More trabaho ngayong lockdown

@Editorial | August 10, 2021

Hangga’t may banta ng COVID-19, hindi talaga natin masasabi kung kailan matatapos ang mga ipinatutupad na community quarantine.

Sa ngayon, ang tanging magagawa ay ang sumunod sa mga panuntunan at manalig na makakatawid din tayo sa tinatawag na ‘new normal’.

Kasabay nito ay ang patuloy na pagsuporta ng gobyerno.

Tulad nitong pahayag ng Department of Labor and Employment (DOLE) na magbibigay umano ng ‘emergency employment package’ sa mga displaced workers sa mga lugar na nasa ilalim ng enhanced community quarantine (ECQ).

Sa ilalim ng Tulong Panghanap Buhay para sa Displaced Workers (TUPAD), ang mga unemployed at self-employed workers, pati na rin ang mga nasa non-formal sector tulad ng mga vendors, drivers at mga kasambahay ay puwedeng mag-apply.

Bibigyan sila ng DOLE ng 10-araw na trabaho na may karampatang sahod.

Sa National Capital Region (NCR), aabot sa P537 kada araw o P5,370 sa 10-araw na pagtatrabaho ang matatanggap ng matatanggap na empleyado sa ilalim ng emergency employment program.

Maaari ring maging eligible sa programang ito ang mga nasa formal sector, na ang income ay nabawasan dahil sa pinaiksing working days o working hours.

Sana mas marami pang alternatibong hanapbuhay ang mabuksan, lalo na sa mga tuluyan nang nawalang ng trabaho ngayong pandemya.

Hindi naman isyu ang kakayahan at sipag ng mga Pinoy, sadyang dumating lang tayo sa panahon na walang choice kundi ang mabakante at napakalaking bagay na nagtutulungan ang bawat sektor, alang-alang din sa pagbawi ng bayan.

Ingat sa virus, doble-ingat sa fake news

@Editorial | August 09, 2021

Kasunod ng insidente ng pagdagsa sa mga vaccination sites dahil sa tsismis o fake news, umapela na ang Department of Health sa mga sangkot na magpa-swab test at mag-self quarantine.

Sa pamamagitan nito ay may pagkakataong mapigilan ang pagkalat ng COVID-19 sa pinaniniwalaang super spreader events.

Matatandaang ang pagdagsa ng mga tao sa vaccination sites ay matapos ang mga lumabas na balita sa social media na nagsasabing hindi makakakuha ng ayuda ang mga walang bakuna at hindi rin makalalabas ang walang bakuna.

Itong fake news na umabot sa mga barangay na nag-anyong tsismis na madaling pinaniwalaan.

Paulit-ulit nang ipinapaalala sa lahat na huwag basta maniniwala sa mga nababasa online.

Imbes na naka-focus ang bansa sa pagbabakuna, nadagdagan pa ang alalahanin sa posibilidad na dumami pa ang kaso ng COVID-19.

Nakapanlulumo na nagpapatupad tayo ng mas mahigpit na community quarantine at marami ang nagsasakripisyo pero, sinasabayan pa ng mga eksenang wala na ngang naitutulong, perhuwisyo pa.

Mga gala at tambay, mahiya naman kayo!

@Editorial | August 08, 2021

Sa unang araw ng balik-Enhanced Community Quarantine sa Metro Manila, umabot sa 1,848 katao ang nahuhuli ng Philippine National Police (PNP).

Kaugnay ito sa paglabag sa umiiral na curfew.

Sa nasabing bilang, 605 ang nabigyan muna ng warning.

Aabot naman sa 1,235 ang pinagmulta habang ang walo ay pinag-community service.

Matatandaang ipinatupad ang curfew at ECQ sa Metro Manila dahil sa tumataas na kaso ng COVID-19 dahil na rin sa banta ng Delta variant.

Umiiral ang curfew mula alas-8:00 ng gabi hanggang alas-4:00 ng madaling-araw at tatagal nang hanggang Agosto 20.

Sa pamamagitan ng curfew, mababawasan ang paggalaw ng tao. Wala nang pagala-gala at patambay-tambay.

Kapansin-pansin kasi na marami ang nakampante at nagpabaya nang luwagan ang quarantine.

Kaliwa’t kanan ang paglabag sa mga panuntunan sa gitna ng pandemya. Para bang wala nang virus sa paligid.

Tila mas lalo pang naging pabaya nang umarangkada ang pagbabakuna. Nag-feeling safe ang mga naturukan, halos babad sa labas, puma-party, sige ang travel. Mahiya naman kayo!

Dedma sa paulit-ulit na paalala na ang bakuna ay hindi lisensiya para magwalwal o magpasaway sa mga ipinatutupad na health protocols.

Ngayon, pare-parehong nanahimik sa bahay, pati kabuhayan damay. Higit na kawawa na naman ang mga naghahanapbuhay. Hindi pa nga nakakabawi, balik-tambay na naman.

Kung hindi titino ang mga pasaway, kahit araw-arawin ang lockdown, mukhang wala nang pag-asa.

Kapag sinabing manahimik sa bahay, manahimik sa bahay! Huwag na tayo sumali sa pagkalat ng sakit.

Ang dalawang linggo pagpapakabait ay malaking tulong sa sitwasyon.

Kahit sa ganitong paraan, makabawi man lang tayo sa mga frontliners, lalo na sa mga health workers.