Gang war ng mga kabataan, ‘wag balewalain

by Info @Editorial | Jan. 27, 2025

Halos sunud-sunod at tumitindi ang mga insidente ng karahasan sa mga menor-de-edad. 

Ang mga batang ito, na dapat sana’y nag-aaral at nagkakaroon ng mas maliwanag na kinabukasan ay nasasangkot sa karahasan at kriminalidad. 

Ang resulta, may mga buhay na nasisira, pamilyang nagdadalamhati at isang lipunang magulo. 

Isang malaking bahagi ng problema ay ang kawalan ng sapat na suporta at oportunidad para sa mga kabataan sa komunidad. Madalas, ang mga batang ito ay lumalaki sa lugar o sitwasyon na limitado ang pagkakataon para sa isang mas magandang buhay. 

Sa ganitong kalagayan, madaling mangyari na mapadpad sila sa mga grupo ng kabataang sangkot sa gang wars. 

Ang mga gang na kadalasang may matinding impluwensya sa mga komunidad ay nagbibigay ng pakiramdam ng pagkakakilanlan, kapangyarihan at pansamantalang solusyon sa mga suliranin. 

Ang edukasyon at mga programang pang-komunidad na nagbibigay ng alternatibo sa gang culture ay may malaking bahagi sa pag-iwas sa ganitong karahasan. 

Dapat na magkaroon ng mas matinding aksyon laban sa mga karahasan at kasabay nito ang pagpapalakas sa mga programa para sa rehabilitasyon ng mga batang biktima ng ganitong sitwasyon. 

Ang paglutas sa problema ng karahasan sa mga menor-de-edad ay hindi madali, ngunit ang pagbabago ay magsisimula sa pagpapahalaga sa buhay ng ating mga anak.

Ang bawat hakbang tungo sa isang mas ligtas na komunidad ay isang hakbang patungo sa isang matagumpay na hinaharap para sa mga kabataan ng ating bayan.

Smuggled na gulay, delikado, ingat!

by Info @Editorial | Jan. 26, 2025

Nagbabala ang Department of Agriculture (DA) kaugnay sa pagbebenta ng mga smuggled o puslit na mga gulay sa merkado. Sa pag-iikot ng DA, Department of Trade and Industry (DTI) at local government unit officials, may mga napansing mali sa packaging ng mga gulay na ang ilan ay nahuling nasa Chinese characters pa.

Hindi rin umano nag-isyu ang Bureau of Plant Industry (BPI) ng SPS import clearance sa mga naturang produkto gaya ng onion sticks, Chinese yam, broccoli at sili mula sa China.

Patunay na hindi dumaan sa tamang proseso ng importation ang mga nasabing produkto.

Ang isyu ng smuggling ay patuloy na isang malalang problema sa ating bansa. 

Sa bawat taon, libu-libong tonelada ng smuggled products ang dumadaan sa ating mga border na hindi sumailalim sa tamang proseso at regulasyon. 

Ang ganitong uri ng gawain ay may malalim na epekto sa ating ekonomiya at kalusugan. Isa rin sa mga pangunahing epekto ng smuggling ng gulay ay ang pagbaba ng kita ng mga lokal na magsasaka. 

Nakakaapekto rin ito sa mga lokal na pamilihan at mga negosyo. Higit pa rito, may seryosong banta ang smuggling ng gulay sa kalusugan ng mamamayan. Dahil hindi dumaan sa tamang inspeksyon, may mga pagkakataon na ang mga ito ay kontaminado ng mga kemikal o pesticides.

Hindi lamang ito isang usapin ng ekonomiya, kundi pati na rin ng kaligtasan ng bawat Pilipino.

Kung nais natin ng mas maunlad na ekonomiya at mas ligtas na kalusugan para sa lahat, kailangan nating magsanib-puwersa upang labanan ang smuggling at itaguyod ang interes ng mga lokal na magsasaka at konsyumer.

Ayuda, bantayang ‘di magamit sa kampanya

by Info @Editorial | Jan. 25, 2025

Ang pamamahagi ng ayuda ng Department of Social Welfare and Development (DSWD) ay isang hakbang upang matulungan ang mga mamamayang nasa laylayan.

Gayunman, tulad ng iba pang mga programa ng gobyerno, hindi maiiwasan ang mga isyu at kontrobersiya na dulot ng maling paggamit ng pondo. 

Isa sa mga ito ay ang sinasabing paggamit ng ayuda sa panahon ng kampanya para sa halalan, na malinaw na isang uri ng pang-aabuso sa mga benepisyaryo at isang hakbang na naglalayong makinabang ang mga pulitiko sa pamamagitan ng kanilang posisyon.Ang pangunahing layunin ng ayuda ay magbigay ng agarang tulong sa mga mahihirap lalo na sa panahon ng kalamidad, krisis pang-ekonomiya at mga natural na sakuna. 

Ang mga ito ay hindi inilaan para sa pansariling kapakinabangan ng mga pulitiko, kundi para sa kapakanan ng mga nangangailangan. Kung gagamitin ang mga ito upang makuha ang boto ng mga mamamayan, nagiging mali ang layunin at nagiging isang uri ng panloloko sa taumbayan. 

Hindi nararapat na gawing kasangkapan ang mga mahihirap upang magtagumpay ang isang pulitiko sa eleksyon.Bilang mga botante, mahalagang maging mapanuri at mulat sa mga ganitong uri ng manipulasyon.

Huwag hayaang mabiktima ng maruming taktika sa kampanya. 

Sa halip, dapat nating pagtibayin ang ating paninindigan na ang bawat boto ay batay sa track record, plataporma, at tunay na hangarin ng isang kandidato at hindi sa pansamantalang tulong na ipinagkakaloob lamang sa panahon ng halalan.