5.4 lindol sa Batanes

ni Mai Ancheta @News | August 14, 2023

Niyanig ng magnitude 5.4 na lindol ang Sabtang, Batanes nitong Linggo ng umaga.

Ayon sa Philippine Institute of Volcanology and Seismology (Phivolcs), naitala ang lindol alas-9:30 ng umaga.

Naramdaman ang intensity 5 sa bayan ng Sabtang habang intensity 4 naman sa Basco, Mahatao, Ivana at Uyugan, at intensity 3 naman sa Itbayat.

Walang impormasyon ang Phivolcs na nagdulot ng pinsala ang malakas na lindol subalit aasahan ang mga aftershock.

Naunang ini-report ng ahensya na 5.7 magnitude ang lindol subalit kalaunan ay nilinaw na nasa 5.4 magnitude lamang ito.

Metro Manila, niyanig.. 6.3 Lindol sa Batangas

ni Jeff Tumbado | June 16, 2023

Isang magnitude 6.3 na lindol ang yumanig sa lalawigan ng Batangas at malaking bahagi ng Luzon region kahapon.

Batay sa tala ng Philippine Institute of Volcanology and Seismology (Phivolcs), naganap ang lindol na tectonic ang pinagmulan alas-10:15 ng umaga ng Huwebes, Hunyo 15, kung saan namataan ang epicenter nito 15 kilometro ang layo sa timog-kanluran ng Calatagan, Batangas, na may lalim na 119 kilometro.

Ayon kay Erlington Olavere, seismic and earthquake specialist ng Philvolcs, nang dahil sa lalim ng origin ng pag-uga ng lupa ay ramdam ang pagyanig sa matataas na gusali.

"Normally, mas ramdam ito sa mga high-rise at saka mga medium-rise buildings, ‘yung mga nasa upper floor. So, sila ‘yung medyo mas makakaramdam against doon sa mga nasa ground floor," ani Olavere.

Naramdaman ang Intensity IV sa ilang parte ng National Capital Region (NCR) partikular sa Maynila, Mandaluyong City, Valenzuela City, Quezon City at Region 3 sa Bulacan, Region 4A sa Batangas, Cavite, Tagaytay at Rizal.

Intensity III naman sa Pateros, Las Pinas City, Makati City, Marikina City, Paranaque City, Pasig, Obando, Bulacan; Laurel, Batangas; Bacoor City at Imus, Cavite; San Pablo City; at San Pedro, Laguna at San Mateo, Rizal.

Naiulat din ang Intensity II sa Caloocan City; San Juan City; Muntinlupa City; San Fernando, La Union; Alaminos at Bolinao, Pangasinan; Santa Maria, Bulacan; Tarlac; Bamban, Tarlac at intensity I naman sa San Jose Del Monte, Bulacan.

Agad na sinuspinde ng Department of Transportation ang lahat ng operasyon sa Metro Rail Transit (MRT) at Light Rail Transit (LRT) at pinatigil ang lahat ng tren sa pinakamalapit na terminal.

Batanes at Masbate, nilindol

ni Mai Ancheta | May 27, 2023

Niyanig ng magkahiwalay na malakas na lindol ang mga lalawigan ng Batanes at Masbate nitong Huwebes ng gabi.

Ayon sa Philippine Institute of Volcanology and Seismology (Phivolcs), naitala sa magnitude 5.6 ang lindol sa Batanes pasado alas-10 ng gabi kung saan ang epicenter nito ay 33 kilometro hilagang silangan ng bayan ng Itbayat.

Naramadam ang pagyanig sa mga bayan ng Itbayat (intensity 3), Basco at Mahatao (intensity 2), at Ivana (intensity 1).

Pasado alas-11 naman ng gabi nitong Huwebes ay nilindol din ang Uson, Masbate na naitala ang lakas sa magnitude 5.0.

Naramdaman ang lindol sa Masbate City (intensity 3), at intensity 2 naman sa mga bayan ng Naval, Biliran, at Villaba, Leyte.

Walang naiulat ang Phivolcs na matinding pinsala sa dalawang magkasunod na malakas na lindol subalit asahan pa rin ang mga aftershocks.