Brgy. offc’ls na lalahok sa kampanya, dapat neutral

by Info @Editorial | Nov. 24, 2024

Ipinahayag ng Commission on Elections (Comelec) na puwedeng makilahok ang mga opisyal ng barangay sa kampanya para sa 2025 midterm elections.Gayunman, nilinaw ng komisyon na may pananagutan ang mga ito sa Department of the Interior and Local Government (DILG) kapag nakagawa ng mga pagkakamali.

Matatandaang nakasaad sa 2010 ruling ng Supreme Court (SC) na pinapayagan ang mga barangay official na makilahok sa pangangampanya ngunit kailangang sumunod sila sa mga alituntunin.

Ang barangay officials umano ay puwede pa ring patawan ng disciplinary action. Maaaring hindi election offense pero may ibang batas umano para rito. Ang tinutukoy na batas ng Comelec chief ay ang Republic Act No. 7160 o Local Government Code of 1991. Batay sa SC ruling, ang “political partisanship is the inevitable essence of a political office, elective positions included”. Nakasaad sa desisyon ng SC na hindi saklaw ang mga elected official sa pagbabawal sa mga opisyal at kawani ng serbisyo sibil na makilahok sa partisan political campaigning.

Ang mga barangay official ay may mahalagang papel sa ating lokal na pamahalaan. Sila ang mga taong pinakamalapit sa mga mamamayan at may direktang ugnayan sa mga isyung kinakaharap ng bawat barangay. 

Gayunman, ang pakikilahok ng mga barangay official sa kampanya ng eleksyon, lalo na sa mga pambansang eleksyon, ay isang isyung may malalim na implikasyon sa ating demokrasya at sa integridad ng mga halalan.

Marami pa rin ang umano’y sang-ayon na ang kanilang posisyon ay dapat na neutral at hindi nagiging sanhi ng ‘di pagkakapantay-pantay sa mga kandidato.Bagama’t, hindi maikakaila na noon pa man, sa bawat eleksyon, maraming barangay official ang nasasangkot sa pagpapalaganap ng mga pangalan at plataporma ng mga kandidato. 

Minsan, hindi nila nakikita na ang kanilang mga aksyon ay nagiging sanhi ng hindi pagkakapantay-pantay, lalo na sa mga barangay na may kontroladong administratibo at pinansyal na pondo na maaari nilang gamitin sa pagpabor sa mga kandidato. Ang ilan sa kanila ay nagiging aktibong kasapi ng mga campaign rally, pagkolekta ng donasyon, at minsan ay mismong nagpapakita ng paboritismo sa kanilang opisina.

Pero, kung ang pasya ng kinauukulan ay payagan silang makilahok nang may kaakibat na alituntunin, nawa’y sumunod ang lahat upang mapanatili ang integridad ng ating halalan.

Mga naghahanap ng dyowa, target ng mga scammer, ingat!

by Info @Editorial | Nov. 23, 2024

Muling nagpaalala ang Department of Information and Communications Technology (DICT) sa publiko na mag-ingat sa mga naglipanang love scams ngayong holiday season.

Dahil damang-dama na ang papalapit na Pasko, uso na naman ang love scam na target makapambiktima ng mga malalamig ang Pasko.

Sa naging pahayag ng DICT, sinabing kadalasang nabibiktima ng ganitong modus ay mga single na naghahanap ng dyowa lalo na online. Kaya hinihimok ang publiko na maging mapagmatyag para hindi mabiktima ng ganitong modus.

Sakaling mabiktima, i-report agad sa mga otoridad para mabigyan ng aksyon.

Nakapanlulumo lang talaga na sa panahon sana ng kasiyahan at pagbibigayan, isang malungkot na katotohanan ay ang patuloy na paglaganap ng mga scam o panloloko. 

Sa halip na magkaisa at magdiwang, tila may mga tao pa rin na nagsasamantala sa kalagayan ng iba para kumita sa paraang hindi tapat. 

Ang Pasko ay panahon ng pagkakawanggawa at malasakit, ngunit sa kabila ng mga makulay na ilaw at saya ng Kapaskuhan, may mga ulat ng mga taong naloloko ng mga scammer.

Nagkalat ang mga scammer na gumagamit ng mga emosyonal na puwersa upang manghikayat ng simpatiya at pagkahulog sa kanilang mga patibong. 

Kaya mahalaga ang pagpapalaganap ng kaalaman sa publiko tungkol sa mga uri ng scam at kung paano ito maiiwasan. Dapat na maging mapanuri at mag-ingat sa mga alok na masyadong maganda upang maging totoo. 

Kailangan nating paigtingin ang mga hakbang upang maparusahan ang mga scammer, pati na rin ang pagsugpo sa mga online platform na nagsisilbing pugad ng kanilang mga gawain. 

Huwag hayaang maging sanhi ng kasawian ang mga malulupit na gawain ng ilang tao sa panahon ng Pasko.

Senior, ‘wag na sanang pahirapan sa pension

by Info @Editorial | Nov. 22, 2024

Sa bawat komunidad, may mga senior citizen na nagbibigay ng kanilang panahon at lakas upang makapag-ambag sa pag-unlad ng ating bansa. 

Sa kabila ng kanilang mga serbisyo at sakripisyo, hindi maitatanggi na marami pa rin sa kanila ang nahihirapan sa mga aspeto ng buhay, lalo na sa pinansyal. 

Kaya’t ang social pension na ipinagkakaloob sa mga senior ay nagsisilbing lifeline para sa mga walang sapat na kita. 

Gayunman, bagama’t layunin nitong magsilbing tulong, marami pa ring isyu na nagiging sagabal sa tamang pamamahagi nito.

Una, ang pagiging limitado ng pondo para sa social pension ay nagiging sanhi ng pagkaantala ng distribusyon ng ayuda. Marami sa mga lolo’t lola na nangangailangan ay hindi nakakakuha ng sapat na suporta sa oras ng pangangailangan. Mahalaga na pagtuunan ng pansin ang pagpapalawak at pagtaas ng pondo ng programa upang mas maraming senior ang makinabang.

Ikalawa, may mga usapin din hinggil sa mga proseso at dokumentasyon. Ang mga matatandang may edad at mayroong mga karamdaman ay nahihirapan na sa mga dokumento para makuha ang pensyon. Dapat na magkaroon ng mas pinadaling sistema. 

Ikatlo, ang tamang impormasyon ay napakahalaga upang mapabilis ang distribusyon ng social pension. Marami sa mga senior ang ‘di alam na kuwalipikado pala sila para sa pensyon, kaya’t may mga pagkakataon na hindi nila natatanggap ang tulong na para sa kanila.

Ang mga solusyon para sa pagpapabuti ng social pension ay hindi lamang tungkol sa pagbibigay ng pondo, kundi sa pagpapalawak ng serbisyo at pagtutok sa mga senior na may pangangailangan.