Mas mabigat na parusa sa mga pasaway sa basura

@Editorial | July 25, 2021

Tag-ulan na talaga at ‘pag ganitong panahon, kasabay na ang tag-baha.

Isa pa rin sa tinutukoy na sanhi ay ang mga basurang basta na lang itinatapon na bumabara sa mga drainage.

Kaugnay nito, may parusang nais ipanukala ang Metro Manila Development Authority (MMDA) na ipataw sa mga maaarestong nagtatapon ng kanilang basura sa hindi tamang lugar.

Ayon sa pamunuan ng MMDA, nais nilang ipanukala sa local government units (LGUs) na imbes na pagmultahin ang mga naarestong nagtatapon ng kanilang basura ay dapat sila’y paglinisin na lamang ng mga estero at kanal.

Sa ganitong paraan umano ay mararamdaman nila kung gaano kahirap ang magtanggal ng mga basurang bumabara sa iba’t ibang estero.

Sa mga susunod na araw ay magpapakalat na umano ng mga marshals na sisita at huhuli sa mga lalabag.

Hanggang ngayon ay marami pa rin ang walang disiplina pagdating sa wastong pagtatapon ng basura.

Hindi pa rin naiisip ang matinding problema na puwedeng maidulot ng kapabayaan.

Gaano ba kahirap na itapon ang kalat sa basurahan? Kailangan pang hintaying umulan at magbaha nang matindi bago na naman maisip na mali ang basta pagtatapon kung saan-saan?

Bago pa pumasok ang tag-ulan, panay na ang paalala na maglinis at tiyaking nasa maayos ang mga basura, lalo na ngayong may mga nadagdag dulot ng pandemya — disposable facemask, face shield, gloves at iba pa.

Sa totoo lang, kung isasaisip at puso lang ng bawat isa ang kahalagahan ng tamang pagtatapon ng basura, hindi na kailangan ng anumang parusa dahil napakalaking bagay na ‘yung bilang kapalit ng pagiging disiplinado ay wala tayong problema sa baha.

Mga bata, bawal munang lumabas, ‘wag pasaway

@Editorial | July 24, 2021

Inaprubahan na ni Pangulong Rodrigo Duterte ang rekomendasyon ng Inter-Agency Task Force (IATF) na ilagay sa general community quarantine with heightened restrictions ang National Capital Region at apat pang probinsiya dahil sa banta ng Delta variant ng COVID-19.

Ipatutupad ang bagong kautusan mula Hulyo 23 hanggang 31.

Kaugnay nito, ipinagbabawal na munang lumabas ng bahay ang mga bata na limang taong gulang pataas.

Kaya mga bagets, huwag pasaway, lalo na ‘yung mga naliligo pa sa ulan. Hindi lang COVID-19 ang puwedeng makuha, marami pang sakit. Manahimik na muna sa loob ng bahay, mag-aral, tumulong sa gawaing bahay at matulog.

Sa inyong murang edad, wala man kayong maiambag sa ngayon pagdating sa mga solusyon sa gitna ng pandemya, napakalaking bagay at tulong na ang hindi kayo magkasakit o mapahamak.

Tayo namang mga magulang, imbes na maging promotor sa pagsuway sa health protocols, maging mabuting halimbawa sa mga nakababata.

Huwag nating hintaying lumala pa ang sitwasyon at mas marami pa ang malagay sa alanganin dahil sa mas matinding dulot ng COVID-19.

Responsibilidad ng bawat isa na mapangalagaan ang ating kalusugan dahil nakasalalay dito ang ating kinabukasan, lalo na ng kabataan.

Mga epalitiko sa gitna ng pandemya, ekis!

@Editorial | July 23, 2021

Kung ang iba ay todo-handa sa kung paano haharapin ang “worst-case scenario” ngayong may kumpirmado nang kaso ng COVID-19 Delta variant, aba’y puspusan naman sa pag-aanunsiyo ang mga atat sa eleksiyon 2022.

Kani-kanyang announcement na sila’y tatakbo o muling tatakbo at may pa-line up ng mga kasamang eepal este kakandidato.

Ang mas matindi, ‘yung tinodo na hanggang sa pag-iikot kung saan-saan para mas obvious ang paramdam.

‘Ika nga, bato-bato sa langit, ang tamaan, huwag magagalit.

Eh, ang tanong ng taumbayan, habang busy kayong mga epalitiko sa tila maagang pangangampanya, ano naman kaya ang ambag n’yo ngayong may laban pa rin sa pandemya na sinasabayan pa ng bagyo?

Puro kayo papogi, mula sa TV, radyo at hanggang sa social media, istayl bulok sa pamumulitika.

Sobrang lumang diskarte na ‘yung pagbalandra ng pagmumukha, hindi na ‘yan bebenta, sa halip, mas nagmumukha lang kayong katawa-tawa. Ang gustong makita ng mamamayan ay gawa at hindi puro kaepalan.

Ang tunay na may “K” ay silang natural ang pagbibigay-serbisyo sa publiko. Walang pinipiling tao, lugar o pagkakataon. Hindi kailangang may kamera o maraming tao para makitang nagtatrabaho.

Kaya sa huli, tayong mamamayan pa rin ang dapat na maging mas may papel at kapangyarihan hindi silang mga epal at sakim sa posisyon.

Gamitin nating basehan ang lahat ng ating pinagdaanan.

‘Pag todo-porma at daldal lang, ekis na ‘yan!