Manggagawa at negosyante, umaaray na sa tagal ng lockdown

@Editorial | August 01, 2021

Sa muling pagpapatupad ng enhanced community quarantine (ECQ) sa Metro Manila, marami ang umaaray.

Mula sa mga manggagawa hanggang sa mga negosyante, kani-kanyang diskarte kung paano maitatawid ang dalawang linggo.

Bagama’t nauunawaan ng lahat ang kahalagahan ng ipatutupad na mas mahigpit na community quarantine, hindi pa rin maiwasang magtanong at mangamba.

Ilang ECQ pa ba ang kailangan para tuluyang mapigilan ang pagkalat ng COVID-19? Bakit tila nauulit lang ang mga senaryo na parang lumalala pa? ECQ lang ba talaga ang paraan para makontrol ang sitwasyon — kakayanin pa ba?

Sana, ito na ang huling ECQ. Sa pamamagitan ng lockdown na sasabayan ng patuloy na pagbabakuna, nawa’y tuluyan nang bumaba ang kaso ng COVID-19.

Pero, kung wa’ epek pa rin, siguro ang tatlong ECQ ay sapat na para humanap na ng ibang paraan.

Puwede ring epektib naman sana ang mas mahigpit na lockdown kung nasusunod lang.

Sa ibang bansa, ‘pag sinabing bawal, bawal. Hindi sila sumusunod dahil may parusa, kundi gusto nilang matapos na ang pandemya.

Ang hirap sa ‘tin, alam nang bawal, gagawin pa rin. Nakikipaghabulan at taguan pa sa mga awtoridad. Parang hindi talaga nauunawaan ang sitwasyon, ang panganib ng virus sa kabila ng marami nang namatay at nagkakasakit.

Kung naisasaisip at puso lang sana ng lahat ang totoong silbi ng paghihigpit, malamang ay hindi na humaba ang panahon ng pagsasakripisyo.

Utang na loob, matuto na tayo.

Balik-ECQ sa NCR, maging epektib sana kontra-COVID

@Editorial | July 31, 2021

Nagdesisyon na ang pamahalaan na muling ipatupad ang enhanced community quarantine (ECQ) sa National Capital Region (NCR) mula Agosto 6 hanggang 20.

Pinuri naman ito ng OCTA Research group at sinabing suportado nila ang desisyon ng national government bilang precautionary intervention para mapigilan ang pagsipa ng COVID-19 cases.

Sinasabing ngayon pa lang ay malaking hamon na para sa gobyerno kung paano mababaligtad ang surge sa COVID-19 sa NCR.

Kaya patuloy ang paghimok sa mga local government units (LGUs), private sector at mga komunidad sa Metro Manila na magtulungan sa pagpapatupad ng mga estratehiya para maiwasang lumala pa ang surge.

Kaugnay ng bagong desisyon ng national government para sa quarantine restrictions, posible umanong aabot ng P105 bilyon ang mawawala sa ekonomiya ng Pilipinas, habang nasa 170,000 hanggang 444,000 manggagawa ang mawawalan ng trabaho.

Gayunman, ang economic impact umano ng estriktong lockdown ay bahagyang mababaligtad naman kung sa loob ng tatlong linggo ay pabibilisin ang COVID-19 vaccination sa mga high risk areas.

Kaya ang pakiusap sa lahat, ipatupad at sundin ang mga panuntunan na ipatutupad sa ilalim ng ECQ. Huwag nang pasaway dahil marami ang nasasakripisyo tuwing nagsasagawa tayo ng paghihigpit.

Bakunado man o hindi, lahat dapat magdoble-ingat kontra-Delta

@Editorial | July 29, 2021

Pinag-uusapan ang kamakailang hirit ng isa sa mga presidential advisers na magpatupad ang pamahalaan ng mas mahigpit na restriksiyon para sa mga indibidwal na hindi pa bakunado kontra-COVID-19.

Ito ay kasunod na rin ng pagsipa ng kaso ng Delta variant sa Pilipinas.

Kabilang sa panukalang paghihigpit ay ang pagpasok sa ilang establisimyento at pag-ikot sa bansa. Ito umano ang mas dapat gawin sa halip na i-lockdowna ang buong ekonomiya ng bansa.

Agad namang nagpahayag ng hindi pagsang-ayon ang ilang opisyal ng gobyerno at maging mga hindi pa nababakunahan.

Kailangang pag-aralan muna ang hirit na limitasyon sa mga hindi pa bakunado upang maiwasan ang gulo.

Unang-una, hindi nangangahulugang kapag bakunado na ang indibidwal kontra-COVID ay hindi na ito makakapanghawa sa iba, lalo na ngayong nagsulputan ang iba pang variants coronavirus.

Sa karanasan ng ibang bansa, ang Delta variant ay “uncontrollable” na uri ng coronavirus kaya anumang rekomendasyon hinggil sa mga restrictions ay kailangan ng masusing pag-aaral at pag-uusap.

Dapat ding makonsulta muna ang iba’t ibang local government officials (LGUs).

Masasabing masalimuot ang pagpapatupad ng mas mahigpit na lockdown gayundin ang paglilimita sa kilos ng mga hindi pa bakunado, tiyak na magkakaroon ng hindi pagkakaunawaan. Lalo na sa ngayon, dumarami ang gustong magpabakuna pero, wala pang sapat na supply.

Sa social media, kaliwa’t kanang ang reklamo ng mga nagpa-schedule na online at sa barangay pero hanggang ngayon ay walang update kung kailan sila matuturukan.

Para naman sa atin, bakunado man o hindi, dapat pare-parehong mag-ingat laban sa COVID-19 at iba pang sakit. Palaging sumunod sa health protocols at alagaang maigi ang kalusugan.