'Robocop' Orcullo, hari sa AzBilliards Moneyboard

ni Eddie M. Paez Jr. - @Sports | November 7, 2020

Dalawang buwan pa halos ang natitira bago tuldukan ang makasaysayang taon ng 2020 dahil na rin sa pananalasa ng COVID-19 pero sinusian na ni Dennis “Robocop” Orcullo ng Pilipinas ang unang puwesto sa karerang AZBilliards Money Leaderboard.

Anim na korona ngayong taong ito ang naging tulay ng dating hari sa buong mundo ng tumbukang 8-ball para sa unang baytang ng malupit na talaan.

Si Orcullo, 41-taong-gulang mula sa Surigao, ang hinirang na kampeon ng Derby City Classic 9-Ball Banks, Midnight Madness Classic, Scotty Townsend Memorial 10-Ball, Cue Time Shootout Open at 47th Annual Texas 9-Ball Open bukod pa sa pagiging DCC Master of the Table.

May kabuuang $81,950 na ang pumasok sa kaban ni Robocop para sa 2020 at ito ay halos kalahati lang ng naipon ng pumapangalawang si Billy Thorpe ng USA ($51,800) at lalong malayo sa pumapangatlong si Jayson Shaw ng Scotland na may napagwagiang $29,016.

Nasa rekord ni Thorpe, 24-anyos ang titulo ng DCC Bank Pool Ring Game at DCC One Pocket samantalang ang 32-taong-gulang na si Shaw naman ang namayagpag sa Dynamic Billiard Treviso Open at DCC Bigfoot Challenge.

Apat na Pinoy pa ang nakapasok sa unang sampu ng talaan. Ito’y sina dating World Straightpool titlist Lee Van Corteza (4th, $26,000), Zoren James “Dodong Diamond” Aranas (5th, $24,790), Billiards Congress of America (BCA) Hall of Famer Francisco “Django” Bustamante (7th, $19,640) at ang minsan nang naging world 9-ball championship runner-up Roberto “Superman” Gomez (8th, $19,300). Isa pang kinatawan ng lahing-kayumanggi, si Alex "The Lion" Pagulayan na ipinanganak sa Isabela, ang nakaupo sa pangsiyam na puwesto dahil sa kanyang nakulektang $19,300.

Kasama pa sa top 10 sina no. 6 Jung Lin Chang ng Taiwan (hari ng CPBA Champion of Champions at ng Diamond Las Vegas Open) na nakaipon na ng $19,728 at si no. 10 Shane Van Boening ng USA na itinuturing na pangatlo sa pinakamalupit na manunumbok sa boung daigdig ng World Pool Billiards Association (WPA) na nakulekta naman ng $17,300.

“Superman” Gomez, hari sa Texas Open One Pocket

ni Eddie M. Paez Jr. - @Sports | November 3, 2020

Nasingitan ni Roberto “Superman” Gomez si Dennis “Robocop” Orcullo sa maigting na all-Pinoy championship finale upang makaakyat sa trono ng One Pocket event sa Texas Open 2020 Covid Edition sa palaruan sa Skinny Bob ng Round Rock, Texas.

Gitgitan ang dalawang manunumbok mula sa lahing-kayumanggi kaya sa tabla pa nauwi ang serye nila para sa korona. Dahil dito, kinailangan ang isang winner-take-all na sarguhan na napanalunan ni 2018 Derby City Classic (DCC) Bigfoot Challenge champ Gomez. Matatandaang nagsanib-puwersa sina Orcullo, dating World 8-ball king, at Gomez, minsan nang naging runner-up sa World 9-ball tilt, para dalhin ang Pilipinas sa pangalawang puwesto ng 2010 World Cup of Pool.

Bukod kay Orcullo, sinagasaan ni Gomez, 42-taong-gulang at tubong Zamboanga, habang papunta siya sa trono si James Davis sa iskor na 5-3 bago niya dinaig sina Tommy Tokoph (5-3), Billiards Congress of America (BCA) Hall of Famer na ipinanganak sa Isabela na si Alex “The Lion” Pagulayan (5-4) at Tony Chohan (5-4).

Nakarating sa finals si Orcullo, 41-anyos mula sa Surigao at kasalukuyang DCC Master of the Table at DCC 9-Ball Banks winner, nang talunin niya sina David Henson (5-0) at Corey Deuces (5-1) bago niya hiniya si World Pool Billiards Association (WPA) no. 3 Shane Van Boening (5-0).

Ginaganap pa ang 9-Ball event sa Texas Open at nakikipagtagisan pa rin ng husay sina Gomez, Orcullo, Pagulayan at Jeffrey De Luna sa bakbakang nagpapatupad din ng mga protocols upang makaiwas sa paglaganap ng coronavirus. Sa kabila nito, ang event ay umakit pa rin ng 128 cue artists mula sa iba’t-ibang parte ng daigdig.

Australia at India, kampeon sa Asian Online Chess

ni Eddie M. Paez Jr. - @Sports | October 28, 2020

Hinirang na kampeon ang Australia sa kalalakihan habang India naman ang nangibabaw sa sagupaan sa kababaihan ng katatapos na iwas-coronavirus na Asian Nations Online Chess Championships.

Dinaig ng 6th ranked Australia ang pre-tournament favorite na India sa unang sabong nila sa finals 2.5-1.5 bago naitakas ang isang tabla sa pangalawang laro 2.0-2.0 upang makaakyat sa trono. Samantala, hindi napahiya ang mga eksperto nang hiranging topseed ang lady chessers ng India matapos na iposte ang dalawang 3.0-1.0 na tagumpay kontra sa Indonesia sa championship round.

Naisalba naman ng Pinay chessers ang isang podium finish matapos silang makasampa sa semifinals ng torneong umakit ng 31 kalahok mula sa iba't-ibang bahagi ng kontinente. Malaking susi rito ang pagdaig nila sa Sri Lanka noong quarterfinals.

Dalawang beses na dinaig nina Woman Grandmaster Janelle Mae Frayna (board 1) at bronze medalist Woman International Master Jan Jodilyn Fronda (board 2) sina Tharushi Sandeepani at Ashvini Pavala Chandran ayon sa pagkakasunod-sunod upang pangunahan ang Pilipinas sa kambal na 3.5-0.5 tagumpay sa quarterfinals.

Nag-ambag rin sina WIM Kylen Joy Mordido (1.5 puntos), Woman FIDE Master Shania Mae Mendoza (1.0 puntos) at WIM Bernadette Galas (0.5) upang maitulak ang Pilipinas sa bakbakan ng huling apat na bansang may tsansa pa sa korona.

Kapwa mga over-achievers na ang Pilipinas at Sri Lanka. Ang una ay 7th seed pero pumangalawa sa eliminations at nakahablot ng pangatlong puwesto habang ang huli ay 18th ranked lang subalit nakapasok sa unang walo.

Nakaharap ng mga Pinay sa semis ang pangalawa sa pre-tournament favorite na Indonesia pero hindi ito nakaagapay sa lakas ng karibal mula sa Timog-Silangang Asya.

Samantala, lumuhod sa bangis ng Khazakstan ang Pilipinas sa quarterfinals sa men’s division. Sa unang sulungan, bokya ang mga Pinoy chessers,0-4, samantalang sa pangalawang sabak ay hindi rin sila nakaporma, 1-3. Ang tanging naging pampalubag-loob ng bansa sa pangkat na ito ng sagupaan ay ang gold medal ni IM Paulo Bersamina sa board 3 at ang silver ni GM Rogelio Barcenilla sa board 2.