Mas maraming supply ng bakuna, maging daan sana para sa mas maayos na kapaskuhan

@Editorial | September 03, 2021

Inaasahang magiging mas maayos at masaya ang Pasko at pagsalubong sa Bagong Taon dahil sa patuloy na pagdating ng mga bakuna.

Ayon kay National Task Force Against COVID-19 chief implementer Secretary Carlito Galvez, Jr., aabot sa 137 million doses ng vaccines ang kabuuang darating sa mga huling buwan ng taong kasalukuyan.

Sa ngayon, ang Pilipinas ay nakatanggap na ng kabuuang 51,900,590 doses ng COVID-19 vaccine doses na mga binili at mga natanggap na donasyon.

Kasabay nito, dumarami na rin ang nagpapabakuna bagama’t may ibang nag-aalangan pa rin, lalo na ‘pag may nababalitang nagkaka-COVID pa rin kahit bakunado na.

Kaugnay ng pagkakaroon ng sapat nang supply ng bakuna, target namang simulan na ang pagpapalawig ng vaccine rollout sa general population at sa mga batang may comorbidities sa susunod na buwan.

Dagdag-bakuna, dagdag-sektor na mababakunahan para maiwasang masayang ang mga bakuna.

Ngayong dumarami na ang nababakunahan sa National Capital Region (NCR), dapat na rin umanong magkaroon ng pantay na distribusyon ng COVID-19 vaccines sa ibang rehiyon at probinsiya.

Bukod sa pagpapabakuna, ang palagi naman nating paalala sa lahat ay alagaan ang kalusugan. Kumain ng masusustansiya, magpahinga, matulog sa oras at mag-quit na sa masasamang bisyo. Hindi lang naman COVID-19 ang sakit na puwede nating makuha kung magpapabaya at magpapasaway, marami pa.

Huwag nating sayangin ang nag-iisang buhay. Uulitin natin, huwag nang pasaway.

Mga pulis na ‘kamote riders’, tuluyan!

@Editorial | September 02, 2021

Viral ang video ng dalawang riders na sinasabing pulis habang nagsasagawa ng motorcycle stunts sa Zambales.

Makikita sa video ang dalawa na nasa magkahiwalay na motor, habang umaandar ay tumatayo, hindi nakahawak sa manibela, pakaway-kaway, ‘yung isa ay nasa isang side lang ang mga paa at sumasalubong pa sa kabilang linya.

Bukod sa ito’y malinaw na paglabag sa batas-trapiko, inilagay pa nila sa panganib ang kanilang buhay at ang buhay ng mga motorista at nasa kalsada. Isang halimbawa ng ‘kamote riders’ na hindi dapat tularan.

Kung trip pala nilang mag-exibition nang naka-motor, sana’y sa tamang lugar nila ito ginawa at hindi sa pampublikong kalsada. Hindi na nila naisip na maaari silang magdulot ng aksidente na ikapapahamak pa ng iba. Naturingang mga alagad ng batas, pasimuno sa pagpapasaway.

Hindi dapat palampasin ang ganyang pagpapabaya. Kailangang matukoy agad at mapatawan ng parusa para hindi na umulit at pamarisan pa.

Palaging paalala, hindi lang sa mga nagmo-motor kundi sa lahat ng drayber, bago sumakay ng sasakyan, ihanda ang sarili, magbaon ng disiplina, pasensiya, respeto at higit sa lahat common sense. Ang simpleng pagsunod sa batas-trapiko ay malaking bagay para mapangalagaan ang kaligtasan ng sarili, ng kasama sa sasakyan at ng mga kapwa motorista. Buhay ang nasa kalsada, huwag natin hayaang malagay sa alanganin dahil sa maling pag-iisip.

Sa mga kamote riders/drivers d’yan, magbago na kayo. Kung hindi n’yo kayang maging matino sa kalsada, mag-commute kayo!

Budget ng barangay, bantayang ‘di magamit sa halalan

@Editorial | September 01, 2021

Pumasok na ang ‘ber months’, bagama’t una nang nagparamdam ang paparating na halalan na mangyayari sa susunod na taon.

Dumidiskarte na ang mga nag-aambisyon sa puwesto at pati pandemya, ‘di pinalampas, todo-diskarte kung paano makukuha ang tiwala ng publiko.

Paalala lang, huwag gamitin ang kapangyarihan, lalo na ang kaban ng bayan para sa pamumulitika at pangangampanya.

Una nang nagbabala ang ilang mambabatas na maaaring magamit sa eleksiyon o kampanya ang bilyun-bilyong budget na laan para sa kapakinabangan ng taumbayan.

Partikular na tinutukoy ay ang P40 billion na proposed budget para sa Barangay Development Project (DBP) ng National Task Force to End Local Communist Armed Conflict (NTF-ELCAC).

Napag-alamang sa 822 barangay na benepisaryo ng BDP sa taong ito, 814 barangays ang nakatanggap na ng kabuuang P16.28 bilyon o 99 na porsiyento ng budget na nakalaan sa BDP.

Ang bawat barangay na idineklarang insurgency free ay makatatanggap ng tig-P20 milyong budget.

Kabilang sa 2,271 projects para sa mga komunidad ay ang 926 construction ng farm-to-market roads, classrooms, water and sanitation systems, health stations at livelihood projects.

Agad namang binigyang-linaw ni NTF ELCAC Barangay Development Project Director Monico Batle na malabong magamit sa halalan ang nasabing pondo dahil mahigpit ang alituntunin sa pamahalaan tulad ng Republic Act 9184 or the Government Procurement Reform Act.

May rules at monitoring system umano sa local at national level at maaari umanong suriin ng kahit sino ang mga proyekto na itinatayo sa mga barangay na na-clear na sa presensiya ng mga teroristang komunista.

May pagkakataon umano na nade-delay ang ilang proyekto dahil sa sobrang istrikto ng mga alituntunin, at nag-iingat din ang mga local chief executives sa paggastos ng pondo.

Puwede ring pumunta mismo sa mga liblib na barangay na benepisaryo ng BDP at inspeksiyunin ang mga proyekto.

Napakahalaga ng bawat sentimo, grabe ang pinagdaraanan ng lahat sa gitna ng pandemya.

Huwag nating hayaan na mapunta sa iilan ang pondo ng bayan na susi para sa muli nating pagbangon at pagpapanatili ng kaayusan at kapayapaan.

Ayaw natin sa karahasan, gayundin sa korupsiyon.