Germany, champ sa World Cup of Pool

ni Eddie M. Paez Jr. - @Sports | May 16, 2021

Dinaig nina Joshua “The Killer” Filler at Christof Reintjes ng Germany ang pambato ng punong-abala na sina Darren Appleton at Karl Boyes sa isang nail-biter na salpukan sa finals, 11-7, upang makopo ang kampeonato ng 2021 World Cup of Pool sa Stadium MK ng Milton Keynes sa England.

Ito na ang pangalawang tropeo ng mga Aleman sa kasaysayan ng prestihiyosong pagtitipon ng mga pinakamalulupit na tambalan ng bilyarista sa buong mundo. Taong 2011 nang mamayagpag para sa Germany sina Ralf Suoquet at Thorsten Hohmann, Ang tagumpay ay nagkakahalaga ng $60,000 samantalang $30,000 ang ibinulsa ng mga Briton na minsan na ring nagkampeon sa torneo (2014). Tatlo ang naging kinatawan ng Great Britain bilang host sa sagupaan at maagang namaalam ang unang dalawang koponan. Ang Great Britain "C" nina Appleton at Boyes ay last minute replacement sa biglang nawala sa eksenang kalahok mula sa Canada.

Nagsosyo sa pangatlo at pang-apat na puwesto ang mga natalong semifinalist na Slovakia (bokya sa Great Britain "C", 0-9) at Estonia (tinalo ng Germany, 7-9). Tumanggap din ang mga kinatawan nito ng tig-$15,000 na pabuya sa kaganapang umakit ng 32 mga kinatawan mula sa iba't-ibang parte ng mundo.

Nakuntento ang Pilipinas, runner-up noong 2019, sa pakikipaghatian sa panglima hanggang pangwalong posisyon matapos na mahinto sa quarterfinals ang paglalakbay. Halagang $9,000 ang pakonswelo kina Roberto "Superman" Gomez at Jeffrey "The Bull" De Luna na nagmarka sa kompetisyon matapos makabangon sa 0-5 na hukay upang patalsikin ang USA sa iskor na 7-5. Bukod dito, nakapuntos din ang mga Pinoy sa Great Birtain "B" sa iskor na 7-3. Kagaya ng Pilipinas, na tatlong beses nang nagkampeon sa torneo (2006, 2009, 2013), hanggang final 8 din lang ang inabot ng Netherlands, Denmark at kapwa Asyanong Japan.

IM Nadera at Hernandez, bumida sa PSC-NCFP Tourney

ni Eddie M. Paez Jr. - @Sports | May 15, 2021

Inilampaso ni International Master Barlo Nadera ang oposisyon sa kalalakihan samantalang nangibabaw ang mga dalagitang sina Grace Lexie Hernandez at Ruelle Canino sa kanilang pangkat sa pagtatapos ng Philippine Sports Commission - National Chess Federation of the Philippines Selection Semifinals Tournament.

Ginamit ni Nadera ang mga panalo kina Alfred Moulic (round 1), Francis Talaboc (round 4), John Jasper Laxamana (round 5) at Jan Michael Stephen Inigo (round 7); ganundin ang tabla nang makaharap sina Jarvey Labanda (round 2), Lawrence Joseph Rivera (round 3) at Arj Nezil Merille (round 6) upang iposte ang kabuuang iskor na 5.5 puntos. Ang walang mantsang resulta pagkatapos ng 7 yugto ng bakbakan ay nagpatibay ng tsansa ni Nadera, may rating na 2279, para makapasok sa Philippine Chess Team.

Isang buong puntos sa likod ni Nadera para sa pangalawa at pangatlong puntos ayon sa pagkakasunod-sunod ay sina Laxamana (rating: 2122) at Merille (rating: 2049). Pareho silang may kartadang 3-3-1 panalo-talo-tabla pagkatapos ng 7 salang sa board. Si Laxamana rin ang sumegunda noong quarterfinals tournament. Si Labanda na pumangatlo noong quarters ay pumang-apat ngayon bitbit ang 4 puntos.

Sa kababaihan, kumamada ng 5.5 puntos si Hernandez, 16-anyos at may rating na 1950, matapos na irehistro ang apat na panalo at tatlong hatian ng puntos. Nasaksihan sa kanya ang performance rating na 2180. Iba ang naging landas ng 5.5 puntos ni Canino. Ang 13-anyos na kalahok (rating: 1957) ay tumulak sa limang panalo at isang draw bilang pangontra sa isang talo.

Si Ma. Elayza Villa,16, bitbit ang rating na 2059, ang nakahablot ng huling upuan sa podium nang makapagsumite ng 5.0 puntos. Ang rekord ay 5-2-0 panalo-talo-tabla.

IM Quizon, naghari sa FIDE World Cup Asian Zonals

ni Eddie M. Paez Jr. - @Sports | May 11, 2021

Pormal nang kinoronahan si International Master Daniel Quizon ng Pilipinas bilang hari ng FIDE World Cup 2021 Qualifying Tournament - Asian Zonals 3.3. matapos niyang isalba ang draw kontra kay Indonesian Grandmaster Susanto Megaranto sa huling round ng kompetisyon para sa kabuuang 7 puntos.

Hindi rin nagpabaya ang kababayang si IM Michael Concio Jr. (no. 16 sa ranking; rating: 2297) nang payukuin niya si 2nd ranked Grandmaster Novendra Priasmoro sa isang marathon na 106-sulungan para mahablot ang pangalawang puwesto sa paligsahang nilahukan ng mga pinakamalulupit na kinatawan ng Laos, Indonesia, Singapore, Malaysia, Thailand at Pilipinas. Mayroon siyang 6.5 puntos nang natapos ang laban kung saan angat siya ng isang bishop.

Magiging kinatawan ang dalawang binatilyo ng Asian Zone 3.3 sa pandaigdigang entabladong tinatawag na FIDE World Cup kung saan minsan nang naging semifinalist ang Super GM mula sa Cavite na si Wesley So.

Bagamat hawak ang dehadong itim na piyesa, nakuha ng 16-anyos na si Quizon (pang-13 sa pre-tournament rankings at may rating na 2319) ang kalahating puntos pagkatapos ng 30 sulong. Tinuldukan niya ang paligsahan na may 5 panalo at apat na draws pagkatapos ng 9 na rounds ng bakbakang ginaganap sa pamamagitan ng hybrid na format base sa tagubilin ng FIDE.

Nakatikim ng pagluhod kay Quizon sina untitled at 39th seed Jericho John Velarde (Philippines), 27th seed CM Laohawirapap (Thailand), 18th seed FM Pitra Andyka (Indonesia), 4th seed IM Theolifus Yoseph Taher (Indonesia) at 16th seed IM Michael Concio (Philippines). Samantala, nakipaghatian naman siya ng puntos kina 10th seed IM Mohamad Ervan (Indonesia), 6th ranked IM Sean Winshand Cuhendi (Indonesia) at si Megaranto.

Dahil sa pagwalis sa unang dalawang baitang, pinatid ng mga binatilyo ang tagtuyot na nararanasan ng Pilipinas pagdating sa paglahok ng isang Pinoy sa prestihiyosong FIDE World Cup. Pumangatlo sa tagisan ng husay si Megaranto.