French Open organizers, kakasuhan dahil sa COVID-19

ni Eddie M. Paez Jr. - @Sports | October 2, 2020

Nagbabanta ng pagresbak ang isang tennister matapos itong maobligang umalis sa French Open dahil sa pagiging diumano ay positibo sa COVID-19 bagamat kalaunan ay hindi naman napatunayan.

“Do I want to sue Roland Garros? Yes obviously!” pahayag ng Kastilang si Fernando Verdasco sa pinag-iisipan nitong hakbang bunga ng mga kaganapang hindi pumabor sa kanya.

Ganitong landas din ang napaulat na planong baybayin ni Damir Dzumhur matapos itong mawala sa eksena dahil ang coach ng tennister mula sa bansang Bosnia and Herzegovina ay naging positibo naman sa nakamamatay na coronavirus.

Sabi ni Verdasco, humahanap siya ng pagkakataong mapatunayan na mali ang naging resulta ng test sa kanya noong Agosto. Asymptomatic ang dating world no. 7 at sa huling subok ay negatibo ito sa COVID-19.

Lumambot na ang mga patakaran ng nangangasiwang French Tennis Federation simula noon at sinabing kung kayang patunayan ng mga kalahok na nasa magandang estado ang kanilang kalusugan ay hindi sila ituturing na nakakahawa.

“Nobody can believe that a tournament like Roland Garros can do something like that.” paghihimutok pa ng 36-taong-gulang na manlalarong kabilang na sa limang kalahok na napilitang umayaw mula sa grandslam event dahil sa pagiging COVID-19 positive.

Idinagdag pa niya na, ”It is not a thing about money, it is about damage which this does to you personally and professionally. They do things as they please without any coherence and without any respect. The rights of the players count for nothing.”

Si Milos Raonic ng Canada at si Swiss world no. 10 Belinda Bencic ay kapwa nasipa na rin palabas ng torneo dahil sa katulad na rason.

Parbuster Saso, bagong mukha ng JLPGA

ni Eddie M. Paez Jr. - @Sports | October 1, 2020

Ipinagbabawal ang mga manonood sa mga maiigting na torneo ng ginaganap na Japan Ladies Professional Golf Association (JPLGA) Tour upang hindi lumaganap ang COVID-19 kaya hindi nila nasasaksihan ang patuloy na pamamayagpag ng isang bagitong dalagita mula sa Pilipinas.

Pagkatapos ng anim na paligsahan sa post-lockdown season kung saan tahimik ang mga golf courses, nagsisilbing mukha ng JPLGA si rookie Fil-Japanese Yuka Saso dahil sa pamamayagpag nito sa Mercedes Benz Player of the Year Derby at sa paghawak nito ng trangko sa iba't-ibang departamento ng malupit na tour.

Sa bakbakan para sa Player of the Year, may naipon na ang double Asian Games gold medalist ng 687.35 puntos upang makadistansiya nang maayos sa pumapangalawang si Sakura Koiwai na meron lang nakolektang 544.0 puntos.at sa pumapangatlong si Saki Nagamine (507.25 puntos).

Alagwa pa rin sa Money Ranking ang dalagita bunga nang napagwagian na niyang JPY 63,964,000 samantalang nasa malayo ang pagkakabuntot nina Ayaka Watanabe JPY 52,228,000 (pangalawa) at si Nagamine JPY 45,184,000 (pangatlo).

Una pa rin sa talaan ng scoring average ang 19-taong-gulang na pambato ng Pilipinas dahil sa kanyang markang 69.381 strokes kontra sa 69.70 at 70.1053 nina Koiwai at Ayaka Furue ayon sa pagkakasunod-sunod.

Sa paramihan naman ng eagles, nasa unahan pa rin ng pulutong si Saso dahil sa nairehistro niyang tatlo habang sa karera para birdies, siya pa rin ang may hawak ng trangko sa bilang na 86.

At siyempre, sa paramihan ng torneong napagwagian, ang Pinay pa rin ang una dahil nakasikwat na ito ng dalawang korona (Nitori Ladies Golf Tournament at NEC Karuizawa 72 Golf Tournament) bagamat ilang buwan pa lamang siya sa mundo ng professional golf. Bukod dito, meron pa rin siyang dalawang beses na pagkakataong nakapuwesto sa top 10.

Pagdanganan, sasabak na uli sa Ladies PGA

ni Eddie M. Paez Jr. - @Sports | September 17, 2020

Muling sasabak sa hanay ng mga “pro parbusters” si Southeast Asian Games double gold medalist Bianca Pagdanganan ng Pilipinas sa dikdikang Ladies Professional Golf Association (LPGA) Cambia Portland Classic na hahataw sa loob ng apat na araw sa palaruan ng Columbian Edgewater Country Club sa Portland, Oregon simula ngayong Huwebes.

Nakahablot ng upuan sa kompetisyong may nakalaang na USD 1,750,000 para sa mga magpo-podium ang 22-taong-gulang na Pinay dahil sa pagpasok nito sa top-45 ng LPGA Qualifiers noong nakaraang taon.

Tatlong torneo na ang naging bahagi ng sumisibol na professional career ni Pagdanganan at sa ngayon ay hindi pa naoobligang lumingon sa tikas niya ang mga miron. Sa LPGA Drive-on Championships, tumapos lang siya sa pang-28 na puwesto samantalang sa Marathon LPGA Classic Presented by Dana, nasa pang 59 na baitang naman ang dalaga. Malayong pang-71 ang naging puwesto ng Pinay sa Walmart NW Arkansas Championships Presented By P&G.

Sa kabila nito, isang magandang aspeto ng laro ni Pagdanganan sa tatlong torneo ay hindi pa siya napapauwi sa kalagitnaan ng bakbakan dahil sa mapaklang iskor. Sa tatlong mga paligsahang nabanggit, nakatawid siya sa weekend play.

Isa pang pag-asa na nakikita ay ang potensiyal niyang makipagsabayan sa mga beterana ng tour nang minsan siyang humataw ng bihirang back-to-back eagle at minsan na rin siya nakapuwesto sa top 10 habang tumatakbo ang torneo bagamat kinapos siya sa dulo. Sa kabila nito, nakakulekta na ang Pinay ng USD 10,987 pabuya mula sa tatlong paligsahang nabanggit.

Kaya sa pagpalo ng Pinay sa 6,478 yardang greens sa Oregon, maraming golf apisyunado sa Pilipinas ang umaasang tataas na ang antas ng kanyang palo sa isa sa pinakamalupit na professional tour sa buong daigdig.