Alamin: Mga panuntunan sa bagong quarantine scheme sa Metro Manila

ni Jasmin Joy Evangelista | September 11, 2021

Provisionally approved" na ang mga panuntunan sa quarantine alert level system na ipatutupad sa Metro Manila simula Setyembre 15.

Ito ay matapos muling isailalim sa modified enhanced community quarantine ang Kamaynilaan.

Dalawang quarantine classification lang ang gagawin sa mga lugar na sakop ng Metro Manila; ang ECQ at GCQ, ayon kay Presidential Spokesperson Harry Roque.

Magkakaroon daw ng apat na alert level ang pagpapatupad ng GCQ:

Sa Alert Level 4, o pinakamataas na alert level, bawal ang mga sumusunod:

* Mass gathering

* Indoor dining

* Personal care services

* Paglabas ng mga nasa edad 18 pababa at mga 65 pataas, mga may comorbidity at buntis.

20% lang din ang magiging kapasidad ng mga opisina ng gobyerno sa level na ito.

Sa Alert Level 3, papayagan ang "three C activities" o ang mga aktibidad na gagawin sa crowded na lugar, may close contact, at nasa closed o indoor areas nang may 30% capacity.

Nasa 30% naman ang papayagang capacity sa mga government office sa level na ito.

Kung Alert Level 2 naman ay papayagan ang 50% capacity, at full capacity naman kung Alert Level 1.

Nasa 50% naman ang papayagang capacity sa government offices sa alert level na ito.

Minimum onsite capacity naman ang paiiralin sa mga pribadong negosyo. Pero papayagang pumasok ang mas maraming empleyado sa Alert Level 1.

Mayroon daw option ang IATF na magdeklara ng mas mahigpit na lockdown sakaling tuluyang lumala ang sitwasyon.

Bataan, ECQ hanggang Aug. 22

ni Lolet Abania | August 7, 2021

Isasailalim ang Bataan sa pinakamahigpit na enhanced community quarantine (ECQ) classification simula sa Linggo, Agosto 8.

Sa isang pahayag ngayong Sabado ni Presidential Spokesperson Harry Roque, Jr., inaprubahan ni Pangulong Rodrigo Duterte ang rekomendasyon ng Inter-Agency Task Force (IATF) na isailalim na ang Bataan sa ECQ mula bukas hanggang sa Linggo, Agosto 22.

Inilagay ang naturang probinsiya sa modified enhanced community quarantine (MECQ) hanggang Agosto 15 subalit pinalitan ito at isasailalim sa ECQ.

Una nang inianunsiyo ni Governor Abet Garcia na ang Bataan ay isasailalim sa ECQ dahil sa pagtaas ng COVID-19 cases.

Nitong Agosto 6, nakapagtala ang Bataan ng 14,643 kumpirmadong kaso at sa bilang na ito, 1,974 ang active, 12,135 ang nakarekober habang 534 ang nasawi dahil sa COVID-19.

Liquor ban sa 8 lugar sa NCR habang may ECQ

ni Lolet Abania | August 2, 2021

Walong local government units (LGUs) sa National Capital Region ang magpapatupad ng liquor ban kasabay ng 2-linggong enhanced community quarantine (ECQ) simula Agosto 6. Sa Palace briefing ngayong Lunes, sinabi ni Metropolitan Manila Development Authority (MMDA) chairperson Benhur Abalos na ang pagbabawal sa mga alak at anumang inuming nakalalasing ay nakadepende sa desisyon ng mga mayors ng lugar.

“Sa nakikita namin, ang Valenzuela, Mandaluyong, Parañaque, Pasay, Navotas, Pateros, Quezon City, and San Juan, may mga liquor ban,” ani Abalos. Ito ang naging tugon ni Abalos matapos ang pag-uusap hinggil sa curfew hours na ipatutupad sa Metro Manila kasabay ng ECQ sa lugar, kung saan nagkasundo ang mga mayors na isagawa na lamang ang uniform curfew mula alas-8:00 ng gabi hanggang alas-4:00 ng umaga.

Ayon kay Abalos, madalas na magkasabay na ipinatutupad ang liquor ban at curfew policy sa pagbabago ng quarantine status ng lugar. Gayunman aniya, nasa desisyon pa rin ng mga mayors kung ipagbabawal nila ang mga alcoholic drinks sa panahon ng ECQ sa kanilang lugar.

Sinabi ni Abalos na hindi naman magpapatupad ng liquor ban ang Makati, Taguig, Pasig at Las Piñas. “'Yung iba, ikino-collate pa lang ho namin sa ngayon,” sabi ni Abalos.