Dagdag-suporta sa mga atletang Pinoy!

@Editorial | July 28, 2021

Gumawa ng kasaysayan noong Lunes ang atletang si Hidilyn Diaz nang kanyang masungkit ang kauna-unahang gintong medalya ng Pilipinas sa Olympics para sa weightlifting.

Tinalo ni Diaz ang 8 ibang atleta para sa kategorya, kabilang ang world record holder na si Liao Qiuyun ng China. Ito na ang ikalawang Olympic medal ni Diaz matapos ang kanyang silver finish sa 2016 Olympics sa Brazil.

Halos 100 taon na mula nang lumahok ang Pilipinas sa Olympics subalit, ngayon lamang nakapag-uwi ng ginto ang isang atletang Pinoy.

Kaya todo-puri ang mga Pinoy sa kahusayan ni Diaz.

Kaugnay nito, dahil sa parangal na ibinigay sa bansa sa pagkakapanalo niya ng unang Olympic gold medal para sa ‘Pinas, hiniling ng ilang mambabatas na bigyan ng komendasyon si Diaz.

Masasabing ang kanyang tagumpay ay nakadagdag ng saya at positibong pananaw sa gitna ng pinagdaranang pandemya.

Hindi man natin batid ang eksaktong mga pinagdaanan ni Diaz bago nakamit ang gintong medalya, pinatunayan niyang anuman ang pagsubok, gaano man kalaki o kabigat, kayang lampasan at pagtagumpayan.

Hindi ito ang una at huling ginto na maiuuwi ng mga atletang Pinoy at umaasa tayong mas mabibigyan sila ng suporta ng ating gobyerno at ng mga indibidwal o grupo na may kakayahang magbigay.

Muli, congratulations sa ating PH Golden girl Hidilyn Diaz.

Hangad din natin ang tagumpay at kaligtasan para sa iba pang atleta na sasabak sa Olympics.

Mas maayos na sistema sa pagbabakuna

@Editorial | July 26, 2021

Umulan, bumaha kahit lumindol, hindi nagpatinag ang mga gustong magpabakuna kontra-COVID-19.

Sa kabila ng masamang lagay ng panahon, may mga nagtitiis sa pila, 'yung iba, halos doon na rin natutulog.

Kaya inatasan ni Pangulong Rodrigo Duterte ang Department of Interior and Local Government (DILG) na hanapan ng solusyon ang problemang kinahaharap ngayon ng mga nais magpabakuna.

Ayon pa sa Pangulo, kung titingnan, “common sense” lang naman aniya ang kailangan para masabing mali na hayaang pumila ng maaga ang publiko, pabayaan na maulanan at magtampisaw sa baha, at maging exposed sa iba’t ibang uri ng sakit, tulad ng leptospirosis at trangkaso.

Tama naman na para maiwasan ito, kailangang ikonsidera na rin ng mga LGUs ang lagay ng panahon at alternatibong lugar kung saan maaaring idaos ang pagbabakuna kapag magkaroon man ng aberya tulad ng pagbaha.

Napag-alamang sa ibang bansa ay talagang nagkakaroon ng kaguluhan o riot dahil sa agawan sa bakuna. Ito ang dapat nating iwasan.

Ngayon pa lang ay ayusin na ang sistema, bigyang-solusyon ang mga problema at palaging maging handa sa mga posibleng aberya.

Inaasahan naman ang kooperasyon at disiplina ng mga nagpapabakuna. Palagi tayong sumunod sa mga panuntunan para iwas-gulo.

Huwag tayong mag-panic na baka maubusan ng supply sa halip magtiwala tayo na palaging gumagawa ng paraan ang gobyerno na magtuluy-tuloy ang pagbabakuna.

Malalampasan din natin ang pandemya.

Mas mabigat na parusa sa mga pasaway sa basura

@Editorial | July 25, 2021

Tag-ulan na talaga at ‘pag ganitong panahon, kasabay na ang tag-baha.

Isa pa rin sa tinutukoy na sanhi ay ang mga basurang basta na lang itinatapon na bumabara sa mga drainage.

Kaugnay nito, may parusang nais ipanukala ang Metro Manila Development Authority (MMDA) na ipataw sa mga maaarestong nagtatapon ng kanilang basura sa hindi tamang lugar.

Ayon sa pamunuan ng MMDA, nais nilang ipanukala sa local government units (LGUs) na imbes na pagmultahin ang mga naarestong nagtatapon ng kanilang basura ay dapat sila’y paglinisin na lamang ng mga estero at kanal.

Sa ganitong paraan umano ay mararamdaman nila kung gaano kahirap ang magtanggal ng mga basurang bumabara sa iba’t ibang estero.

Sa mga susunod na araw ay magpapakalat na umano ng mga marshals na sisita at huhuli sa mga lalabag.

Hanggang ngayon ay marami pa rin ang walang disiplina pagdating sa wastong pagtatapon ng basura.

Hindi pa rin naiisip ang matinding problema na puwedeng maidulot ng kapabayaan.

Gaano ba kahirap na itapon ang kalat sa basurahan? Kailangan pang hintaying umulan at magbaha nang matindi bago na naman maisip na mali ang basta pagtatapon kung saan-saan?

Bago pa pumasok ang tag-ulan, panay na ang paalala na maglinis at tiyaking nasa maayos ang mga basura, lalo na ngayong may mga nadagdag dulot ng pandemya — disposable facemask, face shield, gloves at iba pa.

Sa totoo lang, kung isasaisip at puso lang ng bawat isa ang kahalagahan ng tamang pagtatapon ng basura, hindi na kailangan ng anumang parusa dahil napakalaking bagay na ‘yung bilang kapalit ng pagiging disiplinado ay wala tayong problema sa baha.