Amoy Olympic Gold ang performance ni Golfer Saso

ni Eddie M. Paez Jr. - @Sports | June 06, 2021

Sumibad pataas ang pag-asa ng bansa na posibleng mapuputol na ang tagtuyot ng Pilipinas para sa isang Olympic gold medal matapos na hablutin ni Fil-Japanese Yuka Saso ang solong pangunguna sa isang major event ng Ladies Professional Golf Association (LPGA) na kasalukuyang nilalahukan ng mga pinakamalulupit na lady parbusters mula sa iba’t-ibang parte ng daigdig.

Pinakawalan ni Saso, dating Youth Olympic Games silver medalist, ang anim na birdies sa round 2 upang mapawi ang epekto ng dalawang bogeys at isumite ang kartadang 69-67 pagkatapos ng dalawang araw ng kompetisyon. Ito ay sapat na para pangunahan ang mga pro golfers ng LPGA bitbit ang kabuuang iskor na 6-under-par 136 strokes.

Noong 2020, sumali rin sa prestihiyosong kaganapan si Saso at nakuha niya ang pang-13 puwesto. Isang palo sa likod ng 19-taong-gulang na dalagitang Pinay ay si Lee Jeongeun (137) na nagsosolo sa pangalawang baytang habang magkasalo naman sa pangatlo at pang-apat na puwesto sina Megan Khang (138) at ang Amateur tinedyer na si Megha Canne (138). Nasa panglimang upuan si Shanshan Feng (139) ng China.

Kasama sa mga ginulat ni Saso sina South Korean Imbee Park, US bet Lexi Thompson at overnight leader Mel Reid ay kasalukuyang nakasalampak sa pang-anim hanggang pangsiyam na puwesto.

Galing si Saso, dating double gold medalist ng Asian Games, sa isang top 10 performance sa JLPGA Chukyo TV Bridgestone Ladies Open na ginanap sa Chukyo Golf Course ng Ishino, Aichi, Japan. Swak din kamakailan ang Fil-Japanese parbuster sa unang sampu ng LPGA Lotte Championships kamakailan sa Oahu, Hawaii.

Nagsisilbing bahagi ng paghahanda ni Saso para sa nabinbing Tokyo Olympics ang pagsali sa US Women’s Open. Kasalukuyang nasa pang-22 na puwesto ang Pinay parbuster sa listahan ng 60 manlalaro na papayagang sumali sa Olympics ngayong Hulyo. Inaasahang makakasama ni Saso sa Olympics si 2-time SEA Games gold medal winner Bianca Pagdanganan.

PCAP: Cordova, tuloy ang pambibiktima sa 7 koponan

ni Eddie M. Paez Jr. - @Sports | May 30, 2021

Hindi binibitawan ng Cordova Duchess Dagami Warriors ang intensyon nitong patuloy na panggugulat sa mga karibal at ngayon ay hawak na ang solong pangunguna sa Professional Chess Association of the Philippines (PCAP) Wesley So Cup Conference pagkatapos ng pakikipagharap sa pitong magkakaibang mga koponan.

Susunod nilang sasagupain ang Mindoro Tamaraws at Iriga City Oragons sa pagtitipong kinikilala ng Games and Amusement Board o GAB at nananatiling tanging pro chess league sa bahaging ito ng daigdig.

Sumibad ang Cordova sa 7-0 panalo-talo na rekord matapos turuan ng leksyon ang Palawan Queen’s Gambit (14.0-7.0) at daigin ang Toledo City Trojans (11.5-9.5) para sa pang-anim at pampitong mga panalo. Bukod dito, nakaipon na ang lider ng 92.5 na puntos sa torneong ipinangalan sa dating hari ng ahedres sa Pilipinas na tubong Cavite at ngayon ay FIDE World Fischer Random Chess champion na si Grandmaster Wesley So.

Naging moog ng magandang ipinakikita ng Cordova ang laro ng 22-anyos na import nitong si Israeli GM Nitzman Steinberg. Kumana si Steinberg, naging GM at IM noong 19 at 15 taong gulang ayon sa pagkakasunod-sunod, ang mga tagumpay sa board 1.

Nakabuntot sa lider ang tatlong koponan na pare-parehong may 6-1 na marka pagkatapos ng apat na araw na bakbakan sa Wesley So Cup: Camarines Soaring Eagle sa Southern Conference, at San Juan Predators at Manila Indios Bravos sa norte.

Samantala, bahagyang naiiwan ang limang kalahok dahil sa naisumiteng 5-2: ang Antipolo Cobras, Caloocan Loadmanna Knights, Cagayan Kings, Iloilo Kisela Knights at Toledo. Nananatili namang gumagapang ang mga Laguna Heroes, pumasok sa kasaysayan bilang pinakaunang champion ng PCAP, dahil sa natikman na nitong tatlong kabiguan mula sa pitong matches at ngayon ay nakaupo lang sa kalagitnaan ng pulutong sa Northern Conference.

Pagunsan at Que, umiinit ang laro sa Japan tour

ni Eddie M. Paez Jr. - @Sports | May 28, 2021

Ipagpapatuloy nina Pinoy parbusters Angelo Que at Juvic Pagunsan ang kanilang umiinit na kampanya sa malupit na Japan Golf Tour sa pagpalo nila sa Gateway To The Open Mizuno Open sa palaruan ng JFE Setonaikai sa Kasaoka, Japan.

Sariwa sa kani-kanyang impresibong mga laro ang dalawang batikang manlalaro ng Pilipinas sa nakalipas na dalawang linggo ng kampanya sa prestihiyosong professional tour sa bahaging ito ng Asya.

Noong isang linggo, nagpakawala si Que ng isang bogeyless 8-under-par 62 sa kanyang pinakaeksplosibong round sa loob ng apat na araw upang masikwat ang pang-apat na posisyon nang magtapos ang Partner Pro-Am Tournament sa prestihiyosong Japan Golf Tour (JGT) sa Toride Kokusai Golf Club ng Tsukubamirai, Japan.

Nanatilin sa unang sampu si Que sa rounds 1 at 2 pero nasipa siya papunta sa pang-15 pagkatapos ng pangatlong round. Hindi sumuko sa huling 18 butas at sa halip ay umusok ang driver at putter ng beteranong Pinoy tungo sa pagkamada ng walang mantsang round sa kabila ng maigting na kompetisyon.

Ang kabuuang iskor ni Que ay 261 strokes mula sa 63-68-68-62 na marka. Ito ay umuusok na 19-under-par sa torneo at dalawang palo lang ang layo sa nagsalo-salo sa unang puwesto na 259 nina South African Shaun Norris, Tomoharu Otsuki ng Japan at Zimbabwe parbuster Scott Vincent. Si Norris ang hinirang na kampeon sa torneo sa pamamagitan ng tiebreak rules.

Kasosyo ni Que sa pang-apat hanggang pangsampung baytang sina South Korean ace Han Young Son at ang mga Japanese stalwarts na sina Shotaro Wada, Hirotaro Naito, Eric Sugimoto, Kazuki Higa at Ryo Ishikawa.

Tatlong beses nang nagkampeon sa Asian Golf Tour si Que. Hinirang siyang hari ng Carlsberg Masters Vietnam (2004), Philippine Open (2008) at Worldwide Holdings Masters Malaysia (2010). Pumangalawa rin kamakailan si Pagunsan, Asian Golf Tour one time winner at 2011 Order of Merit champion, sa JGT Asia Pacific Diamond Cup sa Kaganawa Japan.