Mga bata at magulang, magdoble-ingat pa rin kontra-COVID

@Editorial | July 12, 2021

Ngayong pinayagan na ang mga bata, partikular ang mga edad lima at pataas na lumabas, tiniyak ng pamunuan ng Philippine National Police (PNP) na kanilang paiiralin ang “maximum tolerance” sa pagpapatupad sa nasabing panibagong protocol.

Kasabay nito ang paalala sa mga magulang na magdoble-ingat sa paglabas kasama ang mga anak.

Unang-una, alamin kung saan lamang sila puwedeng pumunta. Batay sa panuntunan, papayagan lang sila sa mga parks, playgrounds, outdoor tourism areas at biking and hiking trails basta’t kasama ang kanilang magulang.

Mahigpit namang ipinagbabawal ang mga bata sa mga mall at katulad na establisimyento.

Kung may paglabag na ginawa mula sa mga panuntuhan, walang ibang mananagot kundi siyempre ang magulang.

Bukod sa pag-iingat na hindi mapanagot, higit dapat iwasan ay ang mapahamak ang mga bata.

Hindi pa rin dapat magpakampante lalo na’t nariyan pa rin ang banta ng COVID-19 at may mga sumusulpot pang bagong variant na sinasabing mas mabilis makahawa.

Hindi kailangang takutin ang mga anak, sapat nang maipaunawa sa kanila ang kahalagahan ng pag-iingat laban sa sakit sa pamamagitan ng pagsunod sa mga health protocols. Simulan sa pagtuturo ng wastong pagsusuot ng facemask at paghuhugas ng mga kamay.

Sa atin namang kapulisan at sa iba pang tagapagpatupad ng batas sa gitna ng pandemya, umaasa ang taumbayan sa inyong pahayag na magiging mas malawak ang inyong pang-unawa at mahaba ang pasensiya sakaling lumabag sa panuntunan ang mga bata.

Source ng ‘ilegal’ na bakuna, tugisin!

@Editorial | July 10, 2021

May nahuli na naman sa ilegal na pagbebenta ng bakuna kontra-COVID-19.

Isang ginang na nagpapanggap na nurse ang huling naglalako ng bakuna online.

Tila hindi natinag sa babala ni Pangulong Rodrigo Duterte na ikukulong ang mahuhuling nagbebenta ng bakuna.

Una nang nakarating sa kaalaman ng Pangulo na isang health worker ang naaresto ng National Bureau of Investigation (NBI) na umano’y nagbenta ng Sinovac.

Nakaaalarma ang ganitong gawain.

Unang-una, ang bakuna kontra-COVID ay hindi produkto na ibinebenta at basta na lang gagamitin. May mahahalagang proseso na dapat pagdaanan para mapanatiling ligtas at epektibo.

Pangalawa, ang pagpupuslit at pagbebenta sa kung sino lang ang may kakayahang

makabili ay paglapastangan sa karapatan ng bawat isa. Ang laban sa pandemya ay laban ng lahat, mahirap at mayaman, kaya dapat pantay-pantay ang pagbibigay-lunas at proteksiyon. Huwag alisan ng pagkakataon ang mahihirap na magkaroon ng laban sa virus o anumang sakit.

Kaya kung sinuman ang source o nasa likod ng ganitong mga ilegal na ibinebentang bakuna, tugisin na!

Palaging ipinaalala na ibinibigay nang libre ang bakuna laban sa COVID-19 at hindi ito for sale sa mahihirap at mayayaman.

Sumunod tayo sa proseso. Huwag nating hayaang masira ang sistemang magtatawid sa atin patungo sa mas maayos na pamumuhay sa gitna ng pagsulpot ng COVID-19.

Bumabaha na naman ng droga, nakupo!

@Editorial | July 08, 2021

Talamak na naman ang ilegal na droga.

Araw-araw may natitimbog na adik, tulak, big-time supplier at mga bahay at establisimyento na ginagawang drug den.

Kumusta na nga ba ang war on drugs ng gobyerno? Mukhang nagagawang sabayan ng mga nasa droga ang pagiging abala ng lahat sa pandemya.

Usapang drug war, siniguro ng pamunuan ng Philippine National Police (PNP) na iniimbestigahan ang mga napaulat na nasawi sa anti-illegal drug operations. Kasunod ito ng alegasyon na nagkakaroon umano ng cover-up sa mga nasawi sa operasyon at tinatakot umano ang pamilya ng mga biktima.

Tiniyak ng PNP na hindi kailanman naging polisiya ng ahensiya ang panggigipit at pang-aabuso sa mahihirap at lalo na ang pagtatakip umano ng mga kamalian sa kanilang hanay.

Ipinabatid din na mahigit 18,000 na ang naparusahang pulis sa nakalipas na limang taon at kabilang dito ang pagtanggal sa serbisyo ng mahigit 5,000 dahil sa iba’t ibang kaso ng pang-aabuso sa kapangyarihan.

Ito naman talaga ang dapat gawin, ihiwalay ang mga nabubulok para hindi na makapanghawa. Maraming matitinong alagad ng batas ang nadadamay sa kawalanghiyaan ng ilang kabaro.

Kaya hindi talaga kakayanin kung kapulisan lang ang lalaban sa salot na droga, kailangan ng tulong ng mamamayan. Walang anumang dahilan para pumasok sa ilegal na gawain — hindi ang kahirapan at lalong hindi para sa kapangyarihan.