ang pag-asa na makakauwi sa kani-kanilang pamilya nang buhay. Hanggang sa mangyari ang insidente at wala nang pagkakataong makabalik pa. Sana’y maiwasan na ang mga ganitong trahedya.

Batid nating walang makapagsasabi kung hanggang kailan ang buhay o sa kung ano’ng paraan ito babawiin, pero dapat pa rin nating ingatan at pahalagan dahil ito’y ipinagkatiwala Niya sa atin.

Mas malalim na imbestigasyon sa pagbagsak ng eroplano ng Air Force

@Editorial | July 06, 2021

Kasunod ng pagbagsak ng C130 cargo aircraft ng Philippine Air Force (PAF) sa Sulu, na ikinamatay ng halos 50 katao na karamihan ay mga sundalo, bumuo na ng probe team ang Armed Forces of the Philippines (AFP).

Ang team ay binubuo ng mga technical experts at piloto na nagmula sa Air Mobility Command ng PAF. Sila ang aalam sa dahilan ng pagbagsak ng nasabing eroplano.

Napag-alamang ang AFP ay mayroong apat na C130, maliban sa nasabing bumagsak, isa ang grounded ngayon at dalawa naman ang nire-repair sa Portugal at isa pa ang nakatakdang i-deliver.

Samantala, batay sa ulat, ito na ang ikatlong insidente ng pagbagsak ng eroplano ng military sa taong ito. Nitong Enero, isang helicopter ang bumagsak at nasundan nitong Hunyo.

Marami ang nagtatanong, ano’ng nangyayari sa mga eroplano ng gobyerno? Nasaan ang problema? Bagay na dapat mas matutukan dahil kung mauulit lang nang mauulit ay talagang maraming buhay ang masasayang.

Ang panawagan naman sa taumbayan lalo na sa mga netizens, huwag manggulo. Tigilan ang pagpapakalat ng fake news, hindi na nga nakatutulong dagdag-problema pa.

Hayaan nating ang mga awtoridad ang mismong mag-imbestiga at gumawa ng malinaw na paliwanag sa mga insidente.

Sa mga hindi naman intensiyong magpakalat ng fake news, kung hindi sigurado sa mga nababasa online, huwag nang i-share.

Napakabigat na ng pinagdaraanan ng pamilya ng mga nasawi sa insidente, huwag nang dagdagan pa.

Ibinulgar na nawawalang bilyun-bilyong pisong ayuda, talupan!

@Editorial | July 05, 2021

Nasaan ang P10.4 bilyong pondo ng Social Amelioration Program (SAP)?

Ayon sa isang mambabatas, ang nakakalulang halaga ay nawawala at dapat ipaliwanag.

Agad namang sumagot ang ahensiyang namamahala, ang Department of Social Welfare and Development (DSWD), na handa silang humarap sa anumang imbestigasyon hinggil sa umano’y pondo, pati na rin ang umano’y kabiguan nilang mapagsilbihan ang nasa 1.3 million beneficiaries dahil sa paggamit ng Starpay e-wallet.

Handa raw silang bigyang-linaw ang mga alegasyon laban sa kung paano hinawakan ng pamahalaan ang pamamahagi ng SAP, partikular na ang digital payment ng second tranche ng mga ayuda sa ilalim nang paso nang Bayanihan 1.

Abril ngayong taon nang itinigil ng DSWD ang engagement nito sa mga financial service providers (FSPs) at nagdesisyon na gawin na lamang manual ang payouts para sa mga SAP beneficiaries na hindi pa nakatatanggap ng ayuda.

Matatandaang una nang naglunsad ng congressional inquiries ang Kongreso hinggil sa kalituhan, delays at umano’y mga iregularidad sa pamamahagi ng SAP cash subsidies.

Hanggang sa muli itong napag-uusapan matapos ang sinasabing pasabog ni Sen. Manny Pacquiao sa mga aniya’y korupsiyong nagaganap.

Mabigat ito at hindi lang basta ahensiya ang tinutukoy kundi ang mismong mga opisyal at empleyado rito.

Batid natin na isa sa mga nagpapahirap sa bayan ay ang korupsiyon. Sa tindi ng pinagdaraanan ngayon mula sa pandemya, mga kalamidad, hanggang sa paghina ng ekonomiya, halos walang matakbuhan kundi pangungutang.

Kaya napakahalagang nagagamit nang maayos at tapat ang bawat sentimo sa kaban ng bayan.

Higit sa lahat, maging focus sa kung ano ang dapat unahin at gawin, tigilan na muna ang pamumulitika. Utang na loob, kapakanan ng mamamayan ang atupagin, hindi ang pansariling interes.