Mga walang pakialam sa COVID-19, makonsensiya naman kayo!

@Editorial | August 30, 2021

Sa kabila ng patuloy na pagtaas ng bilang ng nagkaka-COVID-19, marami pa rin ang pasaway.

Talagang hindi na sila natatakot, para bang bahala na kung ano’ng mangyari sa kanila basta happy sila.

Tulad ng mga nahuli sa isang bar na sinalakay ng mga awtoridad. Sa gitna ng umiiral na Modified Enhanced Community Quarantine (MECQ) sa Metro Manila, may bar na bukas at naroon nagpa-party-party ang mga pasaway.

Nasa 52 na mga bisita ang natiketan dahil sa paglabag sa quarantine classification at protocol gaya ng physical distancing at iba pang health protocol.

May paglabag din ang bar dahil bawal ang dine-in at may mga patakaran pa sa curfew at pag-inom ng alak. Sasampahan naman ng kaso ang may-ari ng bar.

Malinaw na hindi nila nauunawaan ang sitwasyon. Ano ba’ng hindi malinaw sa bawal magpasaway kung ayaw mamatay o may madamay na inosente dahil sa kapabayaan?

Alam mo ‘yung todo-party now, virus later. Ang masaklap, iuuwi mo pa sa pamilya ang sakit na nakuha.

Habang marami na ang nawawalan ng pag-asa sa trabaho at kabuhayan, nariyan ang mga walang magawa sa buhay.

Talagang kailangan na ng mas matinding parusa sa mga lumalabag sa batas.

Nagkakaproblema na sa ating health sector, huwag na kayong dumagdag pa. Makonsensiya naman kayo.

Hangga’t may isang kaso ng COVID-19, wala tayong dahilan para magpabaya at magpasaway.

Kilos-protesta ng health workers, kasado na; gobyerno, galaw-galaw

@Editorial | August 29, 2021

Tiniyak ng mga health workers na tuloy na tuloy na ang kanilang kilos-protesta kaugnay ng usapin sa kanilang benepisyo.

Matagal nang problema ang anila’y mga pangakong napako ng pamahalaan sa gitna ng pandemya.

Kasabay nito, kumukonsulta na rin umano ang grupo sa mga legal experts hinggil sa posibleng paglatag ng kaso laban sa mga opisyal ng Department of Health (DOH).

Naniniwala silang napakalaking kapabayaan ang nangyayari at apektado ang kanilang hanay.

Giit ng mga health workers, marami nang buhay ang nawala at nawawala dahil sa kawalan ng resources, walang pondo at walang serbisyong accessible.

Hindi dapat gawing rason ang pandemya para sa kawalan ng aksiyon dahil matagal na tayo sa ganitong sitwasyon. Dapat anatuto na tayo at nakagawa ng paraan para makasabay at makalaban.

Lahat ay may kani-kanyang ginagampanan, kaya hindi dapat nagsisisihan sa halip ay nakatuon sa obligasyon at nagtutulungan.

Batay sa batas, ang kalusugan ay basic human right at dapat itong siguruhin ng estado. Anumang isyu o pagkukulang ay dapat ginagawan agad ng paraan.

Kung umaaray man ngayon ang mga kabahagi ng health sector, ito ay kanilang karapatan. Ang mga health workers ang nag-aalaga sa mamamayan, sino naman ang mag-aalaga sa kanila?

Tutal, nagbigay naman na ng ultimatum ang Pangulo, sana’y maging maayos na ang lahat.

Ibigay na ang nararapat para sa mga health workers.

‘Granular lockdown’, sana maging epektib kontra-COVID

@Editorial | August 28, 2021

Sa kabila ng pagluluwag sa community quarantine sa Metro Manila at iba pang lugar sa bansa, patuloy naman ang pagpapatupad ng ‘granular lockdowns’.

Sinasabing mas mainam na ‘to kaysa ang pag-lockdown sa isang siyudad o probinsiya.

Sa ilalim ng granular lockdown, mas limitado ang maaapektuhan, kung anong area lang ang may mataas na kaso ng COVID-19 ay doon lang maghihigpit.

Ang pagpapatupad ng granular lockdown ay isang hakbang din upang hindi mapuno ang mga ospital ng mga COVID-19 patient.

Kaugnay nito, inihirit naman ng Department of the Interior and Local Government (DILG) na dapat pagbawalang lumabas ang mga authorized persons outside residence (APOR) tuwing nagkakaroon ng granular lockdown para maiwasan ang pagkalat ng COVID.

Ito rin umano ang naging rekomendasyon ng technical working group dahil sa lumabas na data analytics mula sa Department of Health (DOH).

Base umano sa obserbasyon sa ipinatupad na Enhanced Community Quarantine (ECQ), maraming mga APOR ang nakakalabas at nagkakasakit, kaya nagkakaroon pa ng hawaan.

Kung uunawain, kahit naka-lockdown ang isang lugar, kung halos lahat naman ng tahanan ay may APOR na nalalantad sa banta ng COVID-19 na posibleng maiuwi sa bahay, parang wala rin.

Sana ay may sapat na kakayahan ang gobyerno para sa usaping ito.

Kung pipigilan sa paglabas ang mga APOR na nasa area na naka-granular lockdown, sana ay magawang masuportahan ang kanilang pamilya.

Muli, konting tiis pa sa pandemya, makakaraos din at makakabawi ang lahat.