Chua at Raga, nanaig kina 'Bata' at 'Django' sa Scotch Doubles

ni Eddie M. Paez Jr. - @Sports | April 12, 2021

Tila nagpapahiwatig ang tambalan nina Johann “Bad Koi” Chua at Anton “The Dragon” Raga na panahon na para akuin nila ang pagdadala ng sulo ng Philippine billiards matapos nilang daigin noong Sabado ang mga alamat na sina Efren “Bata” Reyes at Francisco “Django” Bustamante sa dalawang araw na Sharks 9-Ball Showdown: Scoth Doubles na ginanap sa Quezon City.

Sa umpisa ng salpukang may tuntuning unahan sa 50 panalo, tila hindi kumukupas ang makinang na rekord nina Reyes at Bustamante. Ang dalawang cue artists mula sa Gitnang Luzon ay parehong dating world 9-ball champions. Nagsanib-puwersa rin ang dalawa para ibigay sa Pilipinas ang isang World Cup of Pool na titulo. Umusad sila sa 25-20 at 30-25 na kalamangan kontra kina Chua at Raga.

Pero nakaratsada ang mga mas nakababatang pares at dumikit, 32-33, hanggang sa makalamang na sila, 45-40, 48-42. Ipinako nina Chua, dalawang beses na naghari sa Japan Open, at Raga, runner-up ng malupit na China Open, ang panalo laban sa mga Billiards Congress of America Hall of Famers sa iskor na 50-43.

Samantala, nararamdaman ang husay sa pagtumbok ni Jeffrey "The Bull" De Luna matapos makuha ng Pinoy ang kampeonato ng March leg ng Predator Sunshine State Tournament sa Okala, Florida.

Ito na ang pangalawang korona ni De Luna ngayong taong ito dahil siya rin ang nagwagi sa February stop ng torneo sa North Lakeland, Florida. Pang-apat na rin ito sa mga podium finishes na naiposte ng 37-taong-gulang na Pinoy ngayong 2021 sa panahon ng pandemya. Kamakailan ay pumangatlo siya sa Michael Montgomery Memorial 10-Ball Mini (Frisco, Texas) gayundin sa Rack N Grill 9-Ball Shootout (Augusta, Georgia).

Sa pinakahuling salang ni "The Bull" sa kompetisyon, sinagasaan niya sina Jodi Rubin, Francisco Serrano, Benjie Estor at CJ Wiley upang makasampa sa semifinals ng winners' bracket kung saan naghihintay sa kanya si David Singleton. Isang 7-4 na panalo ang nasaksihan para sa kanya kaya nakausad siya sa hotseat match laban kay Anthony Meglino. Dito, magaang idinispatsa ni De Luna si Meglino, 7-3, kaya nasementuhan niya ang kanyang upuan sa finals.

Batang Aguilar, Perez at Marticio namayagpag sa Nat'l Age Group Chess

ni Eddie M. Paez Jr. - @Sports | April 11, 2021

Pinangunahan ng mga kabataang trio na sina Arvie Aguilar, Robert James Perez at Jersey Marticio ang mga namayagpag sa National Age Group Chess Championships - Northern Luzon Leg matapos nilang tapusin ang paligsahan na pulos panalo lang ang marka sa kani-kanyang mga grupo.

Humugot ng pitong panalo mula sa pitong yugto ng pakikipagtagisan ng galing sa ahedres si Aguilar, no. 4 sa pre-tournament rankings dahil sa 2024 na rating, upang makuha ang unang puwesto sa Under 20 - Open Division. Dalawang puntos sa likuran ng kampeon sina Joseph Lawrence Rivera, Jerico Santiaguel at Jayvee Relleve na tumapos sa pangalawa, pangatlo at pang-apat na posisyon ayon sa pagkakasunod-sunod.

Ganito rin ang naging istorya sa labanang nangyari sa Under 18 - Open nang perpektong iskor ang isinumite ni Perez (rating:1968) sa kompetisyon sa age bracket na nilahukan ng 19 na mga aspirante. Kagaya rin ni Aguilar, 4th seed si Perez. Nakuntento sa pangalawang puwesto si Mark Gerald Reyes (6.0 puntos) samantalang nasa pangatlong baytang si John Lance Valencia (5.0 puntos).

Ang dalagitang si Marticio ang runaway winner sa Under 18 Girls bracket dahil sa 7/7 na produksyon niya. Dalawang puntos ang agwat nito sa mga bumuntot sa kanyang sina Marian Calimbo (2nd) at Darlyn Villanueva (3rd) sa tunggaliang nilapatan ng "10-minuto, 5-segundo" time control.

Kasama pa sa mga nagmarka sa kompetisyong inorganisa ng National Chess Federation of the Philippines (NCFP) sina Ma. Elayza Villa (U20 -Girls), Ritchie James Abeleda (U16 - Open), Jelaine Adriano (U16 - Girls), Joemel Narzabal (U14 - Boys), Kaye Lalaine Regidor (U14 - Girls), Sumer Justine Oncita (U12 - Boys), Pinky Cabrera (U12 - Girls), Ranzeth Marco Magallanes (U10 - Boys), Princess Rane Magallanes (U10 - Girls) at Glaiza Celine Romero (Under 8 - Open).

Meneses at Hernandez, maangas sa Nat'l Age-Group Chess Luzon

ni Eddie M. Paez Jr. - @Sports | April 9, 2021

Winalis ng 8-anyos na si Evan Meneses ang oposisyon upang makopo ang unang puwesto sa Under 08 na kategorya ng National Age-Group Chess Championship Southern Luzon Leg.

Anim na beses nasabak sa engkwentro si Meneses, 4th seed at may rating na 1311, pero mula rito ay kumulekta ito ng anim na panalo. Napasama sa mga biktima niya sina Steve Zacky Bolico, Drinian Villanueva, Darren Tanada, Jay Emmanuel Sotaridona, Prince Jhamie Reyes at Caleb Royce Garcia. Nakuntento sa pangalawang puwesto si Villanueva habang nasadlak sa pangatlong baytang si Garcia.

Si Lexie Grace Hernandez ay hindi nagalusan sa kompetisyon sa U16-G para sa perpektong 7 puntos. Malayong pangalawa si Nicolle Ayana Usman (5.5 puntos) habang lalo pang nasa likuran bilang pangatlo si Yana Emilou Devera (4.5 puntos).

Halos perpekto rin ang naging rekord ng mga nangibabaw sa ibang pangkat na sina Jarvey Labanda (U20-B), Juncin Estrella (U14-B), John Curt Valencia (U10-B) at Christian Tolosa (U10-B). Anim na panalo at isang tabla ang ipinoste ni Labanda (rating: 2056) para sa 6.5 na rekord na nagtulak sa kanya sa trono ng U20. Malayong segunda ang limang puntos nina Joshua Navarro at Carl Anthony Canio. Ganito rin ang kwento sa sagupaang U14-B nang magsumite si Estrella (rating: 1877) ng 6.5 puntos. Segunda si Genesis Jahk Andres (5.0 puntos) at tersera si Phil Martin Casiguran (5.0 puntos).

Photo-finished sina Valencia at Tolosa sa U10-B dahil kapwa sila nakakolekta ng tig-6.5 puntos pero kay Valencia napunta ang unang puwesto dahil sa mas mataas na tiebreak points.