‘Granular lockdown’, sana maging epektib kontra-COVID

@Editorial | August 28, 2021

Sa kabila ng pagluluwag sa community quarantine sa Metro Manila at iba pang lugar sa bansa, patuloy naman ang pagpapatupad ng ‘granular lockdowns’.

Sinasabing mas mainam na ‘to kaysa ang pag-lockdown sa isang siyudad o probinsiya.

Sa ilalim ng granular lockdown, mas limitado ang maaapektuhan, kung anong area lang ang may mataas na kaso ng COVID-19 ay doon lang maghihigpit.

Ang pagpapatupad ng granular lockdown ay isang hakbang din upang hindi mapuno ang mga ospital ng mga COVID-19 patient.

Kaugnay nito, inihirit naman ng Department of the Interior and Local Government (DILG) na dapat pagbawalang lumabas ang mga authorized persons outside residence (APOR) tuwing nagkakaroon ng granular lockdown para maiwasan ang pagkalat ng COVID.

Ito rin umano ang naging rekomendasyon ng technical working group dahil sa lumabas na data analytics mula sa Department of Health (DOH).

Base umano sa obserbasyon sa ipinatupad na Enhanced Community Quarantine (ECQ), maraming mga APOR ang nakakalabas at nagkakasakit, kaya nagkakaroon pa ng hawaan.

Kung uunawain, kahit naka-lockdown ang isang lugar, kung halos lahat naman ng tahanan ay may APOR na nalalantad sa banta ng COVID-19 na posibleng maiuwi sa bahay, parang wala rin.

Sana ay may sapat na kakayahan ang gobyerno para sa usaping ito.

Kung pipigilan sa paglabas ang mga APOR na nasa area na naka-granular lockdown, sana ay magawang masuportahan ang kanilang pamilya.

Muli, konting tiis pa sa pandemya, makakaraos din at makakabawi ang lahat.

Pamimigay ng ayuda, oks lang na ma-extend basta safe

@Editorial | August 27, 2021

Pinalawig ng Department of the Interior and Local Government (DILG) ang deadline para sa pamamahagi ng ayuda sa Metro Manila hanggang Agosto 31, 2021.

Umapela umano ang ilang LGUs sa Metro Manila ng dagdag na palugit sa pagkumpleto ng payout dahil sa limitadong manpower bunsod ng tumataas na kaso ng COVID-19.

Kasabay nito ang pagbati sa ibang LGUs sa NCR dahil umabot na sa 80.96 porsiyento o P9.1 bilyon sa P11.2 bilyong halaga ng ayuda ang naipamahagi na sa mga beneficiary hanggang Agosto 24.

Nangangahulugan itong walo sa 10 indibidwal ang nakatanggap na ng ayuda. Bagay na masasabing naging mas mabilis at maayos na ang pamimigay.

Una nang binigyan ang mga LGUs ng 15-araw upang makumpleto ang payout. Nagsimula ang distribusyon noong Agosto 11 at matatapos dapat noong Agosto 25.

Bagama’t hindi kinaya na matapos sa itinakdang petsa, ang mahalaga ay tuluy-tuloy ang pamimigay ng ayuda at nasusunod ang minimum public health standards sa gitna ng pandemic.

Mahirap namang may matanggap ngang ayuda, may maiuuwi namang sakit, mapupunta lang sa gamot ang ipinila.

Samantala, kung may mga kababayan tayong nakatanggap na ng tulong, may iba namang umaasang mabibigyan din. Napag-alamang may mga naninirahan sa liblib na lugar na apektado rin ng pandemya. Malayo man sa banta ng COVID-19, pero hindi sa gutom.

Apektado rin ang kanilang kabuhayan, lalo na silang mga umaasa sa pagbebenta ng pananim na dahil sa lockdown ay hindi nila naibababa sa bayan. Wala silang magawa kundi ang ibenta na lang nang palugi ang kanilang produkto.

Sana, mabigyan din sila ng pansin at agad na masaklolohan.

Lahat ay apektado ng pandemya, lahat ay dapat tulungan at magtulungan.

Isyu sa benepisyo ng health workers, matapos na sana

@Editorial | August 26, 2021

Matapos bigyan ni Pangulong Rodrigo Duterte ng ultimatum na sampung araw ang Department of Health (DOH) at Department of Budget (DBM) para mabayaran ang mga health workers na umaaray dahil hindi pa nakatatanggap ng kanilang mga benepisyo, kasado na ang budget.

Ayon sa DOH, may inilaan na P311 milyon para sa special risk allowance ng mga health workers.

Naisumite na umano sa DBM ang kaukulang dokumento para mailabas na ang pondo.

Hinihintay na lamang aniya nila ang special allowance release order (SARO) mula sa DBM para maipamahagi ang pondo sa mga pagamutan.

Sa wakas, mabibigay na ang dapat naman talaga ay matanggap ng mga frontliners na araw-araw ay nagsasakripisyo at mas pinipiling maglingkod sa kababayan.

Bagama’t hindi mapipigilan kung may mga napipilitang mag-abroad alang-alang sa kinabukasan ng pamilya, sana ay dumating pa rin ang panahon na hindi na kakailanganing lumayo at makipagsapalaran.

At silang mga gusto pa ring manatili sa sariling bayan para makapaglingkod, sana’y huwag pabayaan.

Huwag nating ipagdamot ang mga benepisyo o pagkakataong makapagbabalik sa kanila ng pasasalamat.

Sila ang mga bayani sa gitna ng pandemya na patuloy na nagiging matatag hanggang sa mapagtagumpayan ang labang ito.