Tulong sa mga pasyente, ‘wag sanang maantala

by Info @Editorial | Nov. 27, 2024

Pansamantala umanong ititigil ng Department of Social Welfare and Development (DSWD) ang pagbibigay ng guarantee letter (GL) simula Disyembre 13, 2024.

Paliwanag ng ahensya, ito ay upang mapagtuunan nila ang pag-aasikaso sa mga kinakailangang dokumento para mabayaran ang mga service provider na nagsisilbing partner nito.

Kaya hindi muna makapagbibigay ng GL sa mga may pangangailangang medikal gayundin umano sa funeral expenses na nagkakahalaga ng P10,000 pataas.

Hindi naman daw ito nangangahulugan na wala nang pondo ang ahensya kundi, kailangan lamang pagtuunan ang iba pa nitong responsibilidad.

Tiniyak naman ng DSWD na kapag naayos na ang lahat ng kanilang obligasyon sa mga service provider, magbibigay na uli ng GL sa mga nangangailangan.

Kaugnay nito, hindi maiiwasang mangamba ang publiko. Paano na ang mga magkakasakit? 

Hindi ba maaaring gawan ng paraan na hindi matigil o maantala ang pagtawid ng tulong sa mga nangangailangan?

Pagsirit ng presyo ng petrolyo, sumasabay sa ingay ng pulitika

by Info @Editorial | Nov. 26, 2024

Tila sumasabay ang pagsirit ng presyo ng petrolyo sa ingay ng pulitika sa bansa ngayon.

Kung saan, muling nag-anunsyo ang mga kumpanya ng langis ng taas-presyo, na nagdudulot naman ng sakit sa ulo at pagkabahala sa mga mamamayan, partikular na sa mga sektor na umaasa sa abot-kayang gasolina at iba pang produktong petrolyo. 

Sa kabila ng mga pangako ng gobyerno na magpapatuloy ang mga hakbang upang mapagaan ang epekto ng mga pagtaas na ito, ang tanong ng marami, “hanggang kailan pa ba maghihirap ang karaniwang Pilipino sa patuloy na pagtaas ng presyo ng langis?”

Ang bagong taas-presyo sa petrolyo ay nagpapakita ng patuloy na impluwensya ng mga global na salik tulad ng mga pagbabago sa produksyon at distribusyon ng langis, pati na rin ang mga geopolitikal na tensyon na nakakaapekto sa merkado. 

Bagama’t mahirap kontrolin ang mga global na puwersa, hindi maiiwasang magdulot ito ng domino effect sa mga lokal na presyo ng mga bilihin. Kasama na rito ang mga pangunahing produkto tulad ng pagkain, gamot, at transportasyon, na pawang umaasa sa abot-kayang langis upang mapanatili ang presyo at produksyon.Sa kabila ng mga pagsisikap ng gobyerno upang magbigay ng mga ayuda tulad ng fuel subsidy at mga pondo para sa mga sektor na apektado, hindi pa rin maitatanggi na ang epekto ng patuloy na pagtaas ng presyo ng langis ay malaki. 

Para sa mga ordinaryong mamamayan, ang patuloy na pagtaas ng presyo ng gasolina at iba pang produktong petrolyo ay nagdudulot ng dagdag na pasanin sa kanilang pang-araw-araw na buhay. 

Sa mga hindi kayang sumabay sa mga pagtaas ng presyo, ang kanilang kakayahang bumili ng mga pangunahing pangangailangan ay lumiliit, kaya’t nagsisilbing dagdag na pahirap ito sa kanilang kalagayan.

Ang mga hakbang tulad ng pagsulong ng mga alternatibong pinagkukunan ng enerhiya at pagtutok sa mga renewable energy sources ay isang magandang panimula. 

Trabaho naman, ‘wag puro ayuda

by Info @Editorial | Nov. 25, 2024

Mabigat ang naging pahayag ni Vice President Sara Duterte kaugnay sa mga ayudang ipinamimigay ng gobyerno.

Aniya, ang vote buying ngayon ay nakatago umano sa pangalan ng ayuda tulad ng Assistance to Individual in Crisis Situation (AICS), Ayuda sa Kapos Ang Kita Program (AKAP) at Tulong Panghanapbuhay sa Ating Disadvantaged/Displaced Workers (TUPAD)

ng Department of Labor and Employment (DOLE).

May iba na ring nakakapansin na may ilang pulitiko nga na habang namimigay ng ayuda na kung umasta ay para bang sa sarili nilang bulsa ito nanggaling na ang totoo ay mula naman sa kaban ng bayan.

Itinanggi naman ni Department of Social Welfare and Development (DSWD) Secretary Rex Gatchalian ang akusasyon ni VP Sara.

Ayon sa kalihim, patuloy ang pagproseso ng mga aplikasyon at pamamahagi ng ayuda para sa mga kuwalipikadong benepisyaryo ng nasabing mga programa. 

Bagama’t ang ayuda ay isang sagot sa mga pangangailangan ng mamamayan, isang mahalagang usapin na dapat pagtuunan ng pansin — ang trabaho. 

Habang patuloy sa pagbibigay ng ayuda, dapat ay tumutok din sa paglikha ng mga oportunidad sa trabaho.

Ang ayuda ay hindi masama, ngunit ito ay dapat ituring lamang bilang pansamantalang hakbang, hindi isang pangmatagalang solusyon. 

Ang tunay na pagbabago ay nagmumula sa kakayahan ng bawat isa na kumita, magtrabaho, at makapag-ambag sa lipunan. 

Kung puro ayuda na lamang, nawawala ang tunay na potensyal ng tao na magtagumpay sa pamamagitan ng sariling pagsisikap. 

Hindi sapat na magbigay lamang ng mga ayuda na mabilis nauubos, kailangang lumikha ng mga sektor at industriya ng trabaho na magpapalago sa ekonomiya.