Dahil Kapaskuhan, ceasefire muna sa pulitika

by Info @Editorial | Dec. 21, 2024

Ang Pasko ay panahon ng pagmumuni, pagninilay at pagbabalik-loob, marapat lamang na itigil muna ang matinding alitan at pagtutunggali sa larangan ng pulitika. 

Ang Kapaskuhan ay isang okasyon ng pagkakaisa, pagpapatawad at pagmamahalan — mga prinsipyong maaaring magsilbing gabay sa ating pagkilos hindi lamang sa mga oras ng kaligayahan, kundi lalo na sa mga oras ng hinagpis at paghihirap.

Ngayon, higit kailanman, tayo ay nahaharap sa mga hamon ng ating lipunan — mula sa mga isyu ng ekonomiya, mga pagsubok sa kalusugan at mga isyung nagdudulot ng pagkakawatak-watak. 

Sa kabila ng lahat ng ito, dapat nating maunawaan na ang tunay na diwa ng Pasko ay hindi nasusukat sa tagumpay sa pulitika, kundi sa kapasidad nating magtaguyod ng pagmamahal at pagkakaisa sa kabila ng mga pagkakaiba.

Ang panahon ng Kapaskuhan ay isang pagkakataon na magpatawad, magtulungan, at magsama-sama sa ngalan ng pag-ibig at pagkakapwa-tao. 

Kung atin sanang maipagpapaliban ang mga pampulitikang alitan, mas magiging magaan ang ating mga puso at isipan upang mas maramdaman ang tunay na espiritu ng Pasko. Ang mga pamilya, komunidad, at bansa ay may mas mataas na pangangailangan ng pagkakaisa ngayon — hindi lamang para sa pansariling kapakinabangan, kundi upang mapawi ang pasakit ng nakaraan at magsimula ng panibagong pag-asa. 

Sa mga darating na araw ng Kapaskuhan, hinihikayat natin ang lahat ng sektor — mula sa mga mambabatas, pulitiko, hanggang sa bawat isa sa atin — ceasefire muna sa pulitikal na laban. 

Magpokus tayo sa mga bagay na magbibigay ng ligaya at kapayapaan sa ating mga puso at sa ating mga mahal sa buhay. 

Tunay na diwa ng Simbang Gabi, ituro sa kabataan

by Info @Editorial | Dec. 20, 2024

Sa panahon ng Simbang Gabi, sadyang hindi na yata talaga mawawala ang mga pasaway. Sa Maynila, ilang menor-de-edad ang hinuli dahil sa pagkakasangkot sa riot ng dalawang grupo ng mga kabataan. Nangyari ang rambulan sa ikalawang araw ng Simbang Gabi.

Makikita sa CCTV ang habulan ng mga kabataan at dinig din ang dalawang putok ng hinihinalang improvised gun at pagliyab ng inihagis na molotov bomb. Nabulabog ang mga residente, may ilang sasakyang nadamay at may isang bata pang nabundol ng sasakyan.

Malaking perhuwisyo ang idinulot ng rambulan sa barangay na ginawang battleground. Bakit nga ba nagkakaroon ng rambulan sa mga kabataan tuwing Simbang Gabi? 

Ang sagot ay masalimuot at may maraming aspeto. 

Una na rito ang kakulangan ng kamalayan sa espiritwal na halaga ng Simbang Gabi. 

Sa halip na magsilbing pagkakataon upang magdasal at magnilay, ang iba sa mga kabataan ay nagiging abala sa tawanan, tsismisan at away.

Hindi nila nakikita ang kahalagahan ng Simbang Gabi bilang isang tradisyon na nagpapalalim sa pananampalataya at nagpapaalala sa tunay na kahulugan ng Pasko. 

Ang papel ng pamilya at komunidad ay napakahalaga sa pagtutok sa tamang pagpapalaganap ng mga tradisyong ito. 

Ang mga magulang ay may responsibilidad na turuan ang mga anak ng disiplina at tamang pag-uugali sa mga pampublikong okasyon, tulad ng Simbang Gabi. Samantalang ang Simbahan at mga lokal na pamahalaan naman ay may tungkulin ding magbigay ng mga programa na magpapalakas sa mga kabataan ng tamang pagpapahalaga sa mga tradisyon. 

Sa kabila ng mga problema kasabay ng Simbang Gabi, hindi pa huli ang lahat upang mapanumbalik ang diwa ng tradisyon. 

Sa pamamagitan ng pagtutulungan ng pamilya, Simbahan at komunidad, maaaring maituro sa mga pasaway na kabataan ang kahalagahan ng Simbang Gabi bilang isang pagkakataon para sa pagbabalik-loob at diwa ng pagkakaisa. 

TUPAD, dapat bantay-sarado

by Info @Editorial | Dec. 19, 2024

Masasabing isa sa magandang programa ng gobyerno ang Tulong Panghanapbuhay sa Ating Disadvantaged/Displaced Workers o TUPAD. 

Produkto ito ng 2009 General Appropriations Act (GAA) at ang nag-iimplementa ay ang Department of Labor and Employment (DOLE).

Isa itong emergency employment program na layuning tulungan ang mahihirap na walang trabaho o mga nawalan ng kayod dahil sa kalamidad at iba pang kadahilanan. 

Ang mga benepisyaryo ng programa ay mabibigyan ng pansamantalang trabaho at ang suweldo ay nakabatay kung ano ang umiiral na minimum wage.

Gayunman, hindi nawawala ang mga isyu sa nasabing programa.

Ilan sa mga tanong, lahat ba ng benepisyaryo ay talagang karapat-dapat? Nagagawa ba ang trabaho? Naibibigay ba nang maayos ang sahod?

Malaki ang pondong nakalaan sa nasabing programa kaya dapat lang na naipapatupad nang naaayon sa batas kaya kailangang bantayan.