Saso, hahataw na sa JLPGA

ni Eddie M. Paez Jr. - @Sports | March 2, 2021

Papalo na si Fil-Japanese Yuka Saso sa 2021 season ng Japan Ladies Professional Golf Association (JLPGA) upang ipagpatuloy ang kanyang impresibong paglalakbay sa malupit na mundo ng mga lady parbusters sa bahaging ito ng Asya.

Sasabak si Saso, may-ari ng dalawang gintong medalya sa huling Asian Games at siya ring top money earner ng JLPGA 2020, sa Daikin Orchid Ladies Golf Tournament simula Marso 4 hanggang 7 sa 6,561 yards ng Ryukyu Golf Course sa Okinawa. Halagang JPY 120,000,000 ang naghihintay sa mga pupuwesto sa bakbakang nakalatag sa par-72 na palaruan. Kabilang na rito ang gantimpalang JPY 21,600,000 para sa hihiranging reyna ng tunggalian.

Si Saso ay kumikinang sa JLPGA kung saan pumapangalawa siya sa Player of the Year derby. Pinagsama ng mga tagapangasiwa ng JLPGA ang 2020 at 2021 seasons. Ito ang naging tuntungan ng dating Youth Olympic Games silver medalist para umakyat sa pang 45 sa world rankings at pang 21 naman para sa mga gustong makapaglaro sa Tokyo Olympics na ilang buwan na lang at inaasahang matutuloy na. Halos swak na siya sa Olympics dahil top 60 lang ang papayagang pumalo sa Tokyo.

Matatandaang nagkampeon si Saso sa NEC Karuizawa 72 Golf Tournament at sa Nitori Ladies Golf Tournament. Pumangalawa rin ang dalagita sa JLPGA major na Totò Japan Classic at pumangatlo sa Daiao Paper Elleair Ladies Open. Bukod sa mga podium finishes na ito sa kanyang rookie year pumasok din siya sa unang sampung manlalaro ng Earth Mondahmin Cup (5th), JLPGA Tour Championship Ricoh Cup (6th), Descente Tokai Ladies Classic (8th) at Fujitsu Ladies Golf Tournament (10th).

Bukod pa sa mga nabanggit na laro, nag-top 10 din ang 19-anyos na pambato ng Pilipinas sa huling golfing major sa 2020 Ladies Professional Golf Association event sa USA.

'The Slayer' Corteza, astig sa tumbukan ng world champs

ni Eddie M. Paez Jr. - @Sports | February 23, 2021

Pinatunayan ni Lee Van “The Slayer” Corteza na siya ang pinaka-astig pagdating sa pagtumbok sa karambola nang tanghaling itong kampeon sa bakbakang tinawag na Rotation: Reyes, Bustamante, Alcano, Biado, Banares, Corteza, Raga, Ignacio.

Tinalo ni Corteza, minsan nang naging World 14.1 Straightpool titlist, si Ronnie “The Volcano” Alcano, 7-4, sa finale ng kompetisyong ginanap sa Shark’s Billiards Hall ng Lungsod Quezon noong Sabado ng gabi.

Maagang nag-alburuto ang bulkang si Alcano mula sa Laguna sa pagsibad sa isang 3-1 na bentahe sa pagbubukas ng kanilang championship face-off. Ngunit nakabalikwas si Corteza, tinatawag ding “Van Van” sa pool circle, at rumatsada ng limang umuusok na tagumpay upang lumapit sa korona sa iskor na 6-3.

Sa pang-10 laro, sumargo si Alcano at nagpakita ng pormang minsan nang nag-akyat sa kanya sa trono ng World 8-Ball Championships (2007) at World 9-Ball Championships (2006). Hindi pinatayo ni “The Volcano” si Corteza upang makalipat, 4-6.

Sa pang-11 rack, naging dikdikan pa rin ang laban dahil napunta ang iskor sa 28-27 angat si Corteza pero na kay Alcano ang pagtumbok. Sa malas, sumablay ang huli kaya pagtayo ni Corteza ay nilinis na niya ang mesa para selyuhan ang korona.

