Golfer malixi, podium sa U.S.A.

ni Eddie M. Paez, Jr. - @Sports | June 2, 2022

Minarkahan ni Rianne Malixi ng Pilipinas ang kanyang pang-apat na top 5 performance sa Estados Unidos sa nakalipas na dalawang buwan nang pumangatlo ang dalagita sa 2022 American Junior Golf Association (AJGA): Albane Valenzuela Girls Invitational na ginanap sa Longbow Golf Club ng Mesa, Arizona.

Kabuuang 5-under-par 208 strokes ang ikinabit sa pangalan ni Malixi matapos humataw ng 5 birdies (hole nos. 4, 9, 12, 13 at 18) kontra sa isang bogey (pang-anim na butas) sa huling araw ng kompetisyon. Sa dulo ng bakbakan, binuo ng dalagita ang 67-71-67 na marka. Ito ay naiwan lang ng isang palo sa iskor ng pumangalawang si Catherine Rao (207) ng USA pero lubhang malayo sa iskor ng nagreynang si Jaclyn LaHa (202) ng California na nagposte ng coast-to-coast na panalo.

Gayunpaman, halata ang solidong laro ni Malixi sa labas ng bansa sa nakaraang mga linggo. Kamakailan lang ay hinatak niya ang Philippine women's team sa isang bronze medal finish sa Hanoi Southeast Asian Games. Napigilan nito ang pag-uwi ng pangkat na wala man lang kahit isang ambag sa medal tally ng bansa.

Buwan ng Abril nang sumampa si Malixi sa trono ng AJGA Thunderbird Junior All Star sa Arizona. Isang linggo pagkatapos nito ay nakuha niya ang pangalawang puwesto sa AJGA: Ping Heather Farr Classic.

Matatandaang nagkampeon nakahugot din ng mga titulo ang tinedyer sa mga professional events sa bansa. Bukod dito, hinirang din siyang reyna sa 2021 Se Ri Pak Desert Junior, pangsampu sa Rolex Tournament of Champions noong Nobyembre at pang-25 naman noong huling Asian Amateur Championships.

10-Ball golds sina Amit at Biado; PHL boxers, susuntok sa ginto

ni Eddie M. Paez, Jr. / MC - @Sports | May 22, 2022

Pangalawang gintong medalya ang inangkin ni Rubilen Amit mula sa 31st Southeast Asian Games nang magreyna naman sa women's 10-ball pool singles event kahapon sa Hanoi, Vietnam.

Ginapi ni Amit ang kabayan na si Chezka Centeno sa event at kunin ang silver medal. Unang napagwagian ni Amit ang gold sa women's 9-ball kontra Singapore sa finals. Ito na ang ikatlong gold at silver medal ng 'Pinas sa billiards, 2 bronze at may kabuuang 8 medals. "Natutuwa ako dahil Philippines versus Philippines sa finals. Walang pressure na mapunta sa ibang bansa ang gold,” ani Amit kay Centeno.

Mag-uuwi sina Carlo Biado at Johann Chua ng tig-isang gold medal. Nanaig naman si Biado dahil sa mga crucial errors ni Chua at kunin ang ginto sa men's 10-Ball Singles nang magsagupa uli sila sa All-Pinoy finals ng event. Nadale ng US Open champion ang top spot sa bisa ng 9-3 victory kontra Chua para makabawi sa unang talo niya sa 9-Ball sa kababayan noong Miyerkules.

Samantala, abanse na sa gold medal match sina Olympian Irish Magno at Ian Clark Bautista sa boxing Hanoi. Nagwagi si Magno kontra Novita Sinadia, 5-0, sa women's 48-51 kg event, habang tinilad ni Bautista ang Cambodian na si bet Rangsey Sao sa men's 52-57 kg event.

Kasama nilang sasabak din sa gold medal matches sina Eumir Marcial at Rogen Ladon ngayong Linggo. Nagkasya sa bronze medals sina Olympic silver medalist Nesthy Petecio at Marjon Piañar sa kanilang weight divisions. Natalo si Petecio kay Vietnam's Thi Linh Tran sa semis ng women's 57-60 kg event, 3-2. Nadale si Piañar kay Indonesia's Sarohatua Lumbantobing, 4-1 sa men's 63-69 kg event.

Silver medal naman ang nakamit ni Tokyo Olympian Elreen Ando sa weightlifting kahapon kung saan nakabuhat siya ng kabuuang 223 kg upang pumangalawa kay Thi Hong Thanh Pham ng Vietnam na nakabuhat ng 230 kg at bumanat ng bagong SEAG record sa women's 64 kg.

Pinay archers, gold sa Recurve; Chua, gold, Biado silver sa 9-ball

ni Eddie M. Paez, Jr. / GA / MC - @Sports | May 19, 2022

Pumalaso pa ang Filipina archers ng gold medal nang talunin ang Vietnam sa women's team recurve event sa Hanoi National Sports Training Center sa pagpapatuloy ng 31st Southeast Asian Games.

Ginulantang ng koponan nina Pia Bidaure, Abby Bidaure, at Phoebe Amistoso ang host Vietnam, 5-4 sa finals para kunin ang unang medalya kahapon ng umaga.

Ito rin ang unang gold medal sa archery ng Pilipinas ngayong 31st SEAG sa Hanoi. Nakuha ng Myanmar ang bronze sa women's recurve sa 5-4 na panalo kontra Malaysia. Lumalagare pa sa bronze ang PHL men's team sa recurve habang si Pia Bidaure ay tatambal kay Jason Feliciano sa bronze medal match ng mixed recurve kontra Vietnam.

Samantala, si Johann Chua ang nakasungkit ng ika-2 gold medal para sa PHL Billiards sa itinakdang all-Filipino finals kontra Carlo Biado sa men's 9-ball pool singles event kahapon. Si Jefrey Roda naman ang silver medalist sa Billiards Men’s Snooker 6-Red Singles.

Tansong medalya naman ang nakuha sa sepak takraw nina Jason Huerte, Rheyjey Ortouste, Ronsted Gabayeron, Mark Joseph Gonzales at John John Bobier sa Men’s Regu event habang bronze din si Jason Balabal sa wrestling men's greco roman 97 kg event kahapon. Pilak na medalya ang sinungkit ni Jefferson Manatad sa wrestling men's greco roman 87 kg. at bronze medalist si Noel Norada sa men's greco roman 67 kg event.

Sakalam naman ang Pinay fencers team sa silver na sina Maxine Esteban, Justine Gail Tinio, Samantha Catantan, at Wilhelmina Lozada sa event ng foil team. Iuuwi naman ni Margarito Angana Jr., ang bronze sa men's Greco roman 60 kg sa wrestling. Nakahabol naman ng bronze si Jessie Geriane sa Swimming women's 199m backstroke.

Matapos namang maka-gold ni Chloe Isleta sa 200m backstroke ay naka-silver naman siya sa women's 100m backstroke. Silver medalist naman si Mark Harry Diones sa Athletic Men's Triple Jump. Bronze si Laila Delo sa taekwondo women's kyorugi 67kg.