Labanda at Tan, nanaig sa PSAGS Mindanao Chess

ni Eddie M. Paez Jr. - @Sports | May 27, 2021

Hiniya ni Jarvey Labanda ang mga pinapaborang dispulo ng paspasang ahedres nang pangunahan ang 53rd seed at unrated na kalahok sa National Chess Federation of the Philippines - Southeast Asian Games Selection Mindanao Leg Tournament kamakailan.

Kay Mary Joy Tan naman napunta ang unang puwesto sa kababaihan nang kumulekta ang 15th seed ng 8.5 puntos mula sa 11 salang sa board. Dinaig niya sa meta ang walong puntos nina Daren Dela Cruz, Franchesca Largo at Angela Joelle San Luis.

Nakakolekta si Labanda ng walong panalo at tatlong tabla pagkatapos ng 11 rounds sa halos walang galos na performance sa sagupaang pinag-interesang madomina ng kabuang 69 blitz chessers. Kasama sa mga hinugutan ni Labanda ng buong puntos sina pre-tournament favorite Joseph Navarro noong round 10 at 9th ranked Arj Nezil Merrilles (round 8) samantalang napuwersa niya sa hatian ng puntos sina 6th seed Karlycris Clarito Jr. (round 3) at no. 9 Leonardo Navarro (round 9).

Masuwerteng nakakuha ng bye ang dehadong chesser sa pambungad na yugto na kompetisyon pero kumayod ito para rin magwagi kontra kina Jhames Reyes Oshrie (round 3), Gabriel Hilario Allan (round 4), Josh Hernani Yreil (round 5), Mark Paguntalan Anarna (round 6) at Ritchie James Abeleda (round 7).

Kapwa nagtapos na may 9.5 puntos sina Labanda at Merille pero sa una napunta ang titulo dahil sa “winner-over-the-other-rule” at nakuntento lang sa pangalawang puwesto ang huli. Ginamit ni Navarro ang kanyang naipon na 8.5 puntos para maselyuhan ang pangatlong puwesto.

Que, Top 10 sa Japan Golf

ni Eddie M. Paez Jr. - @Sports | May 23, 2021

Napanatili ni Angelo Que ng Pilipinas ang kanyang puwesto sa top 10 na naging susi upang maalwan itong makapasok sa weekend play ng ginaganap na Japan Golf Tour (JGT) - Partner Pro-Am Tournament sa Toride Kokusai Golf Club ng Tsukubamirai, Japan.

Kwalipikado na rin sa homestretch ng Pure Silk Championship sa prestihiyosong LPGA sa Williamsburg, Virginia ang mga Pinay na sina Bianca Pagdanganan at Dottie Ardina.

Kumartada si Que ng 9-under-par 133 pagkatapos ng 36 na butas upang maipagpatuloy ang paghawak sa pampitong baytang. Malinaw pa ang kanyang landas papunta sa isang podium wind-up dahil tatlong hataw lang ang layo sa kanya ng sumesegundang si Shaun Norris ng South Africa.

Tumatrangko sa paligsahan si Tomoharu Otsuki ng Japan na naglabas ng nagliliyab na 60-64 para sa kabuuang 124 strokes. Magkakahati sa pangatlong puwesto ang mga kapwa Hapones na sina Ryo Ishikawa, Junya Kameshiro at Hirotaro Naito. Ang tatlong local bets ay may bitbit na 129 strokes. Solo sa pang-anim na baytang si Todd Baek ng South Korea (130).

Umuusok si Que, nanalo sa tour noong 2004 (Carlsberg Masters sa Vietnam), 2008 (Philippine Open) at 2010 (Worldwide Holdings Masters sa Malaysia) noong unang round nang magpakawala ito ng 7 birdies sa isang bogey-less na arangkada (63). Bahagyang bumagal sa pangalawang araw ang Pinoy nang magsuko ng 68 sa tulong ng isang eagle at tatlong birdies na naging pangontra sa tatlong bogeys.

Nabigo namang sundan ng kababayang si Juvic Pagunsan ang kanyang runner-up performance sa tour noong nakaraang linggo (Asia Pacific Diamond Cup, Kaganawa, Japan) matapos itong makalos ng mga organizers dahil sa hindi siya umabot sa cut-off. Malupit ang kompetisyon dahil sa kabila ng disenteng 2-under-par na iskor (138 strokes), naobliga pa rin siyang mag-empake.

Manila Indios, nasingitan ng Laguna heroes sa So Cup

ni Eddie M. Paez Jr. - @Sports | May 19, 2021

Hindi magiging madali ang pangalawang sunod na korona.

Ito ang isa sa mga mensaheng muling napatunayan ng first conference champion Laguna Heroes matapos silang masingitan ng Manila Indios Bravos sa pamamagitan ng makapigil-hiningang Armageddon sa pagsisimula ng import flavored Professional Chess Association of the Philippines - Wesley So Cup Conference noong Sabado ng gabi.

Nagwakas sa 10.5-10.5 na iskor ang mainit na sagupaan ng mga PCAP heavyweights kaya naobligang sumulong sa winner-take-all na yugto ang magkaribal kung saan nakaungos ang Manila, 2-1, sa kaganapang nagsisilbing tanging professional chess league sa bahaging ito ng daigdig.

Dagdag pa sa highlights ng paligsahang ipinangalan sa tubong Cavite at ngayon ay World FIDE Fischer Random Chess champion GM Wesley So ay ang 11.0-10.0 na panalo ng Cavite Spartans laban sa Pasig City King Pirates. Ang una ay walang isinalang na Grandmaster sa unang araw ng ligang sinusuportahan ng Games and Amusement Board.

Kabilang sa mga iba pang nanalo ay ang San Juan Predators (kontra sa Antipolo Cobras, 15.0-6.0); Caloocan Loadmanna Knights (laban sa Rizal Batch Towers, 12.5-8.5); Lapu-Lapu (bumangga sa Mindoro Tamaraws, 12.0-9.0); Cagayan Kings (pinatiklop ang Quezon City Simba’s Tribe, 12.0-9.0); Camarines Soaring Eagles (dinurog ang Zamboanga, 16.5-4.5);

Toledo (nagpagulong sa Cebu City Machers, 15.5-5.5); Cordova Duchess Dagami Warrios (vs. Surigao Fianchetto Checkmates, 17.0-4.0); Iloilo Kisela Knights (dumaig sa Palawan Queen’s Gambit, 18.0-3.0); Negros Kingsmen (nagturo ng leksyon sa Iriga City Oragons, 17.0-4.0); at Lapu-Lapu City Naki Warriors (humarap sa Mindoro Tamaraws, 17.0-4.0).