Obiena gold sa Croatia, Perez 3rd sa Pro Darts

ni VA / Eddie M. Paez Jr. @Sports | February 22, 2024

Nakamit  ng Filipino Olympian pole vaulter na si Ernest John "EJ" Obiena ang kanyang unang gold medal ngayong 2024 sa Memorial Josep Gašparac tournament na idinaos sa Croatia noong Martes,araw naman ng Miyerkules dito sa Pilipinas. Nagawang ma-clear ni Obiena ang baras na itinaas sa 5.83 meters upang gapiin ang kanyang mga nakatunggali kabilang na sina Pedro Buaró (5.73m) ng Portugal at Oren Trey Oates (5.61m) ng Estados Unidos(US) na siyang kumopo ng silver at bronze ayon sa pagkakasunod. Ito ang unang titulo ni Obiena ngayong taon at habang naghahanda sya para sa darating na 2024 Olympic Games sa Paris, France. "Indoor season finally kicks off," ani Obiena sa kanyang post sa  social media platforms. "5.83 for the title here... Thank you for having us and putting on a great atmosphere."Nakatakda namang magtungo si Obiena sa Germany para sa susunod na torneong kanyang sasalihan - ang  Istaf Indoor event.   

Samantala, matagumpay na nakapagparamdam ng husay si Christian "Ian" Perez sa pandaigdigang arena nang pumangatlo ang Pinoy sa Professional Darts Corporation Pro Tour: Players' Championships Leg 4 sa Leicester, England.

Dinaig ni Perez ang anim na mga de-kalibreng kalahok tungo sa semifinals ng malupit na torneo. Kasama sa listahan sina Danny Lauby Jr. (USA, 6-5, round-of-128), Martin Schindler (Germany, 6-3, round-of-64), Ricardo Pietreczko (Germany, 6-1, round-of-32) at ang mga dating world champions na sina Wales Gerwyn Price (6-4, round-of-16).

Matinding balikwas ito ng darterong kilala rin sa bansag na "The Titan" sa unang tatlong paligsahang nilahukan niya sa Tour sa England sa nagdaang dalawang linggo. Sa nabanggit na mga paligsahan, tatlong dikdikang labanan ang dinaan niya pero inalat siya sa check-out kaya hindi nakausad mula sa unang round ang 42-taong-gulang na pambato ng Koronadal City.

Golfer Malixi pasok sa winner's circle ng WAAP

ni Eddie M. Paez Jr. @Sports | February 5, 2024

Gumawa ng kasaysayan si Rianne Mikhaela Malixi nang iposte ng Pinay pride ang pinakamababang round sa prestihiyosong 6th Women's Amateur Asia Pacific (WAAP) sa greens ng Siam Country Club sa Thailand noong Sabado.

Isang umuusok na 9-under-par 63 strokes ang pinakawalan ni Malixi sa round 3 ng paligsahan para makapasok sa record books ng mabangis na kompetisyon sa Pattaya. 

Ang eagle-aided na round ng 16-taong-gulang na numero unong lady parbuster ng Pilipinas sa WAAP ay naging susi rin upang makasibad si Malixi sa pangalawang puwesto matapos mapako sa labas ng top 10 sa unang 36 na butas ng bakbakan.

Mayroon siyang kabuuang iskor na 14-under-par 202 pagkatapos ng 54 butas ng paglalakbay.

Kung makakapasok muli sa podium, ito na ang pangalawang pagkakataon na mapapabilang sa winners' circle si Malixi dahil taong 2022 na pumangatlo siya rito. Hindi ito imposible dahil sa kasalukuyang pamatay na porma ngayon ng pambato ng bansa.

Sariwa si Malixi sa paglahok sa dalawang torneo sa Australia kung saan kapwa may ibinaon siyang impresibong resulta. Nagkampeon siya sa Australian Master of the Amateurs at top 10 naman sa Australian Amateurs. Kasalukuyang nasa pang-42 na baitang ng World Rankings ang dalagita. Ito ay dahil na rin sa tatlong titulo at 20 "top 10" finish)

Sa paligsahan pa rin sa Thailand pa rin, kasalukuyang tumatrangko si Chun Wei Wu ng Taiwan dahil sa kartadang 18-under-par 198 strokes may 18 holes na lang ang natitira.

Isang palo naman sa likuran ni Malixi ay sina Yahui Zhang (China) at Hyosong Lee (South Korea) na kapwa may tig- 13-under-par 203 strokes.

Aranas sakalam pa ang pagsargo sa Peri 9-Ball

ni Eddie M. Paez Jr. - @Sports | October 10, 2023

Hindi kumurap si Pinoy cue star Zorren James Aranas sa harap ng mabagsik na pagsargo sa quarterfinals ng kasalukuyang hari ng World 9-Ball Championships na si Francisco Sanchez Ruiz, 10-9, upang mapanatiling buhay ang pangkampeonatong paglalakbay sa Peri Open 9-Ball sa Hanoi City, Vietnam noong Linggo.

Naging tulay ni Aranas ang panalo para makapasok sa semis kung saan makakasama niya rin ang mga kababayang sina Anthony Raga at Michael Feliciano. Ang Rusong si Fedor Gorst ang nagbabantang sumira sa planong All-Pinoy finals.

Maagang napag-iwanan si "Dodong Diamond" Aranas, 3-6, pero nangibabaw ang dugong mandirigma ng World Cup of Pool titlist mula sa Pilipinas kaya bumalikwas ito at naitakas ang tagumpay mula sa Kastilang itinuturing ding pangalawa sa pinakamalupit na bilyarista sa buong mundo ayon sa World Pool-Billiards Association (WPA). Nauna rito, pinag-empake niya sina Truong An Bul (Vietnam, 10-7), Moritz Neuhaussen (Germany, 10-0) at Jose Alberto Delgado (Spain, 9-2).

Mula sa 8-8 na iskor, bumuga naman ng apoy si "The Dragon" Raga upang maitakas ang isang 10-8 na panalo sa round-of-8 kontra kay Dutch Niels Feijen at makapag-ambag sa nagaganap na dominasyon ng mga kinatawan ng bansa.

Tiyak nang may uusad sa finals na kinatawan ang Pilipinas dahil isang All-Pinoy match-up ang masasaksihan sa unang hati ng semi-finals matapos makuha ni Michael Feliciano ang karapatang makaharap si Aranas sa round-of-4. Ginamit na tuntungan ni "X44" Feliciano sa patuloy na pagsargo sa knockout round ng torneo ang mga tagumpay laban kina Kuo Po Cheng (Taiwan, 10-6), kababayang si Jefrey Roda (10-9), US Open podium finisher Sanjin Pehlivanovic (Bosnia, 10-4) at Ngo Quang Trung (Vietnam, 9-3).