Mga drayber, hati kung susunod sa protocols o sa tawag ng ‘gutom’

@Editorial | August 24, 2021

Kahit ibinaba na sa modified enhanced community quarantine (MECQ) ang Metro Manila, tuloy ang pag-inspeksiyon ng Highway Patrol Group (HPG) ng Philippine National Police sa mga pampublikong sasakyan.

Kaugnay nito, masa limang UV Express ang nahuli dahil sa overloading.

Sa ngayon, hanggang 50 porsiyento lang ng kapasidad ng mga pampublikong sasakyan ang pinapayagan upang masunod ang health protocols kontra-COVID-19.

Gayunman, may ilang drayber na aminadong nagsasakay nang sobra dahil walang natanggap na ayuda, kaya kailangang kumita. Sa kabila nito, tiniketan pa rin ng mga awtoridad ang mga driver na lumabag.

Sa gitna ng pandemya, talagang nagtatalo ang kagustuhan nating makaiwas sa banta ng sakit at ang maka-survive sa pang-araw-araw na pangangailangan.

Mahirap sabihin sa mga drayber na unahin ang laban sa COVID-19, kung kumakalam naman ang sikmura nilang mag-anak.

Sa palagay natin, walang ibang higit na makapagpapaunawa nito sa kanila kundi ang ating pamahalaan. Patuloy din ang apela na kung may pondo pa naman na puwedeng ipang-ayuda ay ibigay na.

Kahit anong level ng lockdown, mga pasaway, walang pinipili

@Editorial | August 23, 2021

Umabot sa 9, 101 quarantine violators ang nahuli ng Philippine National Police (PNP) sa unang araw ng implementasyon ng modified enhanced community quarantine (MECQ) sa Metro Manila.

Tulad ng sistema, ang nahuhuling pasaway ay binabalaan, pinagmumulta o pinagko-community service.

Ang problema, parang balewala na sa kanila ang mga parusa, babalik at babalik pa rin sa tambay, paggala at pagdedma sa mga panuntunan laban sa COVID-19.

Panay ang paalala ng mga awtoridad na mag-facemask, ayaw. Sinasabihang tigilan ang kagagala kung saan-saan, ayaw manahimik sa bahay.

May mga tuloy din sa paggawa ng mga ilegal sa kabila ng paghihigpit. Halos araw-araw ay may nahuhuli sa droga, sugal at inuman. Balewala na sa kanila anuman ang maging lebel ng lockdown.

Lahat naman ay apektado sa pandemic, bagama’t iba-iba ang impact, pare-parehong hirap at kailangang magsakripisyo. Kung hanggang kailan, ‘yan ang hindi natin alam.

Ang pakiusap lang, kung wala namang mabuting maiaambag, ‘wag nang dumagdag sa problema.

Umaaray na ang mga frontliners, huwag na nating hintayin na layasan nila ang giyera sa COVID-19. Isipin natin na unang kawawa ay ang mga bata. Pilitin nating maranasan nila ang maligaya at ligtas na pamumuhay.

Mas maayos na pamimigay ng ayuda, ayos!

@Editorial | August 22, 2021

Patuloy ang pamimigay ng ayuda sa mga naapektuhan ng dalawang linggong Enhanced Community Quarantine (ECQ).

Kaugnay nito, tiniyak ng Department of Interior and Local Government (DILG) na maipamamahagi hanggang sa deadline ang ayuda, partikular sa mga residente ng National Capital Region (NCR).

Matatandaang nagpatupad ang pamahalaan ng mas mahigpit na quarantine protocols matapos makapasok sa bansa ang mas nakahahawang COVID-19 na Delta variant.

Sa ngayon, nasa 60 percent na ayuda na umano ang naipamahagi at inaasahang maibibigay na lahat sa loob ng limang araw o bago ang deadline sa Agosto 25.

Samantala, taliwas sa mga nagdaang distribusyon ng ayuda na magulo, masasabi umanong wala namang napaulat na super spreader event.

Kumbaga, naging mas sistematiko ang pamamahagi at disiplinado ang mga kumukuha.

Ito naman talaga ang nais nating mangyari sa tuwing may itinatawid na tulong sa taumbayan, ang maging maayos at maiwasan ang dagdag-problema sa gitna ng pandemya.

Malaking bagay talaga na nakikita at tinatanggap natin ang mga sablay sa nakaraan at ginagawan natin ng paraan upang maitama.

May ibang LGUs na mix ang ginagawang pamamaraan ng pamamahagi ng ayuda, ito ay sa pamamagitan ng electronic payment gamit ang G-cash at sa pamamagitan ng personal pamamahagi mismo sa mga indibidwal.

Ang iba ay house-to-house na ang ginawa para maiwasan ang kumpulan sa lugar kung saan ibibigay ang ayuda.

Sa huli tayo rin naman ang makikinabang.

Pakiusap naman sa mga benepisaryo, anumang halaga ang matanggap, gamitin natin ito para sa ating pamilya.

Wala na sanang mahuli na ginamit sa sugal, alak o anumang bisyo ang ayuda.

Mapalad tayong may napaghuhugutan ng pondo o may mabubuting puso na umaalalay sa atin.