Paulit-ulit na lang na lockdown, iba naman!

@Editorial | August 21, 2021

Simula bukas hanggang sa Agosto 31 ay isasailalim na sa modified enhanced community quarantine (MECQ) ang National Capital Region (NCR).

Ipatutupad din ang MECQ sa probinsiya ng Bataan mula Agosto 23 hanggang 31.

Kaugnay nito, ipinag-utos sa mga lokal na pamahalaan sa mga nabanggit na lugar na paigtingin ang vaccination rates, Prevent-Detect-Isolate-Treat-Reintegrate (PDITR) strategies at pagsunod sa minimum public health standards.

Bawal pa rin ang indoor at al-fresco dine-in services at personal care services tulad ng salons, barbershops at nail spas.

Mananatili namang virtual ang pagdaraos ng religious gatherings sa NCR, Bataan at Laguna.

Bagama’t mas pinaluwag ang quarantine, hindi naman ito nangangahulugang puwede nang magpabaya. Kapansin-pansing patuloy ang pagtaas ng kaso ng COVID-19, punuan na sa mga ospital at may mga naitatalang pang namamatay.

Sa ngayon, hindi lang kalusugan ang pinagtutuunan, kailangan ding pag-aralan ang lagay ng ekonomiya.

Aminado ang mga awtoridad na hindi na talaga kakayanin ang mas mahabang lockdown.

Kung tila hindi na epektib ang iba’t ibang quarantine classifications, marahil ay dapat nang bumuo ng bagong estratehiya.

Nakakapagod na rin ang paulit-ulit na sitwasyon, tipong ‘pag dumami ang nagpopositibo, balik-ECQ na naman, ang kailangan natin ay pag-usad.

Sana, simulan natin ito sa sarili at sa ating pamilya. Utang na loob, huwag na tayong pasaway. Ang kapabayaan ng isa ay pagdurusa ng lahat.

Huwag nating hayaang nakawin ng pandemyang ito ang ating kalayaan at kaligayahan, kasama ang ating pamilya, kaibigan at mga mahal sa buhay.

Hirit na P5.024-T budget sa 2022, tiyaking ‘di masasayang o makokorup lang!

@Editorial | August 19, 2021

Kasabay ng sunud-sunod na pagbubulgar ng Commission on Audit (COA) sa umano’y sablay at kuwestiyunableng paggamit ng pondo ng ilang ahensiya ng gobyerno, isinusulong naman ng kasalukuyang administrasyon ang panukalang P5.024 trilyong national budget sa susunod na taon.

Ayon sa tagapagsalita ng Palasyo, ito ang pinakamalaking pondo sa kasaysayan, na ilalaan para sa COVID-19 response, social services sector, infrastructure development at iba pa.

Ang panukalang pondo para sa 2022 ay 11.5% na mas mataas kaysa sa P4.5-T expenditure program ngayong taon.

Kaugnay nito, iba’t ibang reaksiyon ang naglabasan, lalo na sa social media. May mga dudang magagamit nang maayos ang nasabing pondo, lalo na ngayon na nasasangkot sa kontrobersiya ang ilang ahensiya ng gobyerno — kulang-kulang ang dokumento, kuwestiyunable ang presyo ng kagamitan, may hindi nagamit na pera, at iba pang isyu.

Kaya ang pakiusap sa lahat ng nasa gobyerno, gawin sana nating maayos at malinaw ang paggastos sa pondo ng bayan, malaki man o maliit.

Kailangang busisiing maigi ang bawat sentimo at tama lang na bantay-sarado. Hindi naman ito nangangahulugang wala tayong tiwala sa lahat ng opisyal, bagama’t may mga insidente na talagang napupunta sa bulsa ng iilan ang pera na para sana sa taumbayan.

Napakahirap ng buhay ngayon, todo-kayod ang lahat, kaya huwag naman sanang masayang o manakaw ang kaban ng bayan na tulong para sa pagbangon ang bayan.

No ayuda sa pasaway, tablado

@Editorial | August 18, 2021

Tablado sa Department of Interior and Local Government (DILG) ang bantang ‘no ayuda policy’ sa pasaway sa quarantine at health protocols sa isang lungsod sa bansa.

Ang nasabing polisiya ay dahil sa paulit-ulit na paglabag ng mga residente sa lockdown. Panay pa rin ang gala at tambay. May iba na hindi na nga nakasuot ng facemask, dikit-dikit pa.

Marami na umano ang nagkakasakit, ang iba ay namamatay na nang hindi naa-admit dahil punuan na ang mga ospital.

Kaya kamay na bakal gamit ang ayuda ang nakitang paraan ng alkalde.

Gayunman, ayon sa DILG, hindi maaaring harangin ng sinuman ang ayuda, dahil labag ito sa batas.

Kung gusto raw ng mayor na magpataw ng multa, saka na lang ito singilin sa violators, pagkatapos maibigay ang ayuda.

Ang problema, P1, 000 lamang ang ayuda, habang ang multa sa pasaway ay umaabot ng hanggang P5, 000.

Kung marunong lang sanang sumunod ang bawat isa sa mga ipinatutupad na panuntunan sa gitna ng pandemya ay hindi na kailangang magka-isyu pa sa ayuda at sa batas.

Simple lang naman ang nais ng mga nagpapatupad ng protocols — sumunod. Hindi naman ito para sa iilan, ito ay para sa kaligtasan ng lahat.

Hindi man tayo makapag-ambag sa mga usapin kontra-COVID-19 na mga eksperto lang ang may kakayahan, napakalaking tulong na hindi na tayo makadagdag sa problema.