Pag-iingat kontra-COVID, ipaunawang maigi sa mga paslit

@Editorial | July 17, 2021

Kumusta ang paglabas ng mga bagets?

Sa ilang eskinita at kalsada, kapansin-pansing naglabasan na talaga ang mga paslit. Takbuhan dito, takbuhan doon, bakas ang kasabikang makalabas matapos ang napakahabang panahon na pagkakakulong sa bahay.

Gayunman, mapapansing tila nakalimutang ipaalala ng mga magulang sa mga anak na may banta pa rin ng COVID-19 sa paligid. Nakayakap, marurumi ang mga kamay at kung saan-saan humahawak, tipong balik-normal ang lahat.

Una nang nilinaw ng mga awtoridad na ang pagpayag na makalabas ang mga edad 5 pataas ay may kasabay na mga panuntunan.

Kaugnay nito, inatasan ang mga alkalde na mag-isyu ng executive orders at magpasa ng mga ordinansa. Kabilang dito ang paglilista at pagtukoy sa mga pinapayagang outdoor areas o parke.

Madetermina ang mga parks o sa mga al fresco o sa mga lugar na walang bubungan kahit pa katabi sila ng establisimyento o labas ng mga mall basta tuluy-tuloy o malaya ang pagdaloy ng hangin. Magpatupad ng 50 porsiyentong limitasyon ng kapasidad ng venue upang maiwasan ang overcrowding.

Pagde-deploy ng marshals sa privately-owned outdoor areas o parks upang matiyak na masusunod ang minimum public health standards at protocols.

Dapat may kasamang nakatatanda ang mga menor-de-edad at iba pang kondisyon na resonable sa mga kadahilanang maaaring madetermina ng Metro LGUs para masiguro ang promosyon at proteksiyon ng kapakanan ng kabataan.

Lahat ng ito ay dapat na malaman ng publiko sa pamamagitan ng paglalathala.

Para naman sa ating mga magulang, huwag kalimutang ipaalala sa mga bata na palaging mag-ingat habang nasa labas. Walang ibang mas makapagpapaunawa nito sa kanila kundi tayo.

Ngayong lumalawak ang banta ng Delta variant, mas kailangang mag-ingat sa kabila ng mga nangyayaring pagluluwag.

Christmas-level na traffic, nagpaparamdam na sa EDSA

@Editorial | July 16, 2021

Hulyo pa lang pero, nagpaparamdam na ang Christmas-level na trapik sa EDSA.

Ayon sa Metropolitan Manila Development Authority (MMDA), malapit nang matulad sa naranasang 2019 Yuletide traffic ang sitwasyon ngayon sa EDSA.

Kung saan, malapit na umanong umabot sa 400,000 sasakyan kada araw ang gumagamit ng EDSA. Ang binanggit na datos noong 2019 ay kasabay pa ng Kapaskuhan, eh, Hulyo pa lang.

Isa sa mga binanggit na dahilan ay ang pagpapaluwag sa quarantine restrictions — mas marami na ang pinapayagang lumabas at nagbalik-trabaho.

Kaya pinag-aaralan na rin ang pagbabalik ng number-coding scheme.

Inaayos na rin ang Mabuhay Lanes, ito ‘yung 19 na ruta na maaaring daanan bilang alternatibo sa EDSA at naglagay na ng mga bagong karatula para hindi malito ang mga motorista.

Higit sa lahat, dapat ding masiguro ng mga awtoridad na talagang madadaanan nang maayos ang Mabuhay Lanes.

Unang-una, kailangan ang koordinasyon sa mga barangay dahil mapapansing maraming kalsada ang may mga tolda at iba pang harang na ginamit dahil sa pandemya.

Ganundin ang mga kalsada na ginagawang parking, tindahan at tambayan.

Kakailanganin talagang magsagawa ng clearing operation para lumuwag ang mga kalsada.

Sa dami ng sasakyan, talagang kakabit na nito ay matinding trapik, sasabayan pa ng mga pasaway sa batas-trapiko.

Kaya huwag kalimutang magbaon palagi ng disiplina at mahabang pasensiya kung bumibiyahe. Hindi lang ito para sa mga motorista kundi maging sa mga nagko-commute. ‘Ika nga, bumabalik na ang normal na daloy ng trapiko.

Bakuna para sa mga bagets, tiyaking safe

@Editorial | July 15, 2021

Napag-uusapan na posibleng maibalik na ang face-to-face classes ngayong panibagong school year.

Ito ay matapos ang pahayag ng pamunuan ng Department of Education (DepEd) na maaari umanong maikonsidera ang pilot face-to-face classes sa gitna ng COVID-19 pandemic kung nabakunahan na kontra-COVID-19 ang mga estudyante at guro ngayong Agosto.

Matatandaang, una nang tinanggihan ni Pangulong Rodrigo Duterte ang mungkahi ng DepEd na payagan na ang resumption ng in-person classes dahil karamihan sa populasyon ay hindi pa fully vaccinated, lalo na ang mga bata, na hindi naman pasok sa prayoridad ng gobyerno sa vaccination program nito. Bagama’t susubukan din umano silang mabakunahan.

Sa ngayon, mas marami na ang gustong magpabakuna at tuluy-tuloy din ang pagdating ng mga supply. Kung magpapatuloy ang maayos na sistema ng pag-deliver at pamamahagi, hindi imposibleng mabakunahan na rin ang mga estudyante at mga guro. Kasunod nito, posibleng mapagbigyan na rin ang panawagang balik-face-to-face classes.

Naranasan naman ng lahat ang hirap at maraming pagbabago, ‘ika nga, iba talaga kung nasa eskuwelahan ang mga mag-aaral at personal silang natuturuan ng mga guro.

Gayunman, ang Presidente pa rin naman ang magdedesisyon sa huli kung papayagan na ba o hindi ang in-person classes. Nais din naman ng pamahalaan na matiyak ang kaligtasan ng lahat kesa magsakripisyo o mag-“bahala na”.

Higit sa lahat, para sa atin, bago isipin kung uubra na ba ang ‘bakuna bago face-to-face classes’, eh, tiyakin munang ligtas at epektib ang mismong bakunang ituturok sa mga bagets.