De Luna at Gomez, target ang 4th title sa World Cup of Pool

ni Eddie M. Paez Jr. - @Sports | April 16, 2021

Tutumbukin ng Pilipinas sa pamamagitan nina Jeffrey “The Bull” De Luna at Roberto “Superman” Gomez ang makasaysayang pang-apat na titulo sa prestihiyosong World Cup of Pool na nakatakdang magsimula sa bilyaran ng Milton Keynes, England ngayong Mayo 9 hanggang 14.

Sa halos isa’t-kalahating dekada ng maigting na bakbakan sa torneo, wala pang bansa ang nakakagawa nito pero ang mga cue artists ng Pilipinas ay kumakatok na sa pinto ng kasaysayan.

Taong 2006 nang magsanib-puwersa sa England sina Billairds Congress of America (BCA) Hall of Famers Efren “Bata” Reyes at Francisco “Django” Bustamante para ibigay sa Pilipinas ang una nitong titulo. Pilipinas rin ang inagural champion ng paligsahan. Nang muling ganapin ang paligsahan noong 2009, ang tandem na Reyes-Bustamante uli ang nagkampeon sa harap ng kanilang mga kababayan.

Pumasok sa eksena sa England sina Lee Van “The Slayer” Corteza at Dennis “Robocop” Orcullo noong 2013 para ibigay sa Pilipinas ang pangatlo nitong korona.

Noong 2019 nang huling ganapin ang paligsahan, nagkampeon sina Albin Ouschan at Mario He para sa Austria habang ang tikas nina De Luna at 2017 World 9-Ball king Carlo “The Black Tiger” Biado ay nagbigay ng runner-up honors para sa Pilipinas.

Ngayong 2021, masusubukan ang angas sa mesa ng puwersa nina The Bull at Superman. Si De Luna ay sariwa sa pagkopo ng dalawang korona sa Predator Sunshine State Tournament. Pang-apat na rin ito sa mga podium finishes na naiposte ng 37-taong-gulang na Pinoy ngayong 2021 sa panahon ng pandemya. Kamakailan ay pumangatlo siya sa Michael Montgomery Memorial 10-Ball Mini (Frisco, Texas) gayundin sa Rack N Grill 9-Ball Shootout (Augusta, Georgia). Noong Pebrero ay namayagpag si Gomez kontra sa 110 iba pang cue artists para makuha ang trono ng Midwest Open Billiards One Pocket sa Ohio.

PCAP: Laguna, kampeon sa Norte; Camarines ang bumida sa Timog

ni Eddie M. Paez Jr. - @Sports | April 5, 2021

Nakahulagpos mula sa maigting na hamon ang mga disipulo ng ahedres na kumakatawan sa Laguna at sa Camarines kontra sa magkaibang mga katunggali upang hiranging pinakaunang Northern Division at Southern Division champions ng Professional Chess Association of the Philippines (PCAP) All Filipino Conference ayon sa pagkakasunod-sunod.

Sa unang salpukan, dinaig ng Heroes mula sa Laguna ang San Juan Predators upang makalapit sa korona sa Norte, 12.5 - 8.5. Bumida para sa Laguna sina Woman Nationa Master Karen Jean Enriquez (3 pts), untitled Kimuel Aaron Lorezonzo (2.5 pts.), Grandmaster Rogelio Barcenilla Jr. (2 pts) at GM John Paul Gomez (2pts). Pero hindi basta-basta tumiklop ang San Juan sa pangalawang paghaharap nila kaya nauwi sa 10.5-10.5 na tabla ang kanilang paghaharap. Sa tensyonadong Armageddon, winakasan ng Laguna ang paglalakbay ng San Juan sa pamamagitan ng mga panalo nina Barcenilla, Gomez at FIDE Master Austin Jacob Literatus.

Bukod sa pagiging unang kampeon ng PCAP Northern Division, nakahakbang na sa Grand Finals ang Laguna kung saan haharapin nito ang Camarines para makapasok sa kasaysayan bilang pinakaunang PCAP All Filipino Champion.

Samantala, hindi rin nalalayo sa ganitong iskrip ang sinundan ng Soaring Eagles sa Southern Division. Umangkla ang Camarines sa husay nina Chirstian Mark Daluz (3 pts; board 7), Virgen Gil Ruaya (2.5 pts.; board 6) at Ellan Asuela (2 pts; board 2) para maiposte ng Soaring Eagles ang 11.5-9.5 na tagumpay laban sa Iloilo Kisela Knights. Nakabawi naman ang huli sa pangalawang banggaan, 11.0-10.0 kaya naset-up ang Armagedon. Dito, tinalo ni GM Mark Paragua si GM Rogelio Antonio Jr. samantalang nasingitan ni Asuela si Fritz Bryan Porras kaya naging Southern Division ruler ang Camarines, 2-1. Si Karl Victor Ochoa lang ang nakaiskor para sa Iloilo.

AZBilliards Moneyboard limang Pinoy, nasa top 20

ni Eddie M. Paez Jr. - @Sports | March 31, 2021

Limang cue artists mula sa Pilipinas sa pangunguna ni dating World 8-Ball king Dennis “Robocop” Orcullo ang nakapasok sa unang 20 personalidad ng AZBilliards Moneyboard pagkatapos ng tatlong buwan ng pagtumbok sa panahon pa rin ng pandemya sa kasalukuyang taon.

Bukod kay Orcullo na nasa unahan ng listahan, nagsosolo sa panglimang baytang si Jeffrey “The Bull” De Luna, bumubuntot sa kanya sa pang-anim na puwesto si Zorren James “Dodong Diamond” Aranas, sumampa sa pang-11 upuan si Roberto “Superman” Gomez at inokupahan ni Aihvan Maluto ang pang-16 na posisyon.

Nasa pangalawang puwesto si Fedor Gorst ng Russia ($18,410); pumapangatlo ang Amerikanong si Shane Van Boening ($11,280) at nasa pang-apat na baytang ang isa pang US ace (Billy Thorpe, $8,150). Si Efren “Bata” Reyes ang topnotcher sa All Time List dahil sa naibulsa niyang $2,128,844. Si Allison Fisher ang may hawak ng trangko sa all-time list sa mga kababaihan ($1,205,662).

Sa 2021 roster, may napanalunan na si Orcullo, nagbigay na minsan ng korona sa Pilipinas sa sagupaang World Cup of Pool, ng kabuuang halagang $26,455 sa tulong ng kanyang apat na podium performances. Kabilang na rito ang tatlong koronang nahablot niya sa Michael Montgomery One Pocket ($7,380); Michael Montgomery 10-Ball Mini ($7,040) at Midwest Open Banks Ring Game ($8,000). Pumangatlo rin siya sa Midwest Open 10-Ball Main Event ($1,900).

Nagwagi ang 37-taong-gulang na si De Luna sa Sunshine State ProAm Tour ($1,800) bago tumersera sa Michael Montgomery 10-Ball Mini ($3,520) at Rack & Grill 9-Ball Shootout ($1,500) kaya naging pasaporte niya ang mga ito sa pag-upo sa panglimang puwesto ($7,420).

Sa kabilang dako, umangkla si Aranas ($6,325), sa mainit na atake sa mga salpukan ng Midwest Open sa Ohio kaya nakaakyat sa no. 6 na upuan. Pumangalawa siya sa 10-Ball Main Event ($3,000); runner-up din sa Banks Event ($2,140) at pumangatlo naman sa 10-Ball Invitationals ($500).