Dagdag-disiplina at pasensya sa kalsada ngayong Kapaskuhan

by Info @Editorial | Dec. 12, 2024

Tuwing Kapaskuhan, isang bagay ang hindi nawawala — ang pagsisikip ng mga kalsada dulot ng dumaraming sasakyan at dagsa ng mamimili.

Ito ay nagiging mas matindi pa dahil sa mga hindi maiiwasang aksidente. 

Gayunman, sa kabila ng mga ito, ang ating pagtugon sa mga pagsubok na dulot ng trapiko ay may kinalaman sa ating disiplina at pasensya. 

Ang pasensya ay hindi lamang isang “kailangan” kundi isang pagsubok na dapat matutunan at sanayin ng bawat isa. 

Mahalaga rin ang disiplina — hindi lamang sa pagsunod sa traffic rules kundi pati na rin sa pagiging disiplinado sa oras. Kung ang bawat isa ay maglalaan ng tamang oras para maghanda at mag-commute, mababawasan ang mga biglaang pagsisikip sa kalsada. 

Ang mga simpleng bagay tulad ng pag-iwas sa mga shortcut, hindi pagpasok sa intersection kapag hindi naman kayang makatawid, at ang tamang pagtangkilik sa mga alternative routes ay malaking tulong sa pagpapagaan ng daloy ng trapiko. 

Huwag ding kalimutan ang pagiging mahinahon at magalang sa mga kasabay na motorista at pedestrian, dahil ang ‘di pagkakaroon ng malasakit sa isa’t isa ay nagpapalala lamang sa tensyon sa kalsada. 

Sa kabuuan, ang dagdag na pasensya at disiplina ay hindi lamang nakatutulong sa atin upang makatawid sa masikip na kalsada. Mahalaga ito upang magkaroon tayo ng mas maayos at mas ligtas na Kapaskuhan. 

Estudyante at guro, alalayan sa mental health problem

by Info @Editorial | Dec. 11, 2024

Magandang balita na pirmado na bilang batas ang “Basic Education Mental Health and Well-Being Promotion Act”.

Ito ay naglalayong ma-institutionalize ang mental health at well-being programs para sa basic education learners at teaching at non-teaching personnel sa mga pampubliko at pribadong paaralan. Sa pamamagitan nito, matitiyak na ang mga estudyante at titser ay “emotionally and mentally equipped to excel” sa gitna ng kinakaharap na modernong mga hamon.

Pinahihintulutan ng batas na ito ang mga paaralan na maging “sanctuaries of learning and of well-being”. Kung saan, ang mga “care center” ay itatatag sa bawat pampublikong paaralan ng pangunahing edukasyon, na pamumunuan ng isang school counselor, at tutulungan ng school counselor associates na magbibigay ng mga workshop sa pagpapayo at pamamahala ng stress at magpapatupad ng mga programa na makatutulong na mabawasan ang stigma sa kalusugan ng isip.

Mahalaga ang paglikha ng mga support system sa mga paaralan. Malaking tulong ang pagkakaroon ng mga programa at aktibidad na magtuturo sa mga estudyante at guro kung paano pangalagaan ang kanilang mental health at kung paano harapin ang stressors.

Para naman sa mga mag-aaral, hindi dapat ikahiya ang nararamdaman. Ang pagkakaroon ng bukas na pag-uusap tungkol sa mental health ay makatutulong upang mabawasan ang takot at pag-aalinlangan na humingi ng tulong.

Ang isang estudyante at titser na may malusog na kaisipan ay may mas mataas na pagkakataon na magtagumpay sa akademiko at magiging produktibong miyembro ng lipunan.

Kaligtasan ng mga Pinoy sa Syria, tiyakin

by Info @Editorial | Dec. 10, 2024

Patuloy ang paalala ng Department of Foreign Affairs (DFA) sa mga Pilipino na nasa Syria na iwasang makilahok sa anumang pagkilos.Kasunod ito sa ginawang pag-agaw ng mga rebeldeng grupo sa gobyerno ng Syria.

Ayon sa advisory ng DFA, marapat na iwasan ng mga Pinoy na makisawsaw sa nasabing kaguluhan at palagiang makinig sa mga paalala o babala ng gobyerno para maiwasan ang anumang masamang insidente.

Batay sa impormasyon, lumayas na sa Syria si President Bashar al-Assad kasama ang kanyang pamilya at sila’y nagtungo sa Russia matapos na kontrolin ng Islamist Hayat Tahrir al-Sham (HTS) group ang malaking bahagi ng Syria.

Bukod sa Syria, patuloy ang kinakaharap ng ating mga kababayan sa ibang bansa ang mga hamon dulot ng digmaan, kaguluhan, at mga krisis sa mga bansang kanilang pinagtatrabahuhan. 

Sa kabila ng hindi matatawarang kontribusyon ng mga overseas Filipino workers (OFWs) sa ekonomiya ng Pilipinas, ang kanilang kaligtasan at kapakanan ay patuloy na nagiging isang pangunahing alalahanin, hindi lamang ng gobyerno kundi ng buong bansa.

Ang mga Pinoy, partikular ang mga nagtatrabaho sa mga bansang may matinding tensyon ay patuloy na nahaharap sa panganib sa araw-araw. 

Bagama’t may mga hakbang na ginagawa ang ating gobyerno upang tiyakin ang kanilang kaligtasan, tulad ng pagpapadala ng mga konsulado at embahada para magbigay ng tulong, ito ay hindi sapat.

Mahalagang pag-isipan ng ating gobyerno ang patuloy na pagpapadala ng mga manggagawang Pilipino sa mga lugar na may malalim na sigalot. Bagama’t nauunawaan ang pangangailangan para sa trabaho, hindi maaaring isakripisyo ang kaligtasan ng bawat isa para lamang sa mga pansamantalang benepisyo. 

Sa mga pagkakataong may banta ng digmaan, ang pagpaplano ng mga alternatibong oportunidad at mga bansang ligtas para sa ating mga kababayan ay nararapat ikonsidera. Sa ganitong paraan, maiiwasan ang pagkalagay sa panganib ng ating mga kababayan.

Dapat tiyakin ng ating gobyerno na ang kanilang proteksyon ay isang prayoridad, at ang mga hakbang para sa kaligtasan ng mga kababayan natin ay hindi mawawala sa agenda ng pamahalaan.