Buwis-buhay para sa ayuda, ‘di na sana mangyari sa ECQ 3

@Editorial | August 07, 2021

Inaasahang masimulan na sa susunod na linggo ang pamamahagi ng pinansiyal na ayuda sa mga residenteng apektado ng Enhanced Community Quarantine (ECQ) sa Metro Manila na umiiral na simula Agosto 6 hanggang 20.

Kaugnay nito, umapela ang kalihim ng Department of the Interior and Local Government (DILG) sa publiko na bigyan ng panahon ang mga lokal na pamahalaan na maihanda ang kanilang sistema, kasama na ang pagse-setup ng distribution points, pag-mobilize sa disbursing officers at iba pang personnel ng barangay at pulis na magbabantay sa gagawing pamamahagi ng ayuda.

Ganundin umano ang pagkonsidera sa mismong perang ipamamahagi, na kahit umano nasa bangko na ang pondo ay kung wala naman itong ganu’n karaming paper bills ay maaaring magdulot din ng kaunting panahon ng pagkaantala ng distribusyon.

Napag-alamang aabot sa P13.1 bilyon ang pondong inilaan ng gobyerno para sa ayuda kung saan, tinatayang nasa 10.7 milyong residente sa Metro Manila ang makatatanggap.

P1, 000 hanggang P4,000 ang maaaring matanggap na ayuda ng bawat pamilya depende sa dami ng miyembro.

Samantala, bukod sa Metro Manila, nasa ECQ rin ang Laguna, Cagayan de Oro at Iloilo City hanggang August 15, 2021.

Ang panawagan naman natin sa mga kinauukulan, sana’y maging mas maayos na ang pamimigay ng ayuda. Huwag na sanang mangyari ang mga eksena noong mga nakaraan na talagang buwis-buhay ang taumbayan sa pila. Nagkaroon pa ng mga kontrobersiya.

Umaasa tayo na sa pagkakataong ito ay mas mabilis at epektibo na ang sistema upang maiwasan ang gulo at ang bantang pagkalat pa ng virus sakaling hindi na naman masunod ang mga health protocols.

Operasyon ng pampublikong sasakyan, tuloy pa rin kahit ECQ

@Editorial | August 04, 2021

Tuloy ang biyahe ng mga pampublikong sasakyan sa panahong nasa ilalim ng Enhanced Community Quarantine (ECQ) ang National Capital Region (NCR).

Ito ang tiniyak ng Department of Transportation (DOTr) matapos maglabas ng guidelines kahapon.

Bagama’t mayroong pampublikong sasakyan na babiyahe sa ECQ, Authorized Persons Outside Residence (APOR), na tinukoy ng Inter-Agency Task Force, lamang ang papayagang sumakay sa mga ito.

Kaugnay nito ay pinaghahanda ang mga APORs ng kanilang identification cards o iba pang dokumento bilang patunay na pinapayagan silang makabiyahe.

Para sa mga pampublikong sasakyan, tulad ng mga bus at jeepneys, 50 porsiyento lamang ng seating capacity ang pinapayagan upang masunod ang “one-seat-apart” setup.

Samantala, para sa mga tricycles, isang pasahero lamang ang maaaring sakay nito habang patuloy din ang operasyon ng mga motorcycle taxi services at Transport Network Vehicle Service (TNVS).

Gayundin, ang mga tren ng Philippine National Railways, LRT-1, LRT-2, at MRT-3 ay mananatiling operational, pati ang mga flights at sea travel sa NCR.

Malaking bagay ang pagkakaroon ng pampublikong sasakyan sa kabilang ng ipinatutupad na mahigpit na lockdown. Ang COVID-19 at Delta variant ay matinding banta sa ating kalusugan, gayunman, ang kawalan ng mapagkakakitaan ay malaking problema naman sa personal na pamumuhay at ekonomiya ng bansa.

Kooperasyon at displina ang kailangang pairalin sa panahon ng pandemya nang sa gayun ay sama-sama natin itong mapagtagumapayan.

Boarder control sa NCR Plus, dapat walang pinipili

@Editorial | August 02, 2021

Nagsimula na kahapon ng alas-12:00 ng hatinggabi, August 1, ang pagpapatupad ng mga border control points sa NCR Plus, ang Metro Manila at karatig lalawigan ng Rizal, Laguna, Bulacan at Cavite.

Kaugnay nito, pagaganahin ang Quarantine Control Points (QCPs) o checkpoints sa mga lagusan sa bawat boundary ng NCR Plus.

Walang ibang dapat makalusot kundi ang mga Authorized Persons Outside of Residence (APOR), na kailangang magpakita ng kanilang IATF ID o company ID.

Kaya asahan ang mas maraming pulis sa paligid, lalo na sa mga boundary ng Rizal, Laguna, Cavite at Bulacan. Ang kautusan ay alinsunod sa IATF Resolution No. 130-A.

Hahayaan namang makadaan sa mga checkpoints ang mga mga cargo at delivery trucks.

Ang paghihigpit ay upang mapigilan ang pagdami ng kaso ng COVID-19, lalo na’t may kaso ng mahigit 100 ng Delta variant sa bansa at ang sinumang lalabag ay maaring sampahan ng reklamo o paglabag sa RA 11332.

Kaya ang paalala sa publiko, bago bumiyahe, tiyakin muna na kabilang sa APOR at kumpleto ang mga dalang dokumento at ID bilang patunay. Kailangan ding magbaon ng mahabang pasensiya dahil baka abutin ng mahabang pila sa mga QCPs.

Samantala, apela naman ng mga riders, huwag lang daw sana sila ang harangin sa mga checkpoint kundi lahat ng dumaraang motorista. Wala nga namang pinipili ang COVID-19.