Travel ban binawi na, protocols mas dapat bantayan

@Editorial | September 06, 2021

Inaprubahan na ni Pangulong Rodrigo Duterte ang rekomendasyon ng Inter-Agency Task Force na alisin na ang travel restrictions sa India, Pakistan, Bangladesh, Sri Lanka, Nepal, United Arab Emirates, Oman, Thailand, Malaysia at Indonesia, simula ngayong araw, Setyembre 6.

Kaugnay nito ang paalala na ang mga international travelers na galing sa mga nabanggit na bansa ay kailangang sumunod sa testing at quarantine protocols kapag pumasok sa Pilipinas.

Matatandaang, una nang nagpatupad ng travel ban ang Pilipinas sa mga nabanggit na bansa dahil sa mataas na kaso ng COVID-19.

Bagama't patuloy ang pagtaas ng kaso ng nagkaka-COVID, umaasa tayong hindi ito lumala sa pagbawi ng travel ban.

Ang pakiusap sa mga kunauukulan, maging mas istrikto sa pagpapatupad ng protocols.

Hindi naman lingid sa kaalaman ng lahat kung paano dumidiskarte ang mga pasaway at ginagamit ang pagkakataon para magkapera.

Dapat bantay-sarado ang mga papasok ng bansa, tiyaking dumaan sa proseso.

Hindi dapat makalusot ang mga pekeng dokumento at walang makakapuslit sa quarantine.

Nais na nating matapos na ang ganitong sitwasyo dahil marami nang nasakripisyo, kailangan nang bumawi.

Muli, sa mga nagbabalak na gamitin pandemya para makapanloko at magkapera, makonsensiya naman kayo!

Okay lang dumiskarte sa gitna ng pandemya, basta legal

@Editorial | September 05, 2021

Naglipana na talaga ang mga scammers, gamit na gamit ang pandemya para kumita.

Ang matindi pati gobyerno ay ginagamit na rin para makapanloko.

Tulad ng nabunyag na modus-operandi ng isang grupo na ginagamit ang Bureau of Immigration (BI) para magbenta ng pekeng entry permit sa mga dayuhan sa pamamagitan ng social media.

Istayl ng grupo na magturo ng Immigration Officer sa mga dayuhan upang siyang mag-ayos umano ng permit sa kanilang pagpasok sa bansa. Subalit, mabubuking na lang ng biktima na bogus pala ang itinuro ng scammer at natangay na ang perang ibinayad.

Bukod sa mga pekeng entry permit, talamak din ang ilegal na pagbebenta ng mga pekeng vacccination cards at RT-PCR test result online.

Kaya tiniyak ng pamunuan ng Philippine National Police (PNP) na pinakikilos na ang kanilang Anti-Cybercrime Group para bantayan ang galaw ng mga scammers.

Dapat lang na managot ang mga pasaway na ‘to.

Nanawagan din ang kapulisan sa pubiko na agad isumbong sa mga awtoridad kung sakaling may maengkuwentrong manlokoko upang hindi na makapambiktima pa.

Sana’y magkaroon ng mas mabigat na parusa laban sa mga gumagawa ng masama at ilegal, lalo na ngayong may pandemya.

Hindi ito rason para manlamang ng kapwa.

Marami tayong kababayan na todo-kayod para maitawid ang pang-araw-araw, matuto tayong mamuhay nang patas.

Taas-presyo sa ‘Christmas products’, oks lang, basta ‘di sobra

@Editorial | September 04, 2021

Kamakailan nang ianunsiyo ng Department of Trade and Industry (DTI) ang bagong suggested retail price (SRP) sa 76 items.

Mula bente sentimos hanggang piso ang absolute minimum na pinayagan ng gobyerno na maitaas sa presyo ng mga produktong ito. Kabilang ang noodles, kape, gatas, condiments at pati non-food items tulad ng sabong panlaba.

Paliwanag ng ahensiya, matagal nang hindi gumagalaw ang presyo nito o noon pang 2019 humiling na magtaas ng presyo, subalit pinigilan muna ng DTI.

Hanggang sa aprubahan na dahil hindi naman anila puwedeng patuloy na pigilan ang paggalaw ng presyo ng ilang produkto dahil baka magresulta ito sa pagbagsak ng industriya, posibleng magsara o kaya ay magbawas ng mga manggagawa o tuluyan na silang hindi mag-produce at mawalan ng pagpipilian ang consumers — domino effect.

Siniguro naman ng DTI na bantay-sarado ang presyo para mapigilan ang pang-aabuso.

Kasunod nito, nanawagan din ang gobyerno sa mga manufacturers, partikular ng mga tinatawag na ‘Christmas products’ na huwag munang magtaas ng kanilang presyo.

Bagama’t, ito lang ang panahon kung kailan medyo makababawi, baka puwedeng kung magtaas man ay minimum lang.

Batid naman nating lahat ay gustong maging mas maayos at masaya ang Kapaskuhan, na kahit paano ay may mailalatag sa mesa na mapagsasaluhan ng pamilya.

Gayunman, wala nang higit na biyaya sa magkakasamang pamilya na malusog, nagmamahalan at puno ng pag-asa sa gitna ng pandemya.