4.7 lindol sa Masbate

ni Mai Ancheta @News | September 25, 2023

Niyanig ng 4.7 magnitude na lindol ang Masbate City at kalapit na mga lugar kahapon ng umaga.

Ayon sa Philippine Volcanology and Seismology (Phivolcs), naitala ang lindol alas-6:21 ng umaga at wala namang naitalang pinsala.

Naramdaman ang intensity 4 na lindol sa Masbate City at San Fernando; intensity 3 sa Batuan, Milagros, Mobo at Monreal; intensity 2 sa bayan ng Aroroy; Rosario sa Northern Samar; Bulusan sa Sorsogon at Legazpi City sa Albay.

Bagama't walang idinulot na pinsala, sinabi ng Phivolcs na aasahan ang mga aftershocks ng lindol.

Matatandaang nitong nakalipas na linggo ay nakaranas din ng lindol sa ilang lugar sa bansa subalit walang paliwanag kung bakit nagiging madalas ang lindol.

6.3 lindol sa Cagayan, 5 nadale

ni Mai Ancheta @News | September 14, 2023

Lima katao ang nasugatan matapos yanigin ng magnitude6.3 na lindol ang lalawigan ng Cagayan nitong Martes ng gabi.

Batay sa report ng Office of Civil Defense, ang limang sugatan ay tinamaan ng bumagsak na pader.

Tatlo sa mga biktima ay nagtamo ng minor injuries habang ang dalawa ay sugat sa ulo.

Naramdaman ang sentro ng lindol sa Dalupiri, pasado alas-7 ng gabi habang intensity 4 naman sa mga lugar na nasa tabing dagat.

Wala namang naiulat na namatay sa naganap na lindol at patuloy na binabantayan ang mga posibleng aftershocks.

Morocco dumipensa sa banat na mabagal ang pagtugon sa 6.8 lindol

ni Jenny Rose Albason @Overseas News | September 13, 2023

Nagpaliwanag ang gobyerno ng Morocco sa mga batikos na mabagal umano ang kanilang pagtugon sa mga biktima ng 6.8 magnitude na lindol.

Ginagawa umano ng gobyerno ang kanilang makakaya upang matulungan ang mga biktima ng lindol.

Umabot na sa mahigit 2,700 ang mga nasawi dahil sa malakas na pagyanig.

Iginiit naman ni Prime Minister Aziz Akhannouch na bibigyan nila ng tulong pinansyal ang mga biktima.

Nagpaabot din ng tulong ang ibang mga bansa kung saan ay nagpadala ang Spain, Britain, United Arab Emirates at Qatar ng kanilang mga rescue specialists kasama ang sniffer dogs.

Nahirapan umano ang mga rescuers dahil malalaking bato umano ang gumuho sa mga kabahayan.