Mas de-kalidad na modules sa 'new normal education'

@Editorial | September 22, 2021

Kasunod ng pag-apruba sa limitadong face-to-face classes, tiniyak naman ang mas maayos na distance learning.

Ito ay sa pamamagitan ng pagtiyak sa mas de-kalidad na self-learning modules.

Ayon sa Department of Education (DepEd), pinagbuti pa ang modules para sa higit 26 milyong mag-aaral ngayong school year 2021-2022.

Marami umanong adjustments at talagang pinagbuti pa ang quality assurance process sa modules simula pa noong Enero.

Kabilang na ang pakikipag-ugnayan sa Philippine Normal University (PNU) para masuri ang mga materyales.

Para magkaroon ng better version ng modules, nagsagawa rin umano ng 2nd round ng quality assurance.

Bilang patunay, bumaba na umano nang husto ang bilang ng mga naiulat na mga mali sa modules simula noong Enero hanggang nitong Hulyo, kumpara sa higit 100 mali na nakumpirma noong Oktubre hanggang Disyembre.

'Ika nga ni Education Sec. Leonor Briones, natuto na silang mag-adjust sa ‘new normal education’ at hindi na mauulit ang mga nangyari sa nakalipas na school year.

Sana ganundin ang mga estudyante at kanilang mga nagsisilbing gabay sa distance learning.

Natutunan na sana natin ang kahalagahan ng pagpapatuloy ng edukasyon sa kabila ng pandemya.

Pagtanggap sa bagong sistema at pag-a-adjust ang kailangan at hindi ang pandaraya.

Ang tinutukoy natin ay itong nabuking na online kopyahan. Wala kayong ibang niloloko kundi ang sarili.

Ang pangunahing layunin ng pag-aaral ay ang matuto.

Voter registration sa mga mall umarangkada na, ingat sa virus, ingat sa epalitiko!

@Editorial | September 13, 2021

Umarangkada na ang pagpaparehistro sa mga mall para sa Halalan 2022.

Matatandaang binuksan ng Commission on Elections (Comelec) ang voter registration sa mga lugar na naka-modified enhanced community quarantine (MECQ), tulad sa Metro Manila.

Sa kabila ng pandemya, marami pa rin ang talagang desididong makapagparehistro para makaboto.

Palagi lang sanang tiyakin ng mga awtoridad na naipatutupad ang mga health protocols laban sa COVID-19. Gayundin ang mga nagpaparehistro, lagi tayong sumunod at huwag pasaway. Iwasan nating maging 'superspreader event' ito.

Ayon sa Comelec, umabot na sa milyon ang bagong registrants, lagpas sa inaasahang bilang na 4 milyon. Habang 62 milyon naman na ang mga rehistradong botante sa bansa para sa susunod na halalan.

Kailangang maging aktibo tayo sa pagtatalaga ng ating mga kinatawan.

Nakita naman na natin kung sino ang palpak at kung sino ang may pakinabang sa pandemyang ito. Tayo ay nasa panahon na mas madaling makita kung sino ang may 'K' at dapat na pagkatiwalaan.

Mag-ingat sa mga epalitiko at mga nagpapanggap na public servant.

Ang may dangal na lingkod-bayan ay kumikilos, may kamera man o wala.

Tapat sa tungkulin, may nakakakita man o wala.

Tapusin na natin ang panahon na namamayagpag ang mga sikat o may apelyido.

Kilatisin nating mabuti kung sino ba talaga ang higit na may kakayahan na maging lider ng bayan.

State of calamity, isang taon pa, laban pa more!

@Editorial | September 12, 2021

Pinalawig pa ni Pangulong Rodrigo Duterte ng hanggang Setyembre 2022 ang state of calamity sa buong bansa dahil sa COVID-19. Layon ng pagpapalawig ng state of calamity ay para maipagpatuloy ng gobyerno ang kanilang COVID-19 vaccination program at paggamit ng nararapat na pondo kabilang ang Quick Respond Fund. Nakasaad din sa Proclamation 1218 ang pag-atas sa mga awtoridad na i-monitor at kontrolin ang presyo ng mga basic necessities at prime commodities na magbibigay ng basic services sa mga tao.

Matatandaang, unang inilagay ang bansa sa anim na buwan na state of calamity dahil sa COVID-19 pandemic noong Marso 2020, hanggang pinalawig ito sa katapusan ng Setyembre ngayong taon.

Sa pamamagitan nito, umaasa tayong tuluy-tuloy ang paglaban sa pandemya at magiging mas mabilis na ang pamimigay ng ayuda at maglalatag ng solusyon.

Bagama’t non-stop naman ang pagtaas ng kaso ng nagpopositibo sa COVID.

Batay sa ulat ng Department of Health kahapon, muling nakapagtala ng record breaking na bagong kaso ng COVID-19, na nasa 26, 303. Sa ngayon, umabot na sa 2, 206, 021 ang naitalang kaso ng COVID sa bansa. Tila magkakatotoo ang pagtaya na papalo sa mahigit 40, 000 kaso kada araw ang maitatala.

Sa kabila ng mga paghihigpit, talagang kumakalat ang virus. Kaya dapat na mas dagdagan ang pag-iingat at disiplina.