Pumasok sa finals si Corteza matapos daigin sa semis si Anton “The Dragon” Raga, 6-4. Sa kabilang hati ng bakbakan ng huling apat na kalahok na nakatayo, tinalo ni Alcano si Efren “Bata” Reyes, 6-4. Matatandaang kamakailan lang ay namayagpag sa “The Duel” ang tambalan nina Alcano at Reyes. Double world champion din si Reyes kagaya ni Alcano. Hari siya sa buong mundo ng 9-Ball noong 1999 habang walang nakadaig sa kanya sa 8-Ball noong 2004.

Bukod kina Corteza, Alcano, Raga at Reyes, nag-ambisyon din sa trono ng torneo pero nabigo sina dating world 9-Ball titlist Francisco “Django” Bustamante at Carlo “The Black Tiger” Biado ganundin ang mga batikang sina Jeffrey Ignacio at Jericho Banares.

Kabog ang mundo ng bilyaran kina new teenage lodi 'Benok' at Trinidad

ni Eddie M. Paez Jr. - @Sports | February 22, 2021

Nakakaramdam ng kaba o di kaya ay pag-aalinlangan ang mga bigating manunumbok saan mang bahagi ng daigdig kapag nalaman nilang lahing kayumanggi ang makakaharap nila sa mesa.

Ito ay dahil sa bagsik ng kamandag na nagmarka mula sa husay ng mga pangalang Efren “Bata” Reyes, Francisco “Django” Bustamante, Dennis “Robocop” Orcullo, Ronnie “The Volcano” Alcano, Carlo “The Black Tiger” Biado, Lee Van Corteza, Johann “Bad Koi” Chua, Jose “Amang” Parica at Zorren James “Dodong Diamond” Aranas.

Sa hinaharap, ang listahang ito ng mga lodi ay puwedeng singitan ng pangalan ng binatilyong si Earl Vincent Trinidad. Ang 16-taong-gulang na tagahanga ni “Bad Koi” Chua ay unti-unti nang kinakikitaan ng potensiyal bilang mukha ng billiards sa Pilipinas.

Taong 2012 nang hirangin itong kampeon ng MAPPA Christmas Bonanza 9-Ball Tournament, Yoyo Billiards Club at ng East Pool Tutor 10-Ball Tourstop. Nasikwat din niya ang huling upuan sa podium ng MAPPA 10-Ball Tour sa kaparehong taon.

Ang ipinagmamalaking manunumbok ng Las Pinas ay nangibabaw rin sa 2018 Bilyarista.com Team Battles at naging semifinalist, 2018 South Golden Break Association 10-Ball Tournament at 2018 Bilyarista.com 10-Ball Tournament.

At noong 2019, nag-init nang husto ang kanyang pulso sa panahon ng tag-araw at hinirang siyang numero uno sa Bilyaristang.com 8-Ball Tournament (Marso), Bilyaristang.com 9-Ball Tournament (Abril) at J&P 9-Ball Cup (Mayo).

Isa lang ang cue artist na si Vickoy sa maaring sandalan ng bansa sa kinabukasan. Kamakailan ay nagpakilala si Aivhan Maluto matapos itong pumangalawa sa malupit na Poison VG10 2.0 Virtual 10-Ball Tournament. Nariyan na rin ang pangalan ni Bernie “Benok” Regalario - isa pang 16-anyos na manunumbok mula sa Paranaque na inaasahang magiging mahalagang bahagi ng Philippine billiards.

Taong 2020 nang sumargo siya kontra sa mga dating world champions mula sa Pilipinas. Sa duwelo kontra kay Biado, naging hari sa 9-ball sa buong mundo ganundin sa World Games noong 2017, nanalo si Regalario sa isang handicap match. Nang makabanggaan niya ang alamat na si “Bata”, isang double world champion (8-Ball at 9-Ball) mula sa Pampanga, umabot sa isang hill-hill ang salpukan bago nangibabaw ang binatilyo.

At kamakailan, sa isang open tournament na binansagang 2021 GAB 10-Ball Open Tournament, umabot siya sa semifinals matapos silatin ang ilan sa mga bituin ng bansa tulad nina Corteza at Chua. Sa final 4, pinag-empake na siya ni Biado.