Magnitude 6.4 na lindol yumanig sa Occidental Mindoro

ni Jasmin Joy Evangelista | March 14, 2022

Niyanig ng magnitude 6.4 na lindol ang mga parte ng Occidental Mindoro nitong Lunes, ayon sa Philippine Institute of Volcanology and Seismology (Phivolcs).

Naganap ang pagyanig bandang 5:05 a.m. na ang epicenter sa kahabaan ng Manila Trench ay nasa 14.05°N, 119.12°E - 110 km N 79° W ng Lubang.

Naitala ang lindol na tectonic in origin at may lalim na 29 kilometers.

Ayon sa PHIVOLCS, naramdaman ang Intensity III sa Quezon City, Taguig City, Mandaluyong City, at Makati City habang Intensity II sa Talisay, Batangas.

Nasa 10 aftershocks ang naitala simula 6 a.m. Mayroon ding minor damages na nai-report sa Lubang, Occidental Mindoro matapos ang lindol, ayon sa Municipal Disaster Risk Reduction Management Office (MDRRMO).

Sa isang panayam, sinabi ni Lubang MDDRMO Jeremy Villas na kasalukuyan pang ina-assess ng barangay officials ang mga damage sa mga lugar na tinamaan ng lindol.

Sa Barangay Vigo, sinabi ni Villas na tatlong bahay ang nagtamo ng pinsala tulad ng pagkasira ng tiles at crack sa mga biga.

“Meron silang dalawang bahay na naturo sa amin na merong minor damage. Yung granite tiles umangat, anim na piraso siguro yun. Tapos yung wall, 'yung partition medyo umangat,” aniya.

2 patay, 20 sugatan sa 6.2-magnitude na lindol sa Sumatra, Indonesia

ni Lolet Abania | February 25, 2022

Nasa tinatayang dalawang indibidwal ang nasawi at 20 ang nasugatan matapos ang 6.2-magnitude na lindol na tumama sa Sumatra island sa Indonesia ngayong Biyernes, habang ang mga residente ay humanap na ng ligtas na lugar kasabay ng pagguho ng mga gusali sa paligid.

Naganap ang lindol ilang minuto lamang matapos ang hindi gaanong malakas na pagyanig habang ang mga residente ay nagsimula na ring magsilikas sa kanilang tirahan.

“We all fled our home (after the first quake),” pahayag ni Yudi Prama Agustino, 36, sa AFP. “I have a 1-year-old baby, so in panic I pushed the stroller out of the house.”

Ayon sa United States Geological Survey (USGS), ang lindol ay naitala sa hilagang bahagi ng isla na may lalim na 12 kilometers (7.5 miles), nasa 70 kilometers mula sa bayan ng Bukittinggi sa West Sumatra province.

Ang Agam district na hometown ni Agustino ay isa pang 40 kilometers ang layo mula sa Bukittinggi.

“I noticed there was an earthquake because my kids’ toys fell over. I panicked because there were also my in-laws in the house and they are quite old and sick,” sabi ni Agustino sa unang tremor na nai-record na 5.0 magnitude ng USGS.

“Once we were outside a much stronger 6.2 quake happened and everybody panicked,” dagdag pa nito.

Ayon sa head ng National Disaster Mitigation Agency (BNPB) na si Suharyanto, dalawa katao ang nasawi habang 20 ang nasugatan sa West Pasaman, na nasa tinatayang 17 kilometers mula sa epicenter ng lindol.

Nagbabala naman ang meteorological agency BMKG ng Indonesia sa publiko na lumayo na mula sa mga slopes o lowland dahil sa panganib ng landslides sa gitna rin ng rainy season sa lugar.

Naramdaman din ang lindol sa kalapit na mga probinsiyang Riau at North Sumatra, at sa kalayuang Malaysia at Singapore.

Wala namang inisyung tsunami warning matapos ang lindol.

Sarangani niyanig ng magnitude 5.1 na lindol

ni Jasmin Joy Evangelista | February 12, 2022

Niyanig ng magnitude 5.1 na lindol ang Kiamba, Sarangani kagabi, February 11, ayon sa PHIVOLCS.

Ang naturang paglindol ay ibinaba mula sa 5.3 magnitude, ayon sa ahensiya.

Ito ay naganap bandang 10:25 p.m. na may lalim na 24 kilometers at tectonic in origin.

Nakapagtala ito ng Intensity IV sa bayan ng Kiamba at Maitum sa Sarangani.

Naitala naman ang Intensity III sa General Santos City; Zamboanga City; Cotabato City; Maasim, Sarangani; Norala, Tupi at Lake Sebu, South Cotabato.

Ayon sa PHIVOLCS, walang naitalang pinsala matapos ang pagyanig, subalit posibleng magkaroon ng aftershocks.