Ayuda muna bago kampanya!

@Editorial | September 10, 2021

Wala talagang patawad ang mga ‘epalitiko’, epal na pulitiko.

Walang pinipiling panahon, makapagpapansin lang para sa ambisyon sa 2022 Elections.

Nagkalat ang mga tarpaulin sa kalsada, pa-greetings kuno ang nakasulat pero, mas malaki pa ‘yung pagmumukha sa binabati.

Ganundin sa telebisyon at radyo, kani-kanyang diskarte gamit ang COVID-19 infomercial.

Obvious na obvious din ang maagang pangangampanya sa pamamagitan ng social media. Ilang pulitiko na rin ang nakikipag-collaboration sa mga sikat na vloggers, YouTubers at influencers. Marami nga namang followers o netizens ang makakapansin sa kanila.

Hindi na nila naisip na katawa-tawa at sobrang pag-aaksaya lang ng pera ang ginagawa nilang pag-epal.

Nasa gitna tayo ng pandemya na maraming nawalan ng hanapbuhay at halos wala nang makain habang sila, abalang-abala kung paano magwawaldas ng pera para sa halalan.

Sana ‘yung pinanggastos sa tarpaulin, TV at radio ad at talent fee ng mga ginagamit na personalidad ay inilaan na lang na pang-ayuda.

Sa halip na binabalandra ang pagmumukha kung saan-saan, namigay na lang sana ng pagkain o kung sobrang paldo, ba’t hindi kayo magbigay ng trabaho o mapagkakakitaan sa mga nawalan ng kayod?

Madaling maging public employee o official pero, mahirap maging public servant.

Isipin n’yo muna kung ano ba talaga ang intensiyon n’yo sa pagpasok sa gobyerno.

Kung katulad lang din kayo ng iba na namuhunan sa kampanya at babawi ‘pag nakapuwesto na, tigilan n’yo, maawa naman kayo sa bayan.

Ekonomiya, bagsak na, binabaon pa

@Editorial | September 09, 2021

Marami ang nawindang sa laban-bawing eksena sa community classification.

Umasa ang mga manggagawa at negosyante na sa ilalim ng general community quarantine (GCQ) bagama’t may kasamang localized lockdown, ay muling makakabalik-hanapbuhay, pero biglang hindi tuloy.

Sinabayan pa ng pagtaas ng presyo ng mga pangunahing bilihin.

Walang trabaho, sarado ang ekonomiya, paano na?

May iba na sagad na ang ipon at lubog na sa utang. Walang magawa lalo na ‘pag “no work, no pay” na manggagawa.

Hindi na talaga kakayanin ang malawakang lockdown, panahon na para bigyang-daan ang ibang paraan. Marami naman ang pabor sa granular lockdown, kung saan pipiliin lamang ang mga lugar na kailangang ilagay sa mahigpit na quarantine, bakit hindi pa gawin?

Kung sa iba ay mabilis na lumilipas ang isang linggo, sa mga halos walang-wala na ay sobrang tagal na nito at masasabing kalbaryo. Saan huhugot ng pera pambili ng makakain? Saan kukuha ng ibabayad sa parating na mga bayarin? Butas na butas na ang bulsa ng mahihirap. Umaaray na rin ang mga nakakaluwag-luwag sa buhay. ‘Ika nga, bagsak na ang ekonomiya, ibinabaon pa.

Kung wala namang pang-ayuda o malinaw na plano, tigilan na ang palpak na lockdown, hayaan nang kumayod ang taumbayan.

Siguro naman ay nauunawaan na natin ang kahalagahan ng pag-iingat at paglaban sa virus at anumang sakit. Huwag nating hintaying tuluyang mawala ang COVID-19, nand’yan na ‘yan, kailangan na nating lumaban. Palagi nating sinasabi ang ‘new normal’, bakit hindi pa natin sabayan?

Kalidad ng edukasyon, piliting ‘wag maapektuhan ng pandemya

@Editorial | September 08, 2021

Limited, voluntary at targeted face-to-face classes ang isinusulong ng mga guro sa mga lugar na may mababang kaso ng COVID-19.

Nakababahala na umano ang pagiging epektibo ng ipinatutupad na blended learning sa kalidad ng edukasyon ng mga mag-aaral sa bansa.

Dapat na umanong payagan ng gobyerno ang ligtas na pagbabalik sa mga eskuwelahan sa pamamagitan ng limited face-to-face classes tulad ng pinaikling oras ng klase at bilang ng mga estudyante sa loob ng silid-aralan.

Napag-alaman na halos lahat ng bansa ay balik na sa face-to-face classes.

Una nang inanunsiyo ng Department of Education (DepEd) na planong isagawa ang pilot testing ng limited face-to-face classes sa 100 public schools at 20 private schools sa oras na aprubahan ni Pangulong Rodrigo Duterte, na ayon sa kanyang tagapagsalita ay posible nang mangyari.

Nakita at naranasan naman ng mga guro, estudyante at mga magulang ang malaking pagbabago sa edukasyon dala ng COVID-19 pandemic. Lahat ay nanibago at nahirapan at hindi maitatanggi na kailangan pang ayusin ang sistema.

Batid natin ang kagustuhang maitawid ang bawat school year upang hindi masayang ang panahon at pagkakataon na matuto ang mga bata. Ginagawan ng paraan upang hindi maging hadlang ang pandemya at kahirapan sa paghahatid ng edukasyon.

Saludo tayo sa bawat guro, mag-aaral, magulang at guardian na hindi tumigil at todo-kayod sa pagtuturo, pag-aaral at paggabay.

Sakaling maaprubahan ang pagbabalik ng face-to-face classes na limitado, umaasa tayong hindi malalagay sa alangin ang sitwasyon.

Pareho nating inaasam ang kalidad na edukasyon at siyempre ang kaligtasan ng bawat isa.