Guce, naka-podium sa Tucson Tour Golf

ni Eddie M. Paez Jr. - @Sports | April 11, 2023

Winakasan ni Clarisse Guce ang kalahating taon ng tagtuyot sa tulong ng isang podium finish sa Epson Tour: Casino Del Sol Golf Classic na ginanap sa Tuczon, Arizona kamakailan.

Naging susi sa pag-angkin ni Guce ng pangatlong puwesto ang nagliliyab na bogeyless 66 sa huling yugto para mairekord ang kabuuang 12-under-par 276. Bukod sa lumobong 73 sa pambungad na round, matalim na tinambalan ng Pinay ng 68 at 69 ang kanyang kartada para maibulsa ang pabuyang $12,286.

Kinapos lang ng dalawang palo ang naging kabuuang iskor ng anak ng dating tanyag na hinete sa bansa dahil sa markang 14-under-par 274 na naiposte ng nagkampeong si Gigi Stoll ($30,000). Samantala, si Natasha Andrea Oon ($18,996) ay may isinukong 13-under-par 275 kaya nakuha ang pangalawang puwesto habang nakapantay ni Guce sa huling upuan ng podium si Lindsey McCurdy.

Matatandaang noong Setyembre 2022 ay nasungkit niya ang panglimang baytang ng Murphy USA El Dorado Shootout (Arkansas) gayundin ang runner-up honors sa Guardian Championships (Robert Trent Jones Golf Trail, Pratville, Alabama). Hunyo naman nang tumersera ang 32-anyos na lady parbuster sa Island Resort Championship sa Sweet Grass Golf Club, Harris, Michigan.

Sa Epson Tour Moneylist, sumampa sa pang-15 na posisyon si Guce. Sa kasalukuyan ay tanging siya lang ang Pinay na nakapasok sa top 20.

Biado, nagkampeon sa MP Kalinangan 10-Ball

ni Eddie M. Paez Jr. - @Sports | March 17, 2023

Hinirang na kampeon si dating World Games gold medalist "Black Tiger" Carlo Biado sa Manny Pacquiao Kalinangan 10-Ball Open Singles sa General Santos kamakailan.

Samantala, sasargo na ang Women In Sports 9-Ball Cup ngayong Marso 25-26 kung saan inaasahang papagitna ang may 68 lady cue artists mula sa Bacolod, Naga, Zamboanga, Laguna at sa Kamaynilaan kung saan masasaksihan ang kompetisyon.

Matapos naman ang pananatili sa ospital, muling nasaksihan ang angas na nagbigay rin kay Biado ng US Open na korona nang tapusin ng dating caddy ang paligsahan sa GenSan na walang talo.

Tinuruan ni Biado ng leksyon si Socram Moliva (7-4), sadsad sa kanya si Wilfredo Banluta (7-1) bago binokya si Arnulfo Ejida (7-0) sa dulo ng qualifiers.

Sa knockout stage naman, umangat ang kampeon kontra kay Michael Feliciano (final 32, 8-6), bago niya tinalo sina Jhon La Garde (round-of-16, 8-3), Jeffrey Ignacio (quarterfinals, 8-6) at "The Dragon" Anton Raga (semifinals, 9-8) para makapasok sa pangkampeonatong duwelo kontra kay Emmanuel Delgado. Sa huling laro ng paligsahan, pinaglaruan ni Biado si Delgado sa iskor na 10-4.

Kabilang sa mga kilalang bilyaristang kinapos sa torneo sina Kyle Amoroto, Indonesian Piala Birgilir 9-Ball Open winner, dating World 8-Ball champion "Robocop" Dennis Orcullo at si Asian 9-Ball Championships runner-up "Dodong Diamond" Zorren James Aranas.

Hester, sumiklab sa Hotshots, Amoroto Champ sa Indonesia

ni Eddie M. Paez Jr. / Clyde Mariano @Sports | February 11, 2023

Umiskor si Antonio Hester ng 28 points at sumunggab ng 12 rebounds sa una niyang laro sa Magnolia Chicken Timplados bilang import at sa wakas nakapanalo rin ang Hotshots, tinalo ang Phoenix Super LPG, 108-95 kahapon sa 2023 PBA Governors’ Cup sa SM Mall of Asia Arena.

Maagang nagpasiklab si Hester sa 13 puntos sa first-half at ilayo sa 58-36 lead sa break period. Lumagare ang Hotshots ng 63-36 lead sa third, pinakamalaking kalamangan sa ballgame. Nailagay na ang Magnolia sa win column sa unang pagkakataon matapos na matalo sa unang tatlong laro, ito ay nang palitan ni Hester ang hindi epektibong laro ni Eric McCree bilang import.

Samantala, pinakislap ni Kyle Amoroto ang tatlong kulay ng bandila ng Pilipinas nang magtagumpay ito sa pag-akyat sa trono ng Piala Birgilir 9-Ball Open Tournament sa Indonesia.

Pinatumba ng sinasabing kinabukasan ng Philippine billiards sina local bets Roy Wijaya (finals, 8-5) at Sopian Anwar (semifinals, 8-7) sa homestretch ng kompetisyon tungo sa kampeonato.

Tumapos sa likod nina Amoroyo at Wijaya bilang joint 3rd placer ang iba pang mga kinatawan ng punong-abala na sina Tokyo Jawab Barat at Sopian Anwar. Hanggang semifinals lang umabot sina Tokyo at Sopian.

Nagsilbi itong malupit na sundot sa mainit na pagsibad ng billiards carèer ni Amoroto dahil kinoronahan din siya kamakailan bilang hari ng 2022 Philippine 10-Ball Open. Sa naturang kompetisyon sa Quezon City, tinalo ng 20-anyos na pambato ng Taytay, Rizal si Paul John "Saging" Ladao sa kanilang pangkampeonatong salpukan, 19-9.

Nangibabaw din ang husay ni Amoroto sa Glory Lumber Year of the Rabbit Open 10-Ball Tournament noong nakaraang buwan.