Budget vs. COVID-19, bantay-sarado

@Editorial | August 14, 2021

Bawat sentimo ay mahalaga, lalo na sa panahon ngayon na wala pang katiyakan kung kailan matatapos ang pandemya.

Talagang bantay-sarado ang kaban ng bayan, kung saan hinuhugot ang pagtugon sa mga pangangailangan mula sa mga programa kontra-COVID hanggang sa ipinamimigay na ayuda.

Kaya kontrobersiyal ngayon ang naging pagpuna ng Commission on Audit (COA) sa umano’y maling paggasta ng pondo para sa COVID-19 response ng Department of Health (DOH).

Trabaho ng COA na busisiin at tiyaking maayos na nagagamit ang pondo ng mga ahensiya ng gobyerno.

Kaya ang panawagan sa DOH, ipaliwanag nang malinaw ang nasabing isyu. May mali nga ba sa paggasta ng pondo? Kung wala, maglabas agad ng mga dokumento para matapos na ang kontrobersiya.

Batid naman natin na ang layunin nito ay ang maiwasan na magkaroon ng problema sa kabuuan ng paglaban sa pandemya. Nais nating matiyak na hindi tayo mabibitin pagdating sa pagpopondo sa bakuna, pambili ng gamot at mga kagamitan sa mga ospital at iba pang pangangailangan.

Walang sentimo at panahon na dapat masayang, ‘ika nga, para tayong nakikipag-unahan sa virus. Bagama’t kalat na sa bansa, may pagkakataon pa rin tayo na mapigilan ang grabeng paglala.

Kaya anumang isyu na maaaring makaapekto sa pagtugon sa pandemya, resolbahin agad-agad at huwag nang pahabain pa. Kung mapatunayang may kapalpakan, hatulan agad, huwag nang haluan ng pamumulitika.

Masyado na tayong natengga sa pandemic, kailangan nang makabawi.

Tapos na ang maliligayang araw ng mga pasaway online

@Editorial | August 13, 2021

Nasampulan na ang mga pasaway online, silang mga gumagawa ng ilegal, mahilig mang-scam at pati na ang mga nagpapakalat ng fake news.

Batay sa ulat, mahigit 80 katao ang sinampahan ng kaso ng Philippine National Police (PNP) kaugnay sa iba’t ibang cybercime cases ngayong panahon ng pandemya.

Nasa kabuuang 121 criminal complaints ang isinampa sa iba’t ibang korte laban sa 80 pasaway.

Kasama sa mga kaso ang pagpapakalat ng fake news sa internet, illegal online sale ng medical supplies at online scams.

Sa datos mula Marso 9 hanggang Agosto 9, nasa kabuuang 87 criminal complaints ang naisampa laban sa 52 katao dahil sa fake news; tatlong online scam complaints laban sa dalawang tao at 31 criminal complaints laban sa 26 na para naman sa online profiteering, overpricing, hoarding at unauthorized selling ng medical supplies.

Sila ang mga walang konsensiya, ginagamit ang pagkakataon para makapanlamang ng kapwa.

Umaasa tayong patuloy ang gagawing pagtugis ng mga awtoridad laban sa mga masasamang-loob.

Hindi na naawa na habang marami ang nangangamba sa gitna pandemic at halos buwis-buhay para maitawid ang pang-araw-araw na pangangailangan, sila naman, eh, sinasamantala ang sitwasyon para kumita.

May iba naman na sadyang wala lang magawa sa buhay kaya trip ang gumawa ng pekeng impormasyon saka ipapakalat.

Kailangan talagang may masampulan nang matindi para wala nang gumaya. ‘Pag kinasuhan, tiyaking tutuluyan para magsipagtanda.

Non-COVID cases, dapat ding bantayan

@Editorial | August 12, 2021

Sa gitna ng COVID-19 pandemic, nakaaalarma rin ang ulat na dumarami ang nagpapa-ospital dahil sa ibang sakit.

Ayon sa Philippine Hospital Association, walang pagkakaiba ang sitwasyon sa kasalukuyan sa mga ospital kumpara sa naranasan noong Marso at Abril, 2021 nang inilagay ulit ang Metro Manila sa ilalim ng Enhanced Community Quarantine (ECQ).

Marami rin umanong pasyente ang tumutungo sa mga ospital dahil naman sa mga non-COVID problems, tulad ng dengue at influenza.

Bagama't may mga natatakot ngayon magpagamot dahil sa banta ng mas matinding COVID, sadyang may mga pagkakataong kailangan talagang magtungo sa doktor para maagapan.

Kung ang sitwasyon ay kayang daanin sa online consultation, mainam. Pakinggang maigi ang mga payo at sundin para kahit nasa bahay lang ay gumaling.

Samantala, nagsabi na rin ang Department of Health sa mga ospital na huwag nang mag -admit ng may COVID na mild o asymptomatic, upang maiwasan ang pag-apaw ng pasyente.

Maraming ospital ang nag-install na rin ng kanilang oxygen-generating machines kahit pa maayos pa naman ang supply ng oxygen sa bansa ngayon.

Gayunman, problema pa rin ang manpower hanggang sa ngayon sa mga ospital, kaya ang diskarte ng iba ay kumukuha na lang din ng maraming mga nursing aides na siyang bahala sa leg work ng mga nurses.

Kaya bilang tulong, laging mag-ingat, alagaan ang kalusugan at higit sa lahat, sundin ang mga panuntunan laban sa COVID at iba pang sakit.