Batanes niyanig ng magnitude 5.2 na lindol

ni Jasmin Joy Evangelista | March 27, 2022

Niyanig ng magnitude 5.2 na lindol ang Basco, Batanes nitong Sabado ng gabi, ayon sa Philippine Institute of Volcanology and Seismology (PHIVOLCS).

Ayon sa PHIVOLCS ang epicenter ng lindol, na tumama bandang 9:53 p.m., ay 40 kilometers northeast ng Basco.

Ito ay tectonic na may lalim na 29 kilometers, at naramdaman ang Intensity III sa Basco.

Nagpaalala naman ang ahensiya na posibleng makaranas ng aftershocks matapos ang naturang lindol.

Sa panayam sa Super Radyo dzBB ngayong Linggo, sinabi ni PHIVOLCS Director at Science Undersecretary Renato Solidum Jr. ang ang lindol ay dulot ng nabuong fault dahil sa pagtama ng kontinente ng Asya sa tip ng northern Luzon.

"Sa Batanes kasi maraming fault sa lupa, at ito ay dulot ng collision ng kontinente ng Asia doon sa dulo ng northern Luzon. Ang Batanes at Taiwan island ay collision zone, binabangga, kaya paminsan-minsan ay may lindol sa dagat na nararamdaman ng mga isla malapit sa Batanes," ani Solidum.

Magnitude 5.3 na lindol yumanig sa Leyte

ni Jasmin Joy Evangelista | March 21, 2022

Niyanig ng magnitude 5.3 na lindol ang Burauen, Leyte nitong Lunes ng madaling ataw, ayon sa Philippine Institute of Volcanology and Seismology (PHIVOLCS).

Ang naturang lindol na tectonic in origin ay naganap bandang 12:39 a.m.

Ang epicenter nito ay tumama 10.93°N, 124.81°E - 010 km S 58° W sa bayan ng Burauen. May lalim itong apat na kilometro.

Naramdaman ang Intensity V sa Burauen, Ormoc City, Kananga, La Paz, Julita, at Pastrana in Leyte.

Ang Intensity IV naman ay naramdaman sa Dulag, Santa Fe, Barugo, Abuyog, Palo, Tolosa, Capoocan at Baybay City sa Leyte; at Tacloban City habang Intensity III naman sa Cebu City at Talisay City sa Cebu; Lawaan, Eastern Samar; Leyte, Leyte; at Biliran, Biliran.

Intensity II naman ang naramdaman sa Borongan City at Taft sa Eastern Samar; at Naval, Biliran.

Wala namang naganap na pinsala sa naturang lindol ngunit asahan ang posibleng aftershocks, ayon sa PHIVOLCS.

6.8 magnitude na lindol yumanig sa Kepulauan Batu, Indonesia

ni Jasmin Joy Evangelista | March 14, 2022

Niyanig ng magnitude 6.8 na lindol ang Kepulauan Batu sa Indonesia ngayong Lunes, ayon sa European Mediterranean Seismological Centre (EMSC).

Ang lindol ay may lalim na 40 km (24.85 miles), ayon sa EMSC.