IM Bersamina, naka-gold sa Asian Online Chess

ni Eddie M. Paez Jr. - @Sports | October 23, 2020

Pinangunahan ni International Master Paulo Bersamina ang listahan ng mga chessers mula sa Pilipinas na kuminang matapos itong tanghaling best performer sa Men’s Division - board 3 sa pagsasara ng qualifying rounds ng pinakaunang Asian Nations Online Chess Championships.

Anim na panalo, dalawang tabla at isang talo ang nakadikit sa rekord ni Bersamina para sa kabuuang pitong puntos mula sa siyam na salang sa board. Kabilang sa mga tumiklop sa Pinoy sina Iranian GM Ehsan Maghami Ghaem (Rating: 2566), Khazak GM Murtas Khazgaleyev (Rating: 2496), IM Asyl Abdyjapar (Rating: 2390; Kyrgyztan), IM Eiti Bashir (Rating: 2306, Syria), Khaleel Sharaf (Rating: 1861, Palestine) at Tupfah Khumnorkaew (Rating: 1895, Thailand).

Bukod dito, napuwersa rin ni Bersamina, may rating lang na 2286, sa hatian ng puntos ang mga manlalarong may mas mataas na titulo at rating na sina Mongolian GM Tsegmed Batchuluun (Rating: 2445) at Indian GM.S.P. Sethuraman (Rating:2588). Tanging si Aussie GM Temur Kuybokarov ang nakapagpatikim sa kanya ng pagkatalo. Bumuntot kay Bersamina sa Board 3 podium sina Iranian GM Amin Tabatabaei (rating: 2381) at si GM Max Illingworth ng Australia (Rating: 2498).

Samantala, pilak ang naging bahagi ni Pinoy GM Rogelio Barcenilla sa bakbakang Board 2 na pinangunahan ni Indonesian GM Susanto Megaranto. Kay Iranian GM Parham Maghsoodloo napunta ang pangatlong puwesto. Sa board 2 na labanan sa kababaihan, nasikwat ni Woman International Master Jan Jodilyn Fronda ng Pilipinas ang tanso nang tumapos ito sa likuran nina IM Warda Medina Aulia (Indonesia) at WIM Mobina Alinasab (Iran).

Sa team event, parehong nakapasok sa quarterfinals ang men's at women's team ng Pilipinas. Makakaharap ng mga Pinoy ang Khazakstan habang sasagupa naman ang mga Pinay sa hamon ng Sri Lanka.

Pilipinas, nasa unahan na ng iwas-COVID Asian Online Chess

ni Eddie M. Paez Jr. - @Sports | October 12, 2020

Winalis nina Grandmaster Rogelio Barcenilla Jr. at international Master Paulo Bersamina ang kani-kanyang mga karibal sa unang tatlong rounds at maayos namang nakasuporta sina GM Mark Paragua at GM John Paul Gomez upang itulak ang Pilipinas sa unahan ng pulutong ng ginaganap na iwas-COVID-19 na Asian Online Chess Cup.

Sa patuloy ng paglaganap ng chess sa internet na epektibong paraan sa pag-iwas sa Covid 19, naramdaman nina Nidal Ahmed (Palestine), Aram Khedr Adm Chekh (Syria) at FM Tinnakrit Arunnuntapanich (Thailand) ang bangis ni Barcenilla (rating: 2463) sa board 2 habang nakaldag ni Bersamina (rating: 2286) sa board 3 ang Palestinong si Khaleel Sharaf, Syrian IM Bashir Eiti at Thai Tupfah Khumnorkaew.

Nag-ambag din ng tigalawang panalo at isang tabla sina Paragua (rating: 2573) sa board 1 at Gomez (rating: 2470) sa board 4 upang tulungan ang Pilipinas (pang-apat sa pinakamalakas na koponan) na mabokya ang Palestine at Syria (4-0) at makaladkad ang Thailand (3-1) na naging sapat para sa paghawak ng trangko kasosyo ng tatlong iba pang bansa sa Asya.

Tatlong iba pang bansa ang hindi naman nagpapabaya at kasama rin sa lead pack ng Pilipinas dahil sa pare-pareho pang malinis ang kanilang mga rekord: 2nd seed Khazakstan, 3rd ranked Iran at no. 9 sa pre-tournament favorite na Mongolia.

Nakabuntot din ang World Online Chess Olympiad champion at topseed India, 5th ranked Bangladesh at 8th seed Indonesia na pare-parehong umiskor dalawang panalo at isang tabla.

Halagang $20,000 ang nag-aabang sa mga bansang mamamayagpag sa torneo. Mula sa 39-bansang kalahok sa men’s division, ang unang walong finishers ng elimination round ay sasabak sa knockout phase ng paligsahan. Dito na malalaman kung aling bansa ang maghahari.

Marathoner, nakaiwas sa COVID-19, inatake naman ng hippopotamus

ni Eddie M. Paez Jr. - @Sports | October 4, 2020

Matagumpay na nakakaiwas sa nakamamatay na coronavirus ang isang long distance runner sa kanyang patuloy na pagpapakondisyon bilang paghahanda sa mga karera pero hindi naman niya nalusutan ang atake ng hippopotamus nang minsan siyang nag-eensayo sa Kenya.

Si Edwin Mokua, may-ari ng korona ng Trabzon Half Marathon sa Turkey, ay nagsasanay sa Manguo village nang atakihin siya ng hippopotamus malapit sa ilog ng Ewaso Nyiro. Nailigtas siya ng kanyang training partner na si Denis Kipkoskei.

Ayon sa pangunang ulat, unang nakita ni Kipkoskei ang pangkat ng mga hippos at walang aberyang nilagpasan niya ang mga ito. Nang lumingon sa gawing likuran, hindi niya natanawan si Mokua. Kalaunan ay nakita niya ang 26-taong-gulang na kasama sa pagsasanay na nakikipagbuno sa umaatakeng hayop. "I scared off the rest before turning my energies to the one that was attacking him," paliwanag ni Kipkoskei.

Ayon sa coach ni Mokua, naobliga silang magsanay sa malapit sa Ewaso river dahil sa mga restrictions na ipinapatupad upang kontrahin ang paglaganap ng coronavirus na pandemya.

Nakatakda sanang bumalik sa Turkey ang atleta upang sumali sa Izmir Marathon ngayong Linggo. Sa halip, nagpapagaling ito ng broken ribs at double fracture sa kaliwang kamay sa Nyahururu Hospital.

Naunang napaulat na may dalawang namatay at tatlong injury mga kaso ang nairehistro dahil sa mga atake ng hippopotamus sa lugar sa nakalipas na buwan. Ang hippo ay itinuturing na isa sa pinakaagresibong hayop sa Africa at kapag umatake sa tao ay posibleng ikamatay